El Biblia ya predicta acerca na maga epidemia (incluido ya el pandemic que tan calayat na entero mundo) que hay sucede durante el ultimo maga dia. (Lucas 21:11, El Nuevo Testamento) Ese pandemic gendeh castigo estaba con Dios. Gane, por medio na de suyu Reino, gendeh mas dura, el Dios hay termina con el todo problema na salud, incluido ya el pandemic.

•  Ya predicta ba el Biblia acerca na pandemic?

•  Ya castiga ba el Dios de antes con el maga gente por medio na enfermedad?

•  Castigo ba del Dios el pandemic que ta sucede ahora?

•  Hay llega ba el tiempo que nuay mas pandemic?

•  Maga texto acerca na enfermedad

 El Biblia nuay especifico predicta acerca na pandemic igual na COVID-19, AIDS o el Spanish flu. Pero ya predicta este acerca na maga “epedemia” y “enfermedad.” (Lucas 21:11; Revelacion 6:8, El Nuevo Testamento.) Parte este del maga señal del “ultimo maga dia” que ta llama tambien “fin del mundo.”​—2 Timoteo 3:1; Mateo 24:3, El Nuevo Testamento na Chavacano.

 El Biblia ta dale mira que na cuanto ocasion, el Dios ya castiga con el maga gente por medio na enfermedad. Por ejemplo, ya causa le con el cuanto individual para tiene lepra (leprosy). (Numero 12:1-16; 2 Rey 5:20-27; 2 Cronicas 26:16-21) Pero, este maga castigo gendeh igual con el pandemic que tan calayat maskin na maga inocente gente. Sino, especifico juzgamiento este del Dios con el maga gente quien tan contra con ele.

 Gendeh. El cuanto maga gente ta pensa que el Dios ta usa con el pandemic o otro enfermedad para castiga con el maga gente. Pero, gendeh ta suporta con ese el Biblia. Porque?

 El un razon amo cay el cuanto na maga siervo del Dios​—de antes y ahora​—ta tiene tambien enfermedad. Por ejemplo, el fiel hombre que si Timoteo, ya sufri tambien na “maga enfermedad.” (1 Timoteo 5:23) Pero nuay habla el Biblia que señal este que nuay le el favor del Dios. Igual na diaton tiempo ahora, el cuanto maga fiel siervo del Dios ta enferma o tan tapon tambien na maga enfermedad. Ya sucede este cay este maga individual talli na gendeh justo lugar y gendeh justo tiempo.​—Eclesiastes 9:11.

 Mas pa, el Biblia ta enseña que nuay pa llega el tiempo cuando hay castiga el Dios con el maga malo. Sino, ta vivi kita “na dia del salvacion”​—quierre decir, el tiempo que el Dios ta invita con el todo gente que queda cerca con ele para salva. (2 Corinto 6:2) El un manera que ta extende le este invitacion amo por medio del trabajo predicacion na entero mundo con positivo mensaje​—el “Buen Noticia acerca del Reino.”​—Mateo 24:14.

 Si. El Biblia ya predicta que gendeh mas dura, hay llega el tiempo que nuay mas quien hay enferma. Bajo na rulanza del de suyu Reino, el Dios hay cura con el todo problema na salud. (Isaias 33:24; 35:5, 6) Hay quita le con el sufrimiento, dolor y muerte. (Revelacion 21:4) Y hay hace le vivi otravez con aquellos quien ya muri y tiene buen salud na paraiso tierra.​—Salmo 37:29; Maga Actividad 24:15.

 Revelacion 6:8, El Nuevo Testamento: “Despues ya mira yo un caballo mapucla y el nombre del gente muntao con ese si Muerte, y na detras di suyo ta sigui el representante del lugar del maga muerto que ta llama Hades. Ya recibi sila el poder . . . para mata sila por medio . . . del enfermedad.”

 Quierre decir: El profecia acerca con el cuatro caballero na Revelacion ta dale mira que el pandemic hay sucede na diaton tiempo.