Asegun na cronologia na Biblia, el Reino del Dios ya establicia ya na cielo del 1914. Ya dale este mira na profecia que escribido na capitulo 4 del libro de Daniel.

 Sumario del profecia. Ya dale mira el Dios con Rey Nabucodonosor un profetico sueño acerca na un grande pono que ya hace tumba. Ya pone venda con el tuud de este para gendeh crici adentro del “siete tiempo.” Y na uliji, hay crici otravez este pono.​—Daniel 4:1, 10-16.

 El primer cumplimiento del profecia. El grande pono ta representa mismo con Rey Nabucodonosor. (Daniel 4:20-22) Ya ‘hace tumba’ con ele na simbolico manera cuando temporario ya perde el de suyu pensamiento y el de suyu pagka-rey por siete año. (Daniel 4:25) Cuando ya hace otravez el Dios intacto con el pensamiento de Nabucodonosor, ya bira le otravez na de suyu trono y ya conoce le con el rulanza del Dios.​—Daniel 4:34-36.

 Evidencia que el profecia tiene mas grande cumplimiento. El proposito del profecia amo que “el todo gente vivo hay sabe que el Bien Alto Dios amo el Quien Rula na reino del maga gente y dale le el rulanza con maskin quien le quierre, maskin pa con aquellos de con todo bajo na maga gente.” (Daniel 4:17) Con Nabucodonosor ba, que un orgulloso gente, si Jehova quierre dale ese rulanza? Gendeh, cay una pa de ese, ya manda con ele mira el Dios otro profetico sueño que ta dale mira que gendeh ele o maskin quien politico el puede ricibi con ese papel. Sino, el Dios mismo “hay forma un reino que nunca hay destroza.”​—Daniel 2:31-44.

 Del antes, el Dios ya establicia un reino para representa con el de suyu rulanza na tierra: el nacion de Israel de antes. Ya permiti el Dios que “hay destroza” con ese reino cay aquellos quien ta rula nuay esta fiel, pero ya predicta le que dale le el reino con el “uno quien tiene el legal derecho.” (Ezequiel 21:25-27) El Biblia ya identifica con Jesucristo como el uno que tiene legal autoridad para ricibi con este reino hasta para cuando. (Lucas 1:30-33) Gendeh igual con Nabucodonosor, “humilde” si Jesus.​—Mateo 11:29.

 Cosa ta representa el pono na Daniel capitulo 4? Na Biblia, el maga pono tiene vez ta representa na rulanza. (Ezequiel 17:22-24; 31:2-5) Na mas grande cumplimiento del Daniel capitulo 4, el grande pono ta representa con el rulanza del Dios.

 Cosa quierre decir del pono que ya hace tumba? El pono que ya hace tumba ta representa con el rulanza de Nabucodonosor que ya descanza por cuanto tiempo. Na igual manera, ya descanza tambien el rulanza del Dios na tierra por cuanto tiempo. Ya sucede este cuando si Nabucodonosor ya destroza con el Jerusalem, el lugar donde el maga rey del Israel ya sinta na “trono de Jehova” como maga representante mismo del Dios.​—1 Cronicas 29:23.

 Cosa ta representa el “siete tiempo”? El “siete tiempo” ta representa con el largor del tiempo que ya permiti el Dios con el maga nacion que rula na entero tierra. Durante ese tiempo nuay entramete el reino del Dios. El “siete tiempo” ya principia del Octubre 607 B.C.E. Asegun na cronologia del Biblia, na ese mismo dia, ya destroza el maga de Babilonia con el Jerusalem. a​—2 Rey 25:1, 8-10.

 Paquemodo de largo el “siete tiempo”? Gendeh lang este siete año igual na situacion de Nabucodonosor. Ya contesta si Jesus con ese pregunta cuando ya habla le: “El maga hende-Judio ay destrosa con Jerusalem [el simbolo de rulanza del Dios] hasta ay cumpli el tiempo que Dios ta permiti canila.” (San Lucas 21:24, El Nuevo Testamento) El ‘tiempo que el Dios ya permiti’ con el maga nacion para ‘destroza con el Jerusalem’ o con el de suyu rulanza amo igual na “siete tiempo” que ya menciona na Daniel capitulo 4. Quierre decir de este que el “siete tiempo” ta continua lang siempre maskin na tiempo cuando taqui si Jesus na tierra.

 El Biblia ya dale mira si paquemodo sabe el largor del “siete tiempo.” Ta habla este que el tres y media “tiempo” tiene largor de 1,260 dia. Entonces, el “siete tiempo” amo doble de este numero o 2,520 dia. (Revelacion 12:6, 14, NWT) Si sigui kita si paquemodo ta cunta con el dia na profecia del Biblia que “un dia por un año,” el 2,520 dia tiene largor de 2,520 año. Poreso, el “siete tiempo” o 2,520 año ya termina del Octubre 1914.​—Numero 14:34; Ezequiel 4:6.