El Biblia ta dale kanaton buen guia para puede hace maga buen decision. Puede este ayuda kanaton para “saca sabeduria, [y] saca entendimiento.” (Proverbio 4:5) Na cuanto situacion, ta menciona este si cosa el de con todo buen decision. Mientras tiene vez, ta dale este kanaton consejo que puede guia kanaton para hace maga buen decision.

Na este articulo

•  Maga sugestion que puede ayuda contigo para hace buen decision

•  Debe ba yo cambia con el decision que ya hace yo?

•  Paquemodo si ya hace yo un gendeh justo decision que gendeh mas yo puede cambia?

•   No apura hace un decision. El Biblia ta habla: “El sabio ta pensa antes hace paso.” (Proverbio 14:15) Si apura tu hace un decision, posible que gendeh tu puede considera con el cuanto importante informacion. Dale tiempo para considera enbuenamente con el de tuyu maga posible decision.—1 Tesalonica 5:21.

•   No hace maga decision que base lang na de tuyu emocion. El Biblia ta habla que gendeh kita puede pirmi confia con el diaton corazon. (Proverbio 28:26; Jeremias 17:9) Por ejemplo, posible gendeh kita puede hace buen decision si rabiao kita, depress, maluya, ta perde el paciencia o bien cansao.—Proverbio 24:10; 29:22.

•   Reza para pidi sabeduria. (Santiago 1:5) Alegre el Dios contesta ansina clase de maga rezo. Un amable Tata le quien quierre que el de suyu maga anak puede evita maga problema. “Si Jehova mismo el ta dale sabeduria; estaba na de suyu boca el saber y entendimiento.” a (Proverbio 2:6) Ta dale le ese sabeduria por medio na de suyu Palabra, el Biblia.—2 Timoteo 3:16, 17.

•   Man research. Para puede hace buen decision, necesita tu maga informacion que puede tu confia. Como ta habla el Biblia, “el un sabio persona ta oi y ta saca pa mas instruccion.” (Proverbio 1:5) Onde tu puede incuntra maga informacion que puede ayuda contigo?

   Una, mira si cosa ta habla el Biblia acerca na de tuyu situacion. Ciendo sabe el diaton Creador si cosa el de con todo bueno para kanaton, puede kita confia con el consejo na de suyu Palabra. (Salmo 25:12) Para na cuanto maga decision, el Biblia claro ta habla si cosa kita debe hace por medio na maga mandamiento o ley. (Isaias 48:17, 18) Pero na cuanto maga situacion, nuay cosa especifico ta habla el Biblia. Sino, ta dale este kanaton guia por medio na maga principio. Puede se ayuda kanaton para hace un buen decision maskin pa diferente se na decision del otro. Para puede incuntra maga texto que puede ayuda kanaton, man research na maga articulo o publicacion que base na Biblia igual na maga material que puede kita incuntra na este website. b

   Para na cuanto maga decision, posible necesita tu examina con el otro pa maga referencia donde puede tu incuntra maga informacion que puede tu confia. Por ejemplo, antes cumpra un producto, especialmente si caro este, mas bueno si man research tu acerca na producto y na manufacturer, incluido ya el maga warranty y return policy de este. Siempre, debe tambien tu asigura que amo gayot quel el producto que necesita tu.

   “Ta falla el maga plano si gendeh ta consulta,” ya habla el Biblia. (Proverbio 15:22) Poreso antes hace un decision, consulta con el cuanto maga individual que puede tu confia. Por ejemplo, mas bueno si consulta tu un doctor antes hace un medical decision. (Mateo 9:12) Na cuanto situacion, puede tu man cuento con aquellos quien ya enfrenta semejante problema. Pero debe tu acorda que etu el debe hace con el decision y enfrenta con el maga consequencia—gendeh aquellos con quien tu ya consulta.—Galacia 6:4, 5.

•   Considera anay con el todo cosas acerca na de tuyu decision. Despues saca maga informacion, puede tu hace un lista de maga posible decision y el maga buen y mal resulta del cada uno. Y queda honesto si cosa el maga posible consequencia del de tuyu decision. (Deuteronomio 32:29) Por ejemplo, paquemodo el de tuyu decision posible afecta contigo, con el de tuyu familia o con otro? (Proverbio 22:3; Roma 14:19) Si pensa tu acerca na ese maga pregunta y con el maga principio na Biblia, puede se ayuda contigo para hace un buen decision.

•   Hace decision. Tiene vez, tan alang-alang kita hace un decision cay gendeh kita asigurao. Pero si gendeh kita hace decision, posible man sayang el un oportunidad o guinda kita na un situacion que no quierre kita. Quierre decir, si gendeh kita hace decision, posible que dol ya hace lang kita un mal decision. Para ayuda kanaton entende con este, el Biblia ya usa un ilustracion acerca na siembrada. Este ta habla: “Si espera pa tu que queda enbuenamente el viento y el tiempo, nunca tu puede siembra maskin cosa ni cosecha maskin cosa.”—Eclesiastes 11:4, Good News Translation.

 Acorda tambien que maskin bien bueno el un decision, posible que gendeh siempre se perfecto. Si ta hace decision, mas mucho tiene kita cosa necesita sacrificia. Posible tambien que tiene maga cosas sucede que gendeh kita ta expecta. (Eclesiastes 9:11) Poreso considera con el maga informacion que tiene tu. Despues, iscuji un decision que tiene grande posibilidad que tene buen exito.

 Tiene maga decision que puede kita cambia. Posible ya cambia el de tuyu circumstancia o ya puede tu realiza que tiene gendeh buen resulta el de tuyu decision. Poreso, mas bueno si considera tu otravez con el situacion y hace otro decision que posible tene mas buen resulta.

 Pero, tiene tambien maga decision que gendeh debe cambia. (Salmo 15:4) Por ejemplo, el Dios ta expecta que el maga man maridable hay cumpli con el diila promesa de matrimonio. c (Malaquias 2:16; Mateo 19:6) Si tiene maga problema na matrimonio, debe sila hace el todo para solva con ese y gendeh basta ya lang deja con el diila marido o mujer.

 Todo kita posible puede hace gendeh justo o mal decision. (Santiago 3:2) Posible pa gane kita arripinti o man mahay, y normal lang se. (Salmo 69:5) Tiene vez, bueno se para gendeh mas kita puede hace otravez con el igual kamali! (Proverbio 14:9) Pero, el Biblia ta habla que gendeh kita debe sobra man conciencia cay puede se tene mal efecto na diaton pensamiento o emocion. (2 Corinto 2:7) d El Biblia ya habla: “Si Jehova lastimoso y tiene compasion.” (Salmo 103:8-13) Poreso, mira si cosa leccion tu puede aprende na ese mal decision y hace esfuerzo para compone con ese.