El sagrao espiritu amo el poder del Dios, el de suyu activo fuerza. (Miqueas 3:8; Lucas 1:35) Ta usa o ta imbia este el Dios para cumpli el de suyu voluntad.—Salmo 104:30; 139:7.

 Na Biblia, el palabra que yan translate “espiritu” amo estaba na Hebreo palabra ruʹach y Griego palabra pneuʹma. Mas mucho, ta usa con este maga palabra para refiri con el activo fuerza del Dios o con el sagrao espiritu. (Genesis 1:2) Pero, el Biblia ta usa tambien con este maga palabra para refiri na:

•   Resuello.—Habacuc 2:19; Revelacion 13:15.

•   Viento.—Genesis 8:1; Juan 3:8.

•   Fuerza que ta dale vida con el maga vivo creatura.—Job 34:14, 15.

•   Personalidad o custumbre del gente.—Numero 14:24.

•   Maga espiritu persona, igual na Dios y maga angel.—1 Rey 22:21; Juan 4:24.

 Todo este gendeh puede mira el gente pero puede mira el efecto de este. Na igual manera, el espiritu del Dios, “igual como viento que gendeh ta puede mira, nuay cuerpo y poderoso.”—An Expository Dictionary of New Testament Words, de W. E. Vine.

 El Biblia ta refiri tambien con el sagrao espiritu del Dios como el de suyu maga “mano” o “dedo.” (Salmo 8:3; 19:1; Lucas 11:20, NWT; compara con el Mateo 12:28.) Igual si paquemodo el experienciao trabajador ta usa con el de suyu maga mano y dedo para hace con el de suyu trabajo, el Dios ya usa con el de suyu espiritu para hace y crea con el siguiente:

•   El universo.—Salmo 33:6; Isaias 66:1, 2.

•   El Biblia.—2 Pedro 1:20, 21.

•   El maga milagro que ya hace el de suyu maga siervo de antes y el diila activo predicacion.—Lucas 4:18; Maga Actividad 1:8; 1 Corinto 12:4-11.

•   El maga buen calidad que ya dale mira el de suyu maga siervo quien ta obedece con ele.—Galacia 5:22, 23.

El sagrao espiritu gendeh un persona

 Cuando ya refiri el Biblia con el espiritu del Dios como de suyu maga “mano,” “dedo” o “resuello,” ta dale se mira que el sagrao espiritu gendeh un persona. (Exodo 15:8, 10) El mano del un trabajador, ta move lang depende na cosa ta dicta el de suyu pensamiento o cuerpo. Na igual manera, ta move lang el sagrao espiritu del Dios si usa le con este. (Lucas 11:13) Na Biblia, el espiritu del Dios ya compara na agua y tiene este coneccion na maga cosas igual na fe y saber. Todo este ta dale mira que el sagrao espiritu gendeh un persona.—Isaias 44:3; Maga Actividad 6:5; 2 Corinto 6:6.

 El Biblia ya manda conoce con el nombre del Dios Jehova y el de suyu Anak, si Jesucristo. Pero, nuay este menciona que tiene nombre el sagrao espiritu. (Isaias 42:8; Lucas 1:31) Cuando el Cristiano martir que si Esteban ya puede mira un vision acerca na cielo, ya puede le mira dos persona lang, gendeh tres. El Biblia ta habla: “Si Esteban, lleno del Espiritu Santo, ya mira para na cielo y ya mira le el gloria del Dios y con Jesus parao na lao derecha del Dios.” (Maga Actividad 7:55, El Nuevo Testamento na Chavacano) Por causa na sagrao espiritu que amo el activo fuerza del Dios, ya puede mira si Esteban un vision.

 Gendeh justo idea: El “Espiritu Santo” o sagrao espiritu, amo un persona y parte del Trinidad como cosa ta habla el 1 San Juan 5:7, 8 na King James version del Biblia.

 Verdad: Na King James version del Biblia el 1 San Juan 5:7, 8 ya menciona “na cielo, el Tata, el Palabra y el Espiritu Santo y este tres amo uno lang. Y tiene tres ta man testigo na tierra.” Pero, el maga researcher ya discubri que ese maga palabra nuay escribi si apostol Juan poreso, gendeh este parte del Biblia. Si Professor Bruce M. Metzger ya escribi: “Asigurao que imbusterias este maga palabra y gendeh debe inclui na Nuevo Testamento.”—A Textual Commentary on the Greek New Testament.

 Gendeh justo idea: Na Biblia, ta refiri con el sagrao espiritu igual na persona y prueba este que el sagrao espiritu un persona.

 Verdad: Maskin tiene vez el Biblia ta refiri con el sagrao espiritu como persona, gendeh se quierre decir que un persona el sagrao espiritu. Na Biblia, ta refiri tambien con el saber, muerte y pecado como persona. (Proverbio 1:20; Roma 5:17, 21) Por ejemplo, ya menciona que el saber tiene “maga trabajo” y “maga anak,” y ya menciona tambien que el pecado ta engaña, ta mata y ta desea con el maga cosas que gendeh de suyu.—Mateo 11:19; Lucas 7:35; Roma 7:8, 11.

 Na igual manera, cuando ya coteja si apostol Juan con el cosa ya habla si Jesus, ya compara le con el sagrao espiritu, na un “ayudante” (paraclete) que hay dale evidencia, guia, converza, oi, declara, dale gloria y ricibi. Ya usa le personal pronoun que ta usa para na hombre na Griego lengguaje para refiri con ese “ayudante.” (Juan 16:7-15) Ya hace le se cay el Griego palabra para na “ayudante” (pa·raʹkle·tos) amo nombre para na hombre que ta necesita pronoun para na hombre asegun na grammar del Griego lengguaje. Cuando ya refiri si Juan con el sagrao espiritu usando el neuter noun pneuʹma, ya usa le con el nueter pronoun “este.”—Juan 14:16, 17.

 Gendeh justo idea: El bautismo que ta hace na nombre del sagrao espiritu, ta dale prueba que un persona este.

 Verdad: Tiene vez, el Biblia ta usa con el palabra “nombre” para refiri con el poder o autoridad. (Deuteronomio 18:5, 19-22; Ester 8:10) Semejante este na expresion “na nombre del ley” que gendeh quierre decir que un persona el ley. El un persona quien ya bautiza “na nombre del” sagrao espiritu ta conoce con el poder y papel del sagrao espiritu para cumpli con el voluntad del Dios.—Mateo 28:19.

 Gendeh justo idea: El maga apostoles de Jesus y el otro maga dicipulo de antes ta creé que el sagrao espiritu amo un persona.

 Verdad: El Biblia nuay habla ansina, ni maskin el historia. El Encyclopædia Britannica ta habla: “El idea que el Sagrao Espiritu amo un sagrao Persona . . . ya principia na Council del Constantinople del ad 381.” Ya sucede este mas de 250 año despues muri el ultimo maga apostoles.