El contestacion del Biblia

 El bautismo quierre decir que hace sumi y hace sale con el un persona na agua. a Manada bautismo el ya menciona na Biblia. (Maga Actividad 2:41) Y uno alli amo el bautismo de Jesus quien ya bautiza na Rio de Jordan. (Mateo 3:13, 16) Despues del cuanto año, un hombre de Etiopia el ya bautiza “donde tiene agua” que cerca na camino donde sila ta viaja.—Maga Actividad 8:36-40, El Nuevo Testamento na Chavacano.

 Si Jesus ya enseña que necesita bautiza el de suyu maga siguidores. (Mateo 28:19, 20) Ya menciona tambien se si apostol Pedro.—1 Pedro 3:21.

Na este articulo

•  Cosa quierre decir del bautismo?

•  Cosa ta habla el Biblia acerca na bautismo na maga baby?

•  Cosa quierre decir que bautiza na nombre del Tata, del Anak y del sagrao espiritu?

•  Culpa ba si bautiza otravez?

•  Otro maga bautismo que ya menciona na Biblia

•  Maga gendeh justo idea acerca na Cristiano bautismo

 Cosa quierre decir del bautismo?

 Si ta bautiza el un persona, ta dale le mira con otro que ya arripinti ya le na de suyu maga culpa y ya promete que hace le el voluntad del Dios maskin cosa man sucede. Incluido aqui amo que pirmi le obedece con Dios y con Jesus na todo aspeto del de suyu vida. Si ya bautiza ya el un persona, tiene ya le el oportunidad para obtene vida eterna.

 El bautismo del un persona na agua amo un bonito simbolo para dale mira el cambio que ya hace le na de suyu vida. Paquemodo? El Biblia ya compara con el bautismo na intierro. (Roma 6:4; Colosa 2:12) Si ta hace sumi con el un persona na agua, tan simbolo se con el de suyu muerte na de suyu daan manera de vida. Si ya sale ya le na agua, ta dale quel mira que principia ya le un nuevo vida como un Cristiano que dedicao con Dios.

 Cosa ta habla el Biblia acerca na bautismo na maga baby?

 Nuay menciona o enseña na Biblia el idea que bautiza con el maga baby. b

 El bautismo na maga baby gendeh harmonia na cosa ta habla el Biblia. Ta enseña el Biblia que tiene cosa debe hace el un persona quien quierre bautiza. Por ejemplo, debe le entende con el cuanto maga importante enseñanza na Palabra del Dios y vivi harmonia con ese, arripinti na de suyu maga culpa y por medio na rezo, dedica el de suyu vida con Dios. (Maga Actividad 2:38, 41; 8:12) El maga baby gendeh puede hace con este maga cosas.

 Cosa quierre decir que bautiza na nombre del Tata, del Anak y del sagrao espiritu?

 Ya manda si Jesus con el de suyu maga siguidores: “Hace maga dicipulo. . . . Bautiza canila na Nombre del Tata y del Anak y del Espiritu Santo [“sagrao espiritu,” NWT], y insiña canila obedece todo el que ya manda yo con ustedes.” (Mateo 28:19, 20) El maga palabra “na Nombre del” quierre decir que el persona quien bautiza ta entende y ta acepta con el autoridad y posicion del Tata, del Anak y tambien el papel del sagrao espiritu del Dios. Para ilustra: Si apostol Pedro ya habla con el un hombre quien piang desde bata: “Na Nombre de Jesucristo de Nazaret, camina tu!” (Maga Actividad 3:6) Claro que ya entende y ya acepta si Pedro con el autoridad del Cristo y ya creé que el Cristo el ya cura con este.

•   El “Tata” ta refiri con Dios Jehova. c Como diaton Creador, el quien ya dale kanaton vida y el Todopoderoso Dios, si Jehova el tiene de con todo alto autoridad.—Genesis 17:1; Revelacion 4:11.

•   El “Anak” amo si Jesucristo quien ya dale el de suyu vida para kanaton. (Roma 6:23) Gendeh kita puede tene el salvacion si gendeh kita acepta y aprecia el papel de Jesus na proposito del Dios para na maga gente.—Juan 14:6; 20:31; Maga Actividad 4:8-12.

•   El “Espiritu Santo” o sagrao espiritu amo el activo fuerza del Dios. d El Dios ya usa con el de suyu sagrao espiritu para crea, dale vida, hace alcanza el de suyu mensaje na de suyu maga profeta y dale kanila fuerza para hace de suyu voluntad. (Genesis 1:2; Job 33:4; Roma 15:18, 19) Ya usa tambien el Dios con el de suyu sagrao espiritu para guia con el maga escritor del Biblia que escribi con el de suyu mensaje.—2 Pedro 1:21.

 Culpa ba si bautiza otravez?

 Manada maga gente el ta decidi que cambia con el diila religion. Pero paquemodo si ya bautiza sila na diila daan religion? Hay comete ba sila culpa si bautiza sila otravez? Manada ta habla si; cay ese daw el cosa ta menciona na Efeso 4:5. Este ta habla: “Uno lang el Señor, uno lang el fe, uno lang el bautismo.” Pero, este versiculo gendeh quierre decir que gendeh ya puede bautiza otravez el un persona. Porque?

