Si. Maskin pa el Biblia gendeh un libro de ciencia, justo el cosa este ta habla acerca na ciencia. Considera con el cuanto ejemplo donde ta dale mira que harmonia el ciencia y el Biblia, y que el Biblia ta contene maga justo idea acerca na ciencia que bien diferente na cosa ta creé el manada gente na tiempo que ya escribi con este.

•   Tiene principio el universo. (Genesis 1:1) Pero asegun na maga istoria del maga gente de antes, nuay crea con el universo sino ya forma lang este estaba na maga cosas trambulicao. El maga de Babilonia ya creé que el maga dios quien ya hace con el universo ya sale estaba na dos mar. El otro maga istoria tambien ta habla que el universo estaba na un bien grande huevos.

•   Cada dia, el maga law of nature amo el ta controla con el universo y gendeh si cosa lang ta pensa el maga dios-dios. (Job 38:33; Jeremias 33:25) El maga istoria ta enseña que nuay cosa puede hace el maga gente si el maga dios, quien tiene vez nuay lastima, bigla lang rabia.

•   El mundo nuay onde tan bitay. (Job 26:7) Ta creé el maga gente de antes que el mundo patag lang y ta suporta con este el un gigante o un animal, igual na un buffalo o un bau.

•   El agua na maga rio estaba na mar y na otro pa maga tuburan de agua que yan evaporate y ya cae otravez na tierra como ulan, nieve o ulan de hielo. (Job 36:27, 28; Eclesiastes 1:7; Isaias 55:10; Amos 9:6) El maga Griego de antes ya creé que el maga agua na maga rio estaba na mar que ta pasa abajo del tierra y ya continua creé con este el maga gente hasta del maga 300 año ya el ya pasa.

•   El maga monte ta subi y ta abaja, y el maga monte ahora abajo del mar de antes. (Salmo 104:6, 8) Pero asegun na cuanto istoria, ansina ya daan ya crea con el monte el maga dios.

•   El limpieza importante na salud. Incluido na Ley que ya dale na nacion del Israel amo laba despues agarra muerto, man quarantine con aquellos tiene contagioso enfermedad y entera con el suciu del gente. (Levitico 11:28; 13:1-5; Deuteronomio 23:13) Pero cuando ya dale con este maga mandamiento, el maga Egipcio ta mezcla con el suciu del gente na medicina para hace pahid na irida.

 Nuay, si examina kita enbuenamente con el Biblia. Taqui el cuanto gendeh justo idea que ta clama el otro que ta habla el Biblia acerca na ciencia:

 Falso: Ta habla el Biblia que ya crea con el universo adentro na seis dia de 24 hora.

 Verdad: Nuay habla el Biblia si cuando exacto ya crea el Dios con el universo. (Genesis 1:1) Mas pa, el maga dia de creacion que ya menciona na capitulo 1 del Genesis amo maga tiempo que nuay especifico largor. Gane, el entero tiempo cuando ya crea con el tierra y cielo ta llama tambien “dia.”​—Genesis 2:4.

 Falso: El Biblia ta habla que una ya crea con el maga siembra para sucede el proceso de photosynthesis.​—Genesis 1:11, 16.

 Verdad: El Biblia ta dale mira que una ya crea con el sol, uno del maga estrellas na “cielo,” que con el maga siembra. (Genesis 1:1) El claridad que estaba na sol ya llega na tierra durante el primer “dia” o tiempo del creacion. Mientras ta queda claro el atmosfera na ika-tres “dia” del creacion, ya queda fuerte el claridad del sol que bastante para suporta con el photosynthesis. (Genesis 1:3-5, 12, 13) Na uliji pa mas ya queda claro el sol na tierra.​—Genesis 1:16.

 Falso: El Biblia ta habla que el sol ta bira alrededor del mundo.

 Verdad: El Eclesiastes 1:5 ta habla: “El sol ta subi y el sol ta abaja; despues ta bira este dayun na lugar onde este subi otravez.” Pero, ese maga palabra ta dale lang mira con el movimiento del sol que puede mira estaba na tierra. Maskin ahora, el un persona puede usa con el maga palabra “subida del sol” y “sumida del sol” pero sabe le que el mundo ta bira alrededor del sol.

 Falso: El Biblia ta habla que patag el tierra.

 Verdad: El Biblia ya usa con el frase “fin del Mundo” que quierre decir hasta na de con todo lejos parte del mundo. Este gendeh quierre decir que patag el mundo o tiene punta. (Maga Actividad 1:8) Na igual manera, el expresion “cuatro canto del tierra” gendeh quierre decir que el tierra tiene cuatro canto. Si le con este expresion, puede kita entende que ta refiri este con el entero mundo.​—Isaias 11:12; Lucas 13:29.