Si, cay el de con todo buen ayuda amo estaba con “el Dios, quien ta dale consuelo con el maga desganao.”​—2 Corinto 7:6, El Nuevo Testamento na Chavacano.

•   Fuerza. El Dios gendeh ta quita todo diaton maga problema sino como contestacion na diaton maga rezo, ele “ta dale [kanaton] el fuerza” para puede kita aguanta. (Filipo 4:13) Puede tu asigura que preparao le oi contigo cay el Biblia ta habla: “Cerca si Jehova con aquellos quien dolorido el corazon; ta salva le con aquellos bien triste.” (Salmo 34:18) Gane, maskin pa gendeh tu ta puede habla na de tuyu rezo el cosa tu quierre habla, sabe el Dios si cosa tu ta pidi.​—Roma 8:26, 27.

•   Buen ejemplo. Un escritor del Biblia el ya habla con Dios na rezo: “Na de mio tristeza ta llama yo contigo.” (Salmo 130:1, Good News Translation) Ya acorda el salmista que preparao el Dios perdona diaton maga culpa y ya puede este dale comforta con ele. Ya habla le con Dios: “Si kamali el cosa tu ta mira, O Jah, O Jehova, quien puede para? Cay etu deverasan ta perdona, para tiene hondo respeto el maga gente contigo.”​—Salmo 130:3, 4.

•   Esperanza. Puera que ta dale le comforta kanaton ahora, el Dios ya promete que hay quita le todo problema que ta causa tristeza na maga gente. Si cumpli ya le se de suyu promesa, “el maga cosas de antes [incluido el depression] gendeh mas acorda y perde ya este na corazon.”​—Isaias 65:17.

 Nota: Maskin ta creé kame que ta dale ayuda el Dios, el maga Testigo de Jehova quien tiene clinical depression ta anda siempre manda chequia na doctor y ta acepta curada medical. (Marcos 2:17) Pero, gendeh kame ta recomenda maskin cosa especifico clase de cura; el cada individual debe hace de suyu decision acerca con ese.