Si. Ya habla si Jesus: “El gente bueno el cuerpo gendeh necesita con el doctor, sino el gente emfermo.” (Mateo 9:12, El Nuevo Testamento na Chavacano) Ese maga palabra ta dale mira que el de suyu maga siguidores puede acepta curada medical. Maskin pa el Biblia gendeh un libro de medicina, tiene este maga principio que puede guia con aquellos quien quierre hace alegre con Dios.

Maga pregunta que puede tu considera

 1. Ta entende ba yo si cosa clase de cura hay dale conmigo? El Biblia ta enseña kanaton que debe kita busca justo informacion en vez de “creé con el todo cosa [kita] ya oi.”​—Proverbio 14:15.

 2. Debe ba yo consulta na otro doctor? Puede ayuda si “manada el quien ta dale consejo,” especialmente si grabe el de tuyu condicion.​—Proverbio 15:22.

 3. Tiene ba cosa envuelto na curada que ta viola con el mandato na Biblia que “evita . . . con el sangre”?​—Maga Actividad 15:20, NWT.

 4. Envuelto ba el espiritismo na curada? El Biblia ta condena con el “espiritismo.” (Galacia 5:19-21, NWT) Para sabe si envuelto ba el espiritismo na curada, considera con el siguiente pregunta:

•   Ta usa ba espiritismo el quien ta cura?

•   El curada ba yan base na creencia que ya enferma tu por causa cay ya rabia el maga dios o cay yan barang contigo?

•   Tiene ba maga sacrificio, oracion o otro pa maga ritual de espiritismo que ta hace durante el preparacion o mientras ta usa con el medicina?

 5. El de mio salud ya lang ba yo pirmi ta pensa? El Biblia ta habla: “Dale mira el de tuyu pagka-razonable na todo gente.” (Filipo 4:5, NWT) Ese consejo puede ayuda contigo para man focus con “el cosa mas mejor” o importante, igual como el maga espiritual cosas.​—Filipos 1:10, El Nuevo Testamento; Mateo 5:3.