 Contexto. Na contexto del Efeso 4:5, ta hace claro si apostol Pablo que el maga verdadero Cristiano debe unido na cosa sila ta creé. (Efeso 4:1-3, 16) Queda lang se posible si na igual Señor lang sila ta sigui, con Jesucristo; tiene sila igual fe o entendimiento na cosa ta enseña el Biblia; y igual lang sila ta sigui principio na Biblia acerca si cosa el necesita para na bautismo.

 Si apostol Pablo ya anima con el cuanto quien ya bautiza ya que bautiza otravez. Por causa se cay bautizao sila que nuay el justo entendimiento na enseñanza de Jesus.—Maga Actividad 19:1-5.

 El justo basejan para na bautismo. Para queda aceptable con Dios, el bautismo debe base na exacto saber acerca na verdad na Biblia. (1 Timoteo 2:3, 4) Si ya bautiza ya el un persona base na enseñanza que tan contra na Biblia, gendeh acepta el Dios con el de suyu bautismo. (Juan 4:23, 24) Maskin sincero el un persona, nuay siempre le bautiza asegun “na deverasan saber.” (Roma 10:2) Para puede tene el favor del Dios, necesita le aprende con el verdad na Biblia, aplica con el cosa le ya aprende, dedica de suyu vida con Dios y bautiza otravez. Na este maga situacion, gendeh culpa si bautiza le otravez. El deverasan, este el justo cosa que debe hace.

 Otro maga bautismo que ya menciona na Biblia

 Tiene maga bautismo na Biblia que otro el quierre decir. Considera con este cuanto ejemplo.

 Bautismo que ya hace si Juan Bautista. e Ya manda bautiza el maga Judio y maga Judio proselita con Juan para dale mira que ta arripinti ya sila na maga culpa que ya comete sila contra na Ley de Moises—el Ley que ya dale el Dios con Moises para na maga Israelita. El bautismo que ya hace si Juan ya prepara con el maga gente para conoce y acepta con el Mesias que si Jesus de Nazaret.—Lucas 1:13-17; 3:2, 3; Maga Actividad 19:4.

 Bautismo de Jesus. Diferente el bautismo de Jesus contra na otro. Un perfecto gente si Jesus y nuay comete maga culpa. (1 Pedro 2:21, 22) Poreso gendeh ya le necesita arripinti o “pidi con Dios un conciencia limpio.” (1 Pedro 3:21) Sino, ta dale este mira que ta presenta le el de suyu mismo cuerpo para hace el voluntad del Dios como el Mesias o Cristo. Incluido alli amo que dale le el de suyu vida para kanaton.—Maga Hebreo 10:7-10.

 Bautismo por medio na sagrao espiritu. Si Juan Bautista y si Jesucristo ya menciona acerca na bautismo por medio na sagrao espiritu. (Mateo 3:11; Lucas 3:16; Maga Actividad 1:1-5) Pero, diferente se na bautismo na nombre del sagrao espiritu. (Mateo 28:19) Porque?

 Limitao lang el numero del maga siguidores de Jesus que ya bautiza por medio na sagrao espiritu. Ya iscuji kanila por medio el sagrao espiritu para sirvi junto con Jesus na cielo como rey y sacerdote. f (1 Pedro 1:3, 4; Revelacion 5:9, 10) Hay rula sila con el millones siguidores de Jesus que tiene el esperanza de vida eterna na Paraiso tierra.—Mateo 5:5; Lucas 23:43.

 Bautismo na persona del Cristo y na de suyu muerte. Aquellos quien ya bautiza por medio na sagrao espiritu ‘ya bautiza tambien na persona del Cristo.’ (Roma 6:3) Entonces, este bautismo aplicable lang na maga iscujido siguidores de Jesus quien hay rula junto con ele na cielo. Cay ya bautiza ya kanila na persona del Cristo, hay queda ya sila miembro del de suyu iscujido congregacion. Si Jesus el Cabeza y sila el cuerpo.—1 Corinto 12:12, 13, 27; Colosa 1:18.

 El maga iscujido ‘ya bautiza tambien na muerte de Jesus.’ (Roma 6:3, 4) Igual con Jesus, tan focus sila que obedece con Dios y sabe sila que gendeh sila vivi hasta para cuando aqui na tierra. Hay completa este simbolico bautismo si muri sila y resucita na cielo como maga espiritu creatura.—Roma 6:5; 1 Corinto 15:42-44.

 Bautismo por medio na fuego. Si Juan Bautista ya habla con aquellos quien ta oi con ele: “Ay bautiza con ustedes con [sagrao espiritu] y con fuego. Tiene [si Jesus] na mano el disuyo vintiador y ay limpia le el disuyo patio: ay recugi le el trigo y ay icha na su tambobo, pero el ipa ay quema le na fuego que gendeh ta apaga.” (Mateo 3:11, 12) Nota que diferente el bautismo por medio na fuego y por medio na sagrao espiritu. Cosa quierre decir de este maga ilustracion de Juan?

 El trigo ta representa con aquellos quien oi y obedece con Jesus. Tiene sila el oportunidad para bautiza por medio na sagrao espiritu. El ipa tambien ta representa con aquellos quien gendeh oi con Jesus. Hay bautiza kanila por medio na fuego, quierre decir hay destroza kanila hasta para cuando.—Mateo 3:7-12; Lucas 3:16, 17.