El contestacion del Biblia

 Na de suyu Sermon na Monte, ya habla si Jesus: “Ama con el de ustedes maga contrario.” (Mateo 5:44, El Nuevo Testamento na Chavacano; Lucas 6:27, 35) El cosa le ya habla quierre decir que debe kita dale mira amor con aquellos quien ta odia kanaton o quien ta maltrata kanaton.

 Ya dale mira amor si Jesus con el de suyu maga contrario cuando ya perdona le con aquellos quien ya maltrata con ele. (Lucas 23:33, 34) El de suyu enseñanza que ama con el diaton maga contrario amo uyun na cosa ya habla na Hebreo Escritura o mas conocido como Daan Testamento.—Exodo 23:4, 5; Proverbio 24:17; 25:21.

 “Ama con el de ustedes maga contrario y reza para con aquellos quien ta persigui con ustedes.”—Mateo 5:43, 44.

Na este articulo

•  Porque ama con el de tuyu maga contrario?

•  Cosa el cuanto manera para dale mira amor con el de tuyu maga contrario?

•  Porque kita gendeh debe participa na guerra?

•  Maga gendeh justo idea acerca na amor na contrario

•  Maga texto na Biblia acerca na amor na contrario

 Porque ama con el de tuyu maga contrario?

•   El Dios mismo el ya dale mira buen ejemplo. El Dios “bueno con el maga ingrato y con el maga gente malo.” (Lucas 6:35) “Ta hace [le] sale el disuyo sol con el maga gente malo.”—Mateo 5:45.

•   Si dale kita mira amor, posible se manda move con el diaton contrario para cambia. El Biblia ta anima kanaton que trata enbuenamente con el diaton contrario y ya habla que si hace kita se, “hay ajunta [kita] braza na de suyu cabeza.” (Proverbio 25:22) Ese ilustracion ta refiri con el proceso donde ta calenta con el un piedra para puede saca maga precioso metal. Na igual manera, si bueno kita con el un persona quien ta odia kanaton, puede kita quita con el de suyu rabia y posible queda tambien le bueno kanaton.

 Cosa el cuanto manera para dale mira amor con el de tuyu maga contrario?

•   “Hace bueno con aquellos quien ta odia [contigo].” (Lucas 6:27) “Si el dituyo contrario con hambre, dale con ele come; si con sequia, dale con ele toma,” ya habla el Biblia. (Roma 12:20) Puede tu pensa otro manera para dale mira amor con el de tuyu contrario si aplica tu con el cosa ya habla si Jesus: “Hace con otros cosa ustedes quiere que sila ay hace con ustedes.”—Lucas 6:31.

•   “Bendici con aquellos quien ta maldici con ustedes.” (Lucas 6:28) Ta bendici kita con el diaton maga contrario si tan cuento kita kanila enbuenamente y con consideracion, maskin pa gendeh bueno el cosa sila ta habla kanaton. El Biblia ta habla: “No ustedes . . . devolve insulto con quien ta insulta con ustedes. Emvez, devolve ustedes bendicion.” (1 Pedro 3:9) Este consejo puede ayuda para gendeh mas queda grabe el peleajan.

•   “Reza para de aquellos quien ta maltrata con ustedes.” (Lucas 6:28) Si insulta contigo el un persona, “no devolve mal con mal.” (Roma 12:17) En vez, pidi con Dios que perdona con aquel persona. (Lucas 23:34; Maga Actividad 7:59, 60) En vez de man balus, deja que el Dios el juzga con ese persona asegun na De Suyu perfecto justicia.—Levitico 19:18; Roma 12:19.

 “Ama con el de ustedes maga contrario y hace bueno con aquellos quien ta odia con ustedes. Bendici con aquellos quien ta maldici con ustedes y reza para de aquellos quien ta maltrata con ustedes.”—Lucas 6:27, 28.

•   Queda “paciencioso [y] lastimoso.” (1 Corinto 13:4) Cuando ya habla si apostol Pablo si cosa quierre decir del amor, ya usa le con el un forma del Griego palabra (a·gaʹpe) que puede incuntra na Mateo 5:44 y Lucas 6:27, 35. Ta dale kita mira ese clase de amor maskin na diaton maga contrario si paciencioso kita, bueno, respetoso, gendeh envidioso o arogante.

 “El amor paciencioso. El amor lastimoso. El amor gendeh envidioso, ni hambuguero, ni orgulloso. El amor gendeh mal custumbre ni canalla. El amor gendeh ta rabia, sino ta olvida el malo ya hace con ele. El amor gendeh ta encontra alegria na maga injusticia, sino na verdad. El amor ta perdona todo, ta cree todo, ta espera todo y ta aguanta todo. El amor hasta para cuando.”—1 Corinto 13:4-8.

 Porque kita gendeh debe participa na guerra?

 Ya enseña si Jesus con el de suyu maga siguidores que gendeh sila debe pelea con el diila maga contrario. Por ejemplo, cuando ya habla le kanila que hay ataca con el Jerusalem, nuay le habla kanila que esta y man guerra sino escapa. (Lucas 21:20, 21) Ya habla tambien si Jesus con apostol Pedro: “Devolve el dituyo espada na su baina, cay todo quien ta agarra espada, ta muri na espada.” (Mateo 26:52) El Biblia y el maga historian ya habla que el maga siguidores de Jesus del primer siglo nuay participa na guerra. a—2 Timoteo 2:24.

 Maga gendeh justo idea acerca na amor na contrario

 Gendeh justo idea: Bajo na Ley del Dios, el maga Israelita debe odia con el diila maga contrario.

 Gendeh justo idea: Si ta ama tu con el de tuyu maga contrario, quierre decir de este que ta consinti tu con el diila mal conducta.

 Verdad: El Biblia ta dale mira que puede tu ama con el un persona maskin pa gendeh aprobao contigo el de suyu mal conducta. Por ejemplo, ya condena si Jesus con el violencia pero ya reza le para con aquellos quien quierre mata con ele. (Lucas 23:34) Y ya odia le con el pecado pero ya dale le el de suyu vida para na maga pecador.—Juan 3:16; Roma 6:23.