Cosa el Ichura de Jesus?

MAN PLAY

El contestacion del Biblia

Nuay quien sabe si cosa gayot el ichura de Jesus ciendo nuay este menciona na Biblia. Ta dale este mira que gendeh importante el fisical ichura de Jesus. Pero, puede kita aprende cuanto cosas na Biblia acerca na forma de Jesus.

Ichura: Un Judio si Jesus y posible ya hereda le el Semitico ichura del de suyu nana. (Maga Hebreo 7:14) Posible, ta semeja lang le con otro. Gane na un ocasion, ya puede le viaja estaba na Galilea para na Jerusalem que nuay quien ya gole. (Juan 7:10, 11) Y grande el posibilidad que gendeh le bien diferente na de suyu maga cerca dicipulo. Acorda que cuando ya arresta con Jesus el un armao grupo, necesita pa si Judas Iscariote identifica si onde ele.—Mateo 26:47-49.
Largor del pelo: Grande el posibilidad que gendeh largo el pelo de Jesus cay el Biblia ta habla que “el largo pelo amo un verguenza para con el hombre.”—1 Corinto 11:14.
Barbas: Tiene barbas si Jesus. Ya sigui le con el ley del maga Judio que ta prohibi con el maga adulto hombre que ‘destroza con el punta del diila barbas.’ (Levitico 19:27; Galacia 4:4) Mas pa, el Biblia ya menciona con el barbas de Jesus na un profecia acerca na de suyu sufrimiento.—Isaias 50:6.
Cuerpo: El maga cosas que ya habla na Biblia acerca con Jesus ta dale mira que mafuerza ele. Durante el de suyu ministerio, ya viaja le manada kilometro. (Mateo 9:35) Dos beses le ya limpia con el templo del maga Judio, ya hace baliscat con el maga mesa del maga quien ta cambia sen y una vez ya buga con el maga animal usando el latigo. (Lucas 19:45, 46; Juan 2:14, 15) El Cyclopedia de McClintock y Strong ta habla: “El todo cosa ta habla na Evangelio ta dale mira que mafuerza [si Jesus] y tiene buen salud.”—Volume IV, pagina 884.
Expresion del cara: Amable si Jesus y tiene compasion, y asigurao puede se mira na expresion del de suyu cara. (Mateo 11:28, 29) El todo clase de gente ta atraca con ele para pidi comforta y ayuda. (Lucas 5:12, 13; 7:37, 38) Maskin el maga bata comfortable junto con ele.—Mateo 19:13-15; Marcos 9:35-37.

Maga gendeh justo idea acerca na ichura de Jesus

Gendeh justo idea: El cuanto ta habla que ya sale si Jesus na raza del maga Africano cay el libro de Revelacion ta compara con el de suyu pelo na pelo de carnero y el de suyu pies “ta brilla igual na puro bronce.”—Revelacion 1:14, 15, NWT.

Verdad: El libro de Revelacion ta presenta por medio “na maga señal.” (Revelacion 1:1, NWT) El cosa ya escribi acerca na pelo y pies de Jesus amo maga simbolico termino para ilustra con el maga calidad de Jesus despues con ele resucita y gendeh con el de suyu fisical ichura cuando taqui ele na tierra. Cuando ya menciona que “blanco el de suyu cabeza y pelo igual na blanco pelo de carnero igual na nieve,” nota que el Revelacion 1:14 ya usa el color, gendeh el clase de pelo. Ta representa este con el de suyu sabeduria por causa na de suyu edad. (Revelacion 3:14) Este versiculo nuay compara con el clase del pelo de Jesus na pelo del carnero o na nieve.

El pies de Jesus “ta brilla igual na puro bronce estaba na fuego.” (Revelacion 1:15, NWT) Mas pa, el de suyu cara “igual como el sol ta brilla gayot.” (Revelacion 1:16) Ciendo nuay raza el tiene color de pellejo que igual con este, asigurao que simbolico este vision que ta dale mira con Jesus quien ya resucita como el “quien ta queda na un claridad donde noay quien ta puede atraca.”—1 Timoteo 6:16.

Gendeh justo idea: Maluya y mahina si Jesus.

Verdad: Puede mira na accion de Jesus que deverasan le hombre. Por ejemplo, con animo le ya identifica con el de suyu mismo cuerpo con el maga armao grupo quien ya anda para arresta con ele. (Juan 18:4-8) Asigurao, mafuerza tambien si Jesus ciendo ta trabaja le como un carpintero y ta usa maga herramienta que necesita fuerza.—Marcos 6:3.

Entonces, porque necesita ayuda si Jesus para carga el de suyu estaca? Y porque le una ya muri que con aquellos junto con ele na estaca? (Lucas 23:26; Juan 19:31-33) Corto tiempo antes con ele mata, bien maluya ya el de suyu cuerpo. Dispierto le entero noche; el un razon amo cay malingasa ele. (Lucas 22:42-44) Durante el noche, ya maltrata con ele el maga Judio y pagka-alamañana ya hace con ele pasipala el maga Romano. (Mateo 26:67, 68; Juan 19:1-3) Ese maga cosas amo posible el razon si porque le pronto ya muri.

Gendeh justo idea: Pirmi triste si Jesus.

Verdad: Ya puede gayot reflecta si Jesus con el maga calidad del de suyu Tata na cielo, si Jehova, con quien el Biblia ya llama como el “alegre Dios.” (1 Timoteo 1:11, NWT; Juan 14:9) Gane, ya enseña si Jesus con otro si paquemodo queda alegre. (Mateo 5:3-9; Lucas 11:28) Este maga verdad ta indica que pirmi puede mira na cara de Jesus que alegre le.