Cuando ya crea el Dios con el maga gente, proposito de suyu que el sexo para lang na un hombre y na un mujer que casao. (Genesis 1:27, 28; Levitico 18:22; Proverbio 5:18, 19) Ta condena el Biblia con el maga sexual actividad entre na un hombre y mujer quien gendeh casao o entre na maga homosexual. (1 Corinto 6:18) Incluido aqui el sexo, agarrada de privado parte del otro y oral o anal sex.

 El Biblia ta condena con el maga homosexual conducta pero gendeh este tan uyun que odia con el maga homosexual. Sino ta manda este con el maga Cristiano que “respeta con todo.”—1 Pedro 2:17, El Nuevo Testamento na Chavacano.

 Posible ba nace el un persona como homosexual?

El Biblia nuay directa menciona acerca si paquemodo ta tiene homosexual deseo el un persona pero ta habla este que todo kita ya nace que tiene tendencia que man contra na maga mandamiento del Dios. (Roma 7:21-25) En vez de man focus si porque ta tiene homosexual deseo el maga gente, el Biblia directa ta prohibi con el maga homosexual actividad.

 Si paquemodo hace alegre con Dios maskin tiene maga deseo na igual sexo.

El Biblia ta habla: “Destrosa ustedes todo el maga mal deseo para peca que tiene pa ustedes na corazon, como el imoralidad.” (Colosa 3:5, El Nuevo Testamento) Para destroza con el maga mal deseo que posible resulta na mal conducta, necesita tu controla con el de tuyu pensamiento. Si pirmi tu ta pensa acerca na cosas bueno, mas facil para contigo quita na pensamiento con el maga mal deseo. (Filipo 4:8; Santiago 1:14, 15) Posible que man dificil tu na primero, pero na uliji, queda siempre se facil para contigo. El Dios ta promete que ayuda le contigo hace “cambio espiritual na [de tuyu] pensamiento.”—Efeso 4:22-24.

 Maskin aquellos quien gendeh homosexual, ta hace tambien esfuerzo para man contra con el diila maga deseo y vivi asegun na maga principio na Biblia. Por ejemplo, aquellos quien gendeh mas ta expecta casa o aquellos quien casao na individual que gendeh ta puede man sexo, ta controla con el diila sexual deseo maskin pa na maga situacion donde ta enfrenta sila maga tentacion y ahora, ta vivi sila con alegria. Puede tambien se hace aquellos quien tiene homosexual deseo si quierre gayot sila hace alegre con Dios.—Deuteronomio 30:19.