Cosa Ta Habla el Biblia Acerca na Ayuno?

MAN PLAY

El contestacion del Biblia

Na tiempo del Biblia, aceptable el ayuno con Dios si ta hace con este con justo motivo. Pero si ta hace este por causa na maga gendeh bueno razon, gendeh este ta hace alegre con Dios. Pero, el Biblia gendeh ta manda o ta priva con el maga gente que man ayuno ahora.

Porque tan ayuno el cuanto na tiempo del Biblia?

Para pidi ayuda o guia con Dios. El maga gente quien ta anda na Jerusalem tan ayuno para dale mira que sincero sila ta pidi con el ayuda del Dios. (Esdras 8:21-23) Yan ayuno si Pablo y Bernabe cuando ya iscuji sila maga anciano na congregacion.—Maga Actividad 14:23.
Para puede man focus na proposito del Dios. Despues del bautismo de Jesus, yan ayuno le por 40 dia para prepara con el de suyu mismo cuerpo que hace con el voluntad del Dios durante de suyu ministerio.—Lucas 4:1, 2.
Para dale mira que ta arripinti na pecado que ya hace de antes. Por medio con profeta Joel, el Dios ya habla con el maga gendeh fiel Israelita: “Bira conmigo con todo el de ustedes corazon y man ayuno, llura y man haya.”—Joel 2:12-15.
Si ta celebra con el Dia de Tapada de Culpa. Incluido na Ley que ya dale el Dios con el nacion de Israel el mandato que man ayuno na Dia de Tapada de Culpa cada año. a (Levitico 16:29-31) Justo lang que man ayuno el maga Israelita na este ocasion ciendo manda este acorda kanila que maga imperfecto sila y necesita con el perdon del Dios.

Cosa el cuanto gendeh justo motivo para man ayuno?

Para dale mira con otro maga gente. Ya enseña si Jesus que el ayuno debe un privado cosa entre na un persona y con Dios.—Mateo 6:16-18.
Para dale mira que recto el un persona. Si tan ayuno el un persona, gendeh se quierre decir que mas bueno el de suyu moralidad o espiritualidad compara na otro.—Lucas 18:9-14.
Para pruba tapa con el culpa que intencional ya hace. (Isaias 58:3, 4) Aceptable lang con Dios el ayuno del un persona si obediente le y deverasan ya arripinti con el pecado que ya comete le..
Para sigui con el tradicion na religion. (Isaias 58:5-7) El Dios amo igual na un mayores quien gendeh alegre si el de suyu maga anak ta habla que ta ama con ele por causa lang na obligacion y gendeh estaba na corazon.

Necesita ba man ayuno el maga Cristiano?

Gendeh. Ya manda el Dios que man ayuno el maga Israelita na Dia de Tapada de Culpa. Pero, ya quita le con ese celebracion despues permanente tapa si Jesus con el pecado del maga gente quien ya arripinti. (Maga Hebreo 9:24-26; 1 Pedro 3:18) El maga Cristiano gendeh bajo na Ley de Moises, donde parte el Dia de Tapada de Culpa. (Roma 10:4; Colosa 2:13, 14) Poreso, el cada Cristiano hay decidi si man ayuno ba le o gendeh.—Roma 14:1-4.

Sabe el maga Cristiano que el ayuno gendeh centro del diila adoranza. Gendeh ta habla el Biblia que queda alegre el maga gente si man ayuno sila. Sino, alegre el maga verdadero Cristiano ciendo ta reflecta sila con el personalidad de Jehova, el “alegre Dios.”—1 Timoteo 1:11, NWT; Eclesiastes 3:12, 13; Galacia 5:22.

Maga gendeh justo idea acerca na mirada del Biblia na ayuno

Gendeh justo idea: Ya habla si apostol Pablo que man ayuno el maga man maridable Cristiano.—1 Corinto 7:5, King James Version.

Verdad: El maga de con todo daan manuscrito del Biblia nuay menciona con el ayuno na 1 Corinto 7:5. b Ta sale que el maga quien ya copia con el Biblia ya omenta con el idea de ayuno, gendeh lang na este texto sino pati na Mateo 17:21; Marcos 9:29 y Maga Actividad 10:30. El mayoria del maga moderno translation de Biblia ya quita con este idea de ayuno na este maga texto.

Gendeh justo idea: Debe man ayuno el maga Cristiano para comemora con el ayuno que ya hace si Jesus por 40 dia na desierto despues del de suyu bautismo.

Verdad: Si Jesus nuay manda man ayuno na ansina manera. Nuay tambien evidencia na Escritura que ya hace con ese el maga Cristiano del primer siglo. c

Gendeh justo idea: Debe man ayuno el maga Cristiano si ta comemora con el muerte de Jesus.

Verdad: Nuay manda man ayuno si Jesus con el de suyu maga dicipulo para comemora con el de suyu muerte. (Lucas 22:14-18) Cuando ya habla si Jesus que man ayuno el de suyu maga dicipulo si muri le, gendeh este mandato sino ya habla lang se si cosa sucede. (Mateo 9:15) El Biblia ya manda con el maga Cristiano quien con hambre que come na casa antes el Comemoracion del muerte de Jesus.—1 Corinto 11:33, 34.

a El Dios ya habla con el maga Israelita: “Debe ustedes hace sinti duele con el de ustedes mismo cuerpo” o “debe ustedes hace sinti duele con el de ustedes maga alma” na Dia de Tapada de Culpa. (Levitico 16:29, 31; King James Version) Ya entende con este expresion que ta refiri na ayuno. (Isaias 58:3) Poreso, el Contemporary English Version yan translate con este como: “Gendeh ustedes debe come para dale mira que dolorido ustedes na pecado que ya hace ustedes.”

b Mira con el A Textual Commentary on the Greek New Testament, de Bruce M. Metzger, Ika-tres Edicion, pagina 554.

c Asegun na historia del 40-dia ayuno durante el Cuaresma, el New Catholic Encyclopedia ya habla: “Del primer tres siglo, gendeh ta sobra na un semana el tiempo de ayuno como preparacion para na fiesta de Easter; mas mucho, ta hace con este maga uno o dos dia. . . . Ya menciona por primer vez con el tiempo de 40 dia na ika-cinco ley del Council of Nicaea (325), pero gendeh tan uyun el maga scholar si ta refiri ba quel na Cuaresma.—Ika-dos Edicion, Volume 8, pagina 468.