El palabra “cielo” que ta usa na Biblia ta refiri na tres cosas: (1) el fisical cielo; (2) el lugar onde ta queda el maga espiritu creatura; y (3) ta representa un alto posicion. Cada vez ta usa con este palabra, el contexto ta ayuda para determina si cosa este quierre decir. a

1.   El fisical cielo. El palabra “cielo” ta refiri con el atmosfera del tierra donde ta bula el viento, ta bula el maga pajaro, el maga celaje ta produci ulan y nieve, y si donde tan kirlat. (Salmo 78:26; Proverbio 30:19; Isaias 55:10; Lucas 17:24) Puede tambien este refiri con el outer space—si onde el “sol, luna y maga estrellas.”​—Deuteronomio 4:​19; Genesis 1:1.

2.   El lugar onde ta queda el maga espiritu creatura. El termino “cielo” puede tambien refiri con el espiritual cielo o el lugar onde ta esta el maga espiritu creatura. Apuera este del fisical universo y mas alto contra con ese. (1 Rey 8:​27; Juan 6:​38) Alli ta queda si Dios Jehova que un “Espiritu” y el maga angel con quien le ya crea. (Juan 4:​24; Mateo 24:36) Tiene vez, “el maga cielo” ta refiri tambien con el maga fiel angel, el “congregacion del maga sagrao.”​—Salmo 89:​5-7.

    El Biblia ta usa tambien con el palabra “cielo” para refiri con el especifico lugar na cielo “onde . . . ta queda” si Jehova. (1 Rey 8:​43, 49; Maga Hebreo 9:​24; Revelacion 13:6) Por ejemplo, ya habla el Biblia que hay quita na cielo con Satanas y con el de suyu maga demonio y gendeh mas kanila permiti anda na presencia de Jehova. Pero, na cielo siempre sila.​—Revelacion 12:​7-9, 12.

3.   Ta representa un alto posicion. El Escritura ta usa con el palabra “cielo” para refiri na un alto posicion, mas mucho na un autoridad que ta rula. Posible que el siguiente tiene ese posicion:

   •   Si Dios Jehova mismo como el de con todo poderoso Soberano.​—2 Cronicas 32:20; Lucas 15:21.

   •   El Reino del Dios, el gobierno que hay cambia con el todo gobierno del maga gente. El Biblia ta refiri con este Reino como el “nuevo cielo.”​—Isaias 65:17; 66:22; 2 Pedro 3:​13. b

   •   Maga Cristiano na tierra quien tiene esperanza que anda na cielo.​—Efeso 2:6.

   •   El maga gobierno del gente que ya hace alto con el diila mismo cuerpo contra con aquellos quien bajo na diila poder.​—Isaias 14:12-​14; Daniel 4:​20-​22; 2 Pedro 3:7.

   •   Maga mal espiritu quien ta rula ahora na mundo.​—Efeso 6:​12; 1 San Juan 5:​19.

Cosa tiene na cielo?

 Bien manada el cosa ta hace na cielo. Alli ta queda el millones de maga espiritu creatura “quien ta cumpli con el . . . palabra” de Jehova.​—Salmo 103:20, 21; Daniel 7:​10.

 El Biblia ya menciona que tiene bien arde claridad na cielo. (1 Timoteo 6:​15, 16) Ya mira si profeta Ezequiel na un vision que el cielo tiene “brillante luz” y si Daniel ya mira na un vision que el cielo tiene “rio de fuego.” (Ezequiel 1:​26-​28; Daniel 7:​9, 10) Sagrao, limpio y bonito el cielo.​—Salmo 96:6; Isaias 63:15; Revelacion 4:​2, 3.

 Bonito gayot el cielo como cosa ya menciona el Biblia. (Ezequiel 43:​2, 3) Pero, por causa na limitacion del maga gente, gendeh gayot kita completamente puede entende si cosa el cielo.