El Biblia ta anima que voluntario kita dale y con justo motivo. Ta habla tambien este que ta hace este alegre gendeh lang con el quien ta ricibi sino pati con el quien ta dale. (Proverbio 11:25; Lucas 6:38) Si Jesus ya habla: “Mas grande el alegria de aquel quien ta dale contra con el quien ta recivi.”​—Maga Actividad 20:35, El Nuevo Testamento na Chavacano.

•  Cosa clase de dalida el ta hace alegre con Dios?

•  Cosa clase de dalida el gendeh justo?

•  Maga texto na Biblia acerca na dalida

 Ta puede hace alegre con Dios si voluntario kita ta dale con otro. El “cada uno necesita dale el cosa le ya decidi na disuyo corazon,” ya habla el Biblia, “gendeh alang-alang o forzao, cay el Dios ta ama con aquel quien ta dale con alegria.”​—2 Corinto 9:7.

 Parte del adoranza con Dios que dale kita con todo corazon. (Santiago 1:27) El un bondadoso persona quien ta dale con aquellos quien ta necesita ta hace alegre con Dios quien ta mira con este como un cosa que ya presta le con ese persona. (Proverbio 19:17) El Biblia ta enseña que mismo el Dios el quien hay paga con ele.​—Lucas 14:12-14.

 Si ya hace este na gendeh justo motivo. Por ejemplo:

•   Para man bilib el maga gente.​—Mateo 6:2.

•   Para tiene tambien le cosa ricibi.​—Lucas 14:12-14.

•   Para puede salva.​—Salmo 49:6, 7.

 Si para suporta na maga cosas que ta condena el Dios. Por ejemplo, gendeh justo que dale sen con otro para usa na sugal o compra droga o sobra alcoholico tomada. (1 Corinto 6:9, 10; 2 Corinto 7:1) Na igual manera, gendeh tambien bueno para dale con el un persona quien puede suporta con el de suyu mismo cuerpo pero no quierre trabaja.​—2 Tesalonica 3:10.

 Si ta dale el un persona con otro pero gendeh le ta hace con el de suyu responsibilidad. El Biblia ta enseña que el maga cabeza del familia debe dale el necesidad del de suyu familia. (1 Timoteo 5:8) Gendeh justo si el un cabeza del familia hay dale con otro pero deja le sufri el de suyu familia. Na igual manera, ya condena si Jesus con aquellos quien gendeh ta dale el necesidad del diila de edad mayores cay ta habla sila que el diila propiedad amo “dedicao para con Dios lang.”​—Marcos 7:9-13, El Nuevo Testamento.