Gendeh base na Biblia el celebracion de Easter. Sino, si mira tu na historia de este, puede tu sabe que un tradicion este que estaba na maga ritual de fertilidad. Considera con el siguiente.

1.   Nombre: El Encyclopædia Britannica ya habla: “Gendeh asigurao si onde estaba el Ingles termino Easter; del ika-ocho siglo, el un Anglo-Saxon padre, si Venerable Bede ya saca con este na nombre de Eostre, el diosa del maga Anglo-Saxon na tiempo de spring.” El otro maga referencia ta habla que tiene este coneccion con Astarte, el diosa de fertilidad del maga gente na Fenicia. Si na Babilonia, ta llama con ele Ishtar.

2.   Conejo: Maga simbolo este de fertilidad, que “estaba pa na maga ritual de antes y simbolo este del maga fiesta del maga pagano na Europe y Middle East durante el tiempo de spring.”​—Encyclopædia Britannica.

3.   Easter Egg: Asegun na Funk & Wagnalls Standard Dictionary of Folklore, Mythology and Legend, el tradicion que busca maga Easter egg que estaba daw na Easter rabbit, “gendeh lang un juego de maga bata sino tiene este coneccion na ritual de fertilidad de antes.” Na cuanto maga cultura, ta creé sila que el Easter egg que ya decora “puede lleva alegria, prosperidad, buen salud y proteccion.”​—Traditional Festivals.

4.   Nuevo camisa si tiempo de Easter: “Para kanila, si gendeh nuevo el camisa si ta man greet con Eastre o el diosa de Scandinavia del tiempo de Spring, ta dale se mira que nuay sila respeto y como resulta, malas este para kanila.”​—The Giant Book of Superstitions.

5.   Maga ritual durante el subida del sol: Tiene este coneccion na maga ritual de antes que ta hace aquellos quien ta adora con el sol que “ta conduci durante el vernal equinox para man welcome con el sol y con el grande poder de este para dale vida con todo cosas que ta crici.”​—Celebrations​—The Complete Book of American Holidays.

 Justo el cosa ya habla el The American Book of Days acerca na Easter: “Nuay duda que el Iglesia de antes ya acepta maga tradicion del maga pagano y ya pone con esos importancia na Cristiano adoranza diila.”

 El Biblia ta habla que na diaton adoranza con Dios, gendeh kita debe sigui na maga tradicion o ritual que gendeh aceptable con ele. (Marcos 7:6-8) Si Dios Jehova ta habla: “No man junto canila. No mete el maga cosa-cosa manchao.” (2 Corinto 6:17, El Nuevo Testamento na Chavacano) Aquellos quien quierre hace alegre con Dios hay evita con el Easter que amo un celebracion del maga pagano.