Maskin pa posible ta sinti el un persona que tiene le el derecho para vengga, contra se na cosa ta habla el Biblia: “No habla: ‘Hay hace yo con ele el cosa le ya hace conmigo; man balus yo con ele por causa na cosa le ya hace.’” (Proverbio 24:29) El Biblia ta contene maga consejo que ya ayuda con el manada para gendeh man balus.

Na este articulo

•  Porque malo que pricura vengga?

•  Na cosa manera ta dale castigo el Dios?

•  Paquemodo yo resisti con el deseo que vengga?

•  Maga gendeh justo idea acerca na vengganza

 Si tiene quien ya hace sinti duele contigo, natural lang que rabia tu y quierre que castiga con el persona na cosa le ya hace contigo. Pero el vengganza gendeh harmonia na cosa ta enseña el Biblia. Porque?

 Si ta hace manera el maga gente para vengga, gendeh se ta hace alegre con Dios. Na Biblia, si Dios Jehova a ya habla: “Dimio el venganza. Yo amo quien ay dale el pago que conviene canila.” (Roma 12:19, El Nuevo Testamento na Chavacano) El Biblia ta anima que pricura resolva con el maga problema con paz en vez que pricura man balus con aquellos quien ya hace sinti duele kanaton. (Roma 12:18) Pero paquemodo si nuay siempre puede resolva con el problema maskin pa ya hace ya kita el todo? El Escritura ta anima kanaton que confia con Jehova que corecta con ese.—Salmo 42:10, 11.

 Ahora, ta permiti el Dios con el maga secular autoridad para castiga con el maga gente quien ya hace cosas malo. (Roma 13:1-4) Llega el tiempo, hay castiga le con el todo quien ta causa maldad y hay asigura le que nuay mas quien hay sufri hasta para cuando.—Isaias 11:4.

•   No sigui dayun na de tuyu emocion. (Proverbio 17:27) El maga gente quien ta sigui na diila rabia mas mucho ta hace maga cosas que na uliji, ta arripinti sila. Pero, aquellos quien ta dale tiempo para pensa antes actua ta puede hace maga buen decision.—Proverbio 29:11.

•   Sabe anay el maga detalle. (Proverbio 18:13) Si tiene contigo quien ya hace sinti duele, pregunta na de tuyu mismo cuerpo: ‘Tiene ba yo cosa no sabe que posible amo el razon si porque le quel ya puede hace? Ya puede lang ba le quel hace cay stress le? O no sabe lang le que mali el cosa le ta hace?’ Tiene vez, pensaba kita que intencional kanaton ya hace sinti duele pero, gendeh gale.

 Gendeh justo idea: Ciendo nuay habla el Biblia que puede kita mismo man balus, gendeh kita puede defende con el diaton mismo cuerpo si ataca kanaton el otro.

 Verdad: Si ataca kanaton el otro, tiene kita el derecho para defende con el diaton mismo cuerpo o pidi ayuda na maga autoridad. Pero el Biblia ta habla que debe kita evita peleajan si posible.—Proverbio 17:14.