El contestacion del Biblia

 Si Daniel amo un bien bueno Judio profeta del ika-siete y ika-seis siglo B.C.E. El Dios ya dale con ele el abilidad para dale interpretacion na maga sueño, ya dale con ele maga vision acerca na futuro y ya guia con ele para escribi un libro de Biblia que ya llama Daniel.—Daniel 1:17; 2:19.

Quien si Daniel?

 Ya engranda si Daniel na Juda, un reino donde puede incuntra con el ciudad de Jerusalem y con el templo de maga Judio. Del 617 B.C.E., el rey de Babilonia que si Nabucodonosor, ya ataca con el Jerusalem y ya saca con “el maga prominente gente alla” para hace kanila destierro na Babilonia. (2 Rey 24:15; Daniel 1:1) Si Daniel amo uno kanila y posible que teenager pa le aquel tiempo.

 Ya lleva con Daniel y con el otro maga joven hombre (incluido kanda Sadrac, Mesac y Abednego) para na palacio na Babilonia. Ya enseña kanila alla para na uliji hay sirvi sila con el gobierno. Maskin ta forza kanila que man compromiso, si Daniel y el de suyu tres amigo ya esta leal na diila Dios que si Jehova. (Daniel 1:3-8) Despues kanila enseña por tres año, ya comenda gayot kanila si Rey Nabucodonosor por causa na diila sabeduria y maga abilidad. Ya puede le mira que “diez beses sila mas bueno contra na todo maga sacerdote quien ta practica magica y maga salamanquero na de suyu entero reino.” Ya iscuji le con Daniel y con el maga amigo de este para sirvi na palacio del rey.—Daniel 1:18-20.

 Despues del cuanto decada, cuando posible maga 90 año ya si Daniel, ya manda con ele anda na palacio. El rey que si Belsazar, quien ta rula aquel tiempo na Babilonia, ