Asegun na ultimo libro del Biblia, el 666 amo el numero o el nombre del peligroso grande animal con siete cabeza y diez cuerno que ya sale na mar. (Revelacion 13:1, 17, 18) Este animal amo el simbolo del sistema de politica na entero mundo que ta rula na “todo el maga raza, maga pais, maga lenguaje y maga nacion.” (Revelacion 13:7, El Nuevo Testamento na Chavacano) El nombre 666 ta indica que ya falla gayot este sistema de politica na vista del Dios. Na cosa manera?

  Mas pa na un nombre lang. El maga nombre que ta dale el Dios tiene cosa quierre decir. Por ejemplo, el nombre del un gente si Abram quierre decir “El Tata Alto (Ya Glorifica).” El Dios ya dale con ele el nombre Abraham, quierre decir “El Tata del un Grande Grupo (Manada),” cuando el Dios ya promete que hace Le con ele un “tata del manada nacion.” (Genesis 17:5, footnote) Na igual manera, ya nombra el Dios con el animal 666 como un simbolo del maga calidad de este.

  El numero seis ta indica imperfeccion. Na Biblia, manada beses ta usa con el maga numero como simbolo. El numero siete ta representa pagka-completo o perfeccion. El seis, como ya falta uno para queda siete, puede refiri na un cosa que falta o tiene defecto na mirada del Dios y puede este refiri con el maga enemigo del Dios.​—1 Cronicas 20:6; Daniel 3:1.

  Tres beses para hace claro. El Biblia tiene vez ta repiti con el un cosa tres beses para hace claro con este. (Revelacion 4:8; 8:13) Poreso, el nombre 666 ya hace gayot claro que el sistema de politica del maga gente ya falla gayot na vista del Dios. Nuay sila puede dale permanente paz y seguridad​—cosas que el Reino del Dios lang el puede dale.

El marca del animal

 El Biblia ta habla que el maga gente ta ricibi con “el marca del Grande Animal” cay ta sigui sila con este “con admiracion” y ta adora pa gane sila con este. (Revelacion 13:3, 4; 16:2) Ta adora sila con este si ta honra sila con el diila nacion, de este maga simbolo o de este fuerza militar. Asegun na The Encyclopedia of Religion: “El nacionalismo ya queda ya un dominante clase de religion na moderno tiempo.” a

 Na cosa manera ya pone con el marca del animal na derecha mano o frente del un gente? (Revelacion 13:16) Asegun na mandamiento que ya dale le na nacion del Israel, el Dios ya habla: “Pirmi con este acorda que dol tringcao este na de ustedes mano y na de ustedes frente.” (Deuteronomio 11:18) Gendeh este quierre decir que literal marca el maga Israelita con el diila maga mano y frente. Sino, quierre decir de este que guia el palabra del Dios con el todo diila maga accion y pensamiento. Na igual manera, el marca del animal 666 gendeh literal igual con el un tattoo. Sino, ta dale este mira que el maga gente quien tiene este marca amo aquellos quien bajo na guia del sistema de politica. Aquellos tiene marca de animal ta hace con el diila mismo cuerpo enemigo del Dios.​—Revelacion 14:9, 10; 19:19-21.