El pecado amo el maskin cosa accion, sentido o pensamiento que contra na maga principio del Dios. Incluido aqui que desobedece con el maga ley del Dios por medio que hace cosas malo, o gendeh recto, na vista del Dios. (1 San Juan 3:4; 5:17) Ya menciona tambien el Biblia que un pecado si sabe el un persona si cosa el justo pero gendeh ta hace con ese.—Santiago 4:17.

 Na maga original lengguaje del Biblia, el maga palabra para na pecado quierre decir “gendeh tupa con el cosa ta asenta.” El un grupo de maga soldao na Israel de antes bien bueno gayot sila na guerriada piedra que “gendeh ta falla.” Ese expresion, si literal man translate, puede queda “gendeh culpa.” (Juez 20:16) Entonces, para culpa quierre decir que gendeh puede alcanza con el maga perfecto principio del Dios.

 Como el Creador, tiene derecho el Dios para establicia maga principio para na maga gente. (Revelacion 4:11) Responsable kita con ele na diaton maga accion.—Roma 14:12.

Posible ba que evita completamente comete culpa?

 Gendeh. El Biblia ya habla que el “todo . . . ya peca y ya perde el gloria del Dios.” (Roma 3:23, El Nuevo Testamento na Chavacano; 1 Rey 8:46; Eclesiastes 7:20; 1 San Juan 1:8) Porque?

 El primer maga gente, si Adan y Eva, nuay pecado del primero. Por causa se cay ya crea kanila perfecto, na imagen del Dios. (Genesis 1:27) Pero cay ya desobedece sila con Dios, ya queda sila imperfecto. (Genesis 3:5, 6, 17-19) Cuando ya tiene sila maga anak, ya hereda sila el pecado y imperfeccion na diila mayores. (Roma 5:12) Igual como cosa ya habla si Rey David de Israel, “Ya nace yo que tiene culpa.”—Salmo 51:5.

El cuanto pecado ba mas grabe que con otro?

 Si. Por ejemplo, el Biblia ta habla que el cuanto maga gente na Sodoma de antes amo maga “malo y ya comete grabe pecado” que el diila culpa “bien pesao.” (Genesis 13:13; 18:20) Considera con el tres cosas que ta determina si paquemodo de serioso, o de pesao, el un pecado.

1.   Pesades. El Biblia ta dale kanaton aviso que evita con el maga serioso culpa igual na sexual imoralidad, idolatria, ladronadas, burracherias, extorcion, matanza y espiritismo. (1 Corinto 6:9-11; Revelacion 21:8) Diferente se na cosa ya menciona el Biblia acerca na maga culpa que ya hace que gendeh ta pensa o gendeh intencional, por ejemplo, maga palabra o accion que ta hace sinti duele con otro. (Proverbio 12:18; Efeso 4:31, 32) Maskin pa ansina, el Biblia ta anima kanaton que no pensa que gendeh serioso el maskin cosa culpa, ciendo puede se guia kanaton para comete mas serioso culpa contra na ley del Dios.—Mateo 5:27, 28.

2.   Motivo. El cuanto maga gente ta culpa cay no sabe sila si cosa el Dios ta pidi kanila. (Maga Actividad 17:30; 1 Timoteo 1:13) Mientras gendeh ta hace no vale nada con ese maga pecado, el Biblia ta habla que diferente este na maga culpa que intencional ya hace contra na maga ley del Dios. (Numero 15:30, 31) El maga culpa que intencional ya hace ta sale na “mal corazon.”—Jeremias 16:12.

3.   Cuanto beses. El Biblia ya habla tambien que diferente el pecado que una vez lang ya hace na pecado que cuanto beses ya hace por largo tiempo. (1 San Juan 3:4-8) Aquellos quien “ta peca . . . intencionalmente,” maskin pa sabe ya si cosa el justo, hay juzga kanila el Dios como culpable.—Maga Hebreo 10:26, 27, El Nuevo Testamento.

 Aquellos quien ya hace serioso culpa posible sinti huya. Por ejemplo, si Rey David ya escribi: “El de mio maga kamali yan lampas na de mio cabeza; igual na un pesao carga, gendeh yo con este puede ganá.” (Salmo 38:4) Maskin pa ansina, el Biblia ta dale kanaton este esperanza: “Manda con ele bira con Jehova, quien hay tene lastima con ele, con el diaton Dios, cay ele hay perdona completamente.”—Isaias 55:7.