El Biblia amo un coleccion de 66 sagrao libro. Ya escribi con este adentro de maga 1,600 año. El Biblia ta contene el mensaje estaba con Dios poreso ta llama con este el “palabra del Dios.”—1 Tesalonica 2:13, El Nuevo Testamento na Chavacano.

Na este articulo

•  Maga verdad acerca na Biblia

•  Acerca na cosa el Biblia?

•  Ya cambia ba con el mensaje del Biblia?

•  Porque tiene bien manada translation del Biblia?

•  Quien el ya decidi si cosa debe el inclui na Biblia?

•  Tiene ba maga libro del Biblia que ya perde?

•  Si paquemodo busca texto na Biblia

•  Lista del maga libro del Biblia

•   Quien ya escribi con el Biblia? El Dios amo el Autor del Biblia pero ya usa le maga 40 gente para escribi con este. El cuanto kanila amo kanda Moises, Rey David, Mateo, Marcos, Lucas y Juan. a Ya pone el Dios el de suyu mensaje na pensamiento del maga escritor para puede sila escribi con este.—2 Timoteo 3:16.

   Para ilustra: Si el un negociante ya manda con el de suyu secretario que escribi un carta, maskin pa idea lang el cosa le ya dale, ele siempre el autor del de suyu carta. Na igual manera, maskin pa ya usa el Dios maga gente para escribi con el de suyu mensaje, ele siempre el deverasan Autor del Biblia.

•   Cosa quierre decir del palabra “Biblia”? Estaba este na Griego palabra biblia que quierre decir “maga diutay libro.” Na uliji, ta usa ya con el palabra biblia para refiri con el entero coleccion de maga diutay libro que ya ajunta que conocido ahora como el Biblia.

•   Del cuando ya escribi con el Biblia? Ya principia escribi con este del 1513 B.C.E. y ya completa mas de 1,600 año despues, del maga 98 C.E.

•   Onde ya el original Biblia ahora? Nuay original copia del Biblia el ya puede sobrevivi. Por causa este cay ya usa el maga escritor del Biblia maga materiales na aquel tiempo que tan buluk, igual na papiro y maga pellejo de animal. Pero por cuanto siglo, con cuidao ya hace maga copia del Biblia el maga escriba para puede siempre le el maga gente con el contenido de este na futuro.

•   Cosa el “Daan Testamento” y el “Nuevo Testamento”? El cosa comon ta llama como el Daan Testamento amo el parte del Biblia que ya escribi mayoria na Hebreo b y conocido tambien como el Hebreo Escritura. El cosa tambien ta llama el otro como el Nuevo Testamento ta refiri con el seccion que ya escribi na Griego que conocido como el Cristiano Griego Escritura. Ya hace junto con ese dos seccion para queda un completo libro que ta llama tambien el Sagrao Escritura. c

•   Cosa el laman del Biblia? El Biblia ta contene maga historia, ley, profecia, proverbio, cancion y maga carta.—Mira con el “ Lista del maga libro del Biblia.”

 Na principio del Biblia, ta menciona si paquemodo el Todopoderoso Dios ya crea con el cielo y con el tierra. Por medio na Biblia, ya introduci le con el de suyu nombre, Jehova, y ta invita con el maga gente que conoce con ele.—Salmo 83:18.

 El Biblia ta explica que ya hace malo con el reputacion del Dios y ta dale este mira si paquemodo le hace bira con el de suyu buen reputacion.

 Ta revela el Biblia con el proposito del Dios para na maga gente y con el tierra. Ta dale este mira si paquemodo el Dios hay quita na futuro con el maga cosas que ta causa sufrimiento na maga gente.

 El Biblia ta contene maga practical consejo que puede usa na cada dia vida. El cuanto de este amo:

•   Mentena buen relacion con otro. “Hace con otros el cosa ustedes quiere que sila ay hace con ustedes.”—Mateo 7:12.

   Si cosa quierre decir: Debe kita trata con otro na manera que quierre kita que trata kanaton.

•   No sobra man lingasa. “No ustedes man lingasa ahora si cosa ay pasa mañana, cay mañana otro el lingasa.”—Mateo 6:34.

   Si cosa quierre decir: En vez por demas man lingasa acerca na cosa posible sucede na futuro, mas bueno si man focus kita na diaton presente situacion.

•   Tene un alegre matrimonio. “Cada uno de ustedes necesita ama con el disuyo mujer como ta ama le con el disuyo mismo cuerpo. Y el mujer necesita respeta con el disuyo marido.”—Efeso 5:33.

   Si cosa quierre decir: Importante el amor y respeto para tene un alegre matrimonio.

 Nuay. Ya compara enbuenamente el maga scholar con el maga manuscrito del Biblia de antes na maga moderno Biblia y ya puede sila mira que nuay cambia el original mensaje de este. Ciendo quierre el Dios que puede le y entende el maga gente con el de suyu mensaje, gendeh ba razonable lang que asigura le que gendeh cambia el mensaje del Biblia? d—Isaias 40:8.

 Mayoria del maga gente ahora gendeh ta entende con el lengguaje del Biblia de antes. Pero tiene este “buen noticia” para na “todo nacion, raza, lenguaje y pais.” (Revelacion 14:6) Por causa con ese, necesita el maga gente un translation del Biblia na lengguaje que ta entende sila para puede sila le y entende enbuenamente con el mensaje del Dios.

 Tiene tres clase de translation del Biblia:

•   Palabra por palabra: Un literal translation del cada palabra si posible.

•   Idea por idea: Un translation que ta usa maga palabra que ta representa si cosa quierre decir del texto na original lengguaje.

•   Paraphrase: Un manera de translation que basta lang ta cambia con el maga palabra para bale con este le. Pero, este manera de translation tiene vez ta cambia con el deverasan mensaje del texto.

 El un buen translation del Biblia ta usa na balance manera con el literal translation usando el maga palabra que facil para entende para hace pasa el exacto mensaje del Dios para na maga gente. e

 Como el Autor de este, el Dios el ya decidi si cosa el inclui na Biblia. Del primero, con el nacion de Israel le ya encarga o “ya dale el mensaje del Dios” y sila el ya preserva con el Hebreo Escritura.—Roma 3:2.

 Nuay. Completo el Biblia y nuay maga libro el ya perde. El cuanto ta clama que tiene maga libro que ya dura ya escondido que debe queda incluido na Biblia. f Pero, el Biblia ta contene el de este mismo basejan si debe ba inclui con el un libro o gendeh. (2 Timoteo 1:13) Por medio de este, el maga libro que inspirao del Dios harmonia na uno y otro. Gendeh ansina el otro maga libro que ta clama el cuanto que parte daw del Biblia. g