Gendeh un culpa que toma maga alcoholico tomada basta gendeh este sobra. El Biblia ya habla que el vino amo un regalo estaba con Dios y puede se kanaton dale alegria. (Salmo 104:14, 15; Eclesiastes 3:​13; 9:7) Ya menciona tambien el Biblia que bueno na salud el vino.​—1 Timoteo 5:​23.

 Cuando taqui si Jesus na tierra, ya toma le vino. (Mateo 26:29; Lucas 7:​34) Na uno del de suyu maga milagro, ya hace vino si Jesus con el agua como regalo na un casamiento.​—Juan 2:​1-​10.

Maga peligro si por demas ta toma

 Ya habla el Biblia que bueno para kanaton el vino. Pero, ya condena este con el sobra tomada y burracherias. Poreso, el un Cristiano quien ya decidi toma gendeh debe hace con ese por demas. (1 Timoteo 3:8; Tito 2:​2, 3) El Biblia ta dale manada razon si porque kita debe evita sobra toma.

•   Ta causa se con el un persona para gendeh puede pensa enbuenamente y gendeh puede hace maga justo decision. (Proverbio 23:29-​35) El un persona quien sobra ya toma gendeh puede sigui con el cosa ya habla el Biblia que “presenta con el de ustedes cuerpo como vivo sacrificio, sagrao y aceptable con Dios, un sagrao servicio que tiene abilidad para examina.”​—Roma 12:1, NWT.

•   El sobra tomada ta quita con el control na cuerpo del un persona y “con el [de suyu] deseo que hace si cosa el justo.”​—Oseas 4:11; Efeso 5:18

•   Puede este resulta na pobreza y serioso problema na salud.​—Proverbio 23:21, 31, 32.

•   Gendeh aceptable con Dios aquellos quien por demas ta toma y maga burrachon.​—Proverbio 23:20; Galacia 5:​19-​21.

Paquemodo sabe que sobra ya?

 Puede habla que por demas ya el tomada del un persona si ta pone se na peligro con el de suyu vida o el vida del otro. Asegun na Biblia, puede sabe que por demas ya toma el un persona si gendeh mas le ta puede pensa enbuenamente, gendeh mas ta puede camina enbuenamente, ta pelea con otro o gendeh mas enbuenamente tan cuento. (Job 12:25; Salmo 107:27; Proverbio 23:29, 30, 33) Maskin aquellos quien ta evita por demas toma puede siempre cae na “borracherias” y experiencia el maga resulta de este.​—Lucas 21:34, 35, El Nuevo Testamento na Chavacano.

Si cuando tu gendeh debe toma

 El Biblia ta menciona tambien maga situacion donde el maga Cristiano gendeh gayot debe toma:

•   Si man luya el otro por causa con ese.​—Roma 14:21.

•   Si ta viola se con el ley del nacion.​—Roma 13:1.

•   Si gendeh puede controla el persona con el de suyu tomada. Aquellos quien tiene adiccion na alcoholico tomada debe decidi que gendeh mas toma.​—Mateo 5:​29, 30.