Gendeh el Dios el causa del maga natural calamidad que ta sucede ahora. Gane, tiene le queber con aquellos quien ya sale afectao. El maga natural calamidad amo uno na maga causa de sufrimiento que el Reino del Dios hay quita. Pero mientras tanto, el Dios ta dale comforta con aquellos quien ya sale victima de ese.​—2 Corinto 1:3.

•  Porque kita puede asigura que el maga natural calamidad gendeh castigo estaba con Dios?

•  El maga natural calamidad ba amo un señal que ta vivi ya kita na ultimo maga dia?

•  Paquemodo el Dios ta ayuda con aquellos quien ya queda victima?

•  Puede ba ayuda el Biblia para queda kita preparao na natural calamidad?

•  Maga texto na Biblia que puede dale comforta con el maga victima

 El maga natural calamidad que ta sucede ahora diferente na manera si paquemodo el Dios ya usa con el natural fuerza alrededor kanaton na tiempo del Biblia.

•   Maskin quien puede muri o sale afectao na maga natural calamidad. Pero na Biblia, el Dios ta usa con el natural fuerza para dale juzgamiento con aquellos lang ta hace malo. Por ejemplo, cuando ya destroza el Dios con el ciudad de Sodoma y Gomorra, ya salva le con el un buen gente, si Lot, y con el de suyu dos anak mujer. (Genesis 19:29, 30) Ya puede mira el Dios con el corazon del maga individual na aquel tiempo y ya destroza le con el maga malo lang.​—Genesis 18:23-32; 1 Samuel 16:7.

•   Mas mucho del maga natural calamidad ta sucede sin aviso. Gendeh igual con ese, el Dios ta dale aviso con el maga malo antes le usa con el maga natural fuerza contra kanila. Aquellos quien ya pone atencion na aviso ya tiene el oportunidad para escapa.​—Genesis 7:1-5; Mateo 24:38, 39.

•   Parte na razon el maga gente si porque ta tiene natural calamidad. Porque? Cay ta causa sila destrozo na tierra y ta construi sila maga facilidad na maga lugar que donde pirmi tiene temblor, avenida y otro pa maga calamidad. (Revelacion 11:18) Nuay razon para disculpa con Dios na mal resulta del diila maga decision.​—Proverbio 19:3.

 Si, el maga profecia na Biblia ta dale mira que hay tiene maga calamidad durante el “fin” o na “ultimo maga dia.” (Mateo 24:3; 2 Timoteo 3:1) Por ejemplo, acerca na diaton tiempo si Jesus ya habla: “Ay tene donde-donde maga calamidad de hambre y maga temblor.” (Mateo 24:7) Gendeh dura el Dios hay quita con el todo cosas que ta causa dolor y sufrimiento, incluido el maga natural calamidad.​—Revelacion 21:3, 4.

•   El Dios ta dale comforta con el maga victima por medio na de suyu Palabra, el Biblia. El Biblia ta dale asiguranza que el Dios ta ama kanaton y ta sinti le triste si ta sufri kita. (Isaias 63:9; 1 Pedro 5:6, 7) Ta dale tambien este mira que el Dios ya promete que llega el tiempo gendeh mas sucede el maga natural calamidad.​—Mira con el “ Maga texto na Biblia que puede dale comforta con el maga victima.”

•   El Dios ta ayuda con el maga victima por medio na de suyu maga siervo. El Dios ta usa con el de suyu maga siervo aqui na tierra quien ta imita con el ejemplo de Jesus. El Palabra del Dios ya predicta que si Jesus hay dale comforta con aquellos quien “dolorido el corazon.” (Isaias 61:1, 2) Ansina tambien el cosa ta pricura hace el maga siervo del Dios.​—Juan 13:15.

   Ta usa tambien el Dios con el de suyu maga siervo para dale practical ayuda con aquellos quien ya queda victima del natural calamidad.​—Maga Actividad 11:28-30; Galacia 6:10.

 Si. Maskin pa el Biblia gendeh un manual acerca si paquemodo queda preparao na maga natural calamidad, ta contene este maga principio que puede ayuda kanaton. Por ejemplo:

•   Plaña adelantao. El Biblia ta habla: “El un sabio ta puede mira con el peligro y ta esconde.” (Proverbio 22:3) Hay beneficia kita si prepara kita adelantao para na maga emergencia. Incluido na cosas que puede ustedes plaña amo prepara un go bag que puede dayun ustedes lleva si tiene emergencia. Man sabut tambien daan con el familia si onde ustedes man mirajan si tiene sucede calamidad.

•   Dale importancia con el vida que con el material cosas. Asegun na Biblia: “Noay kita cosa ya lleva na mundo y noay tamen kita cosa ay puede saca na mundo.” (1 Timoteo 6:7, 8) Necesita kita queda conforme deja con el diaton casa y material cosas para puede escapa na calamidad. Debe kita acorda que mas importante el diaton vida contra na material cosas.​—Mateo 6:25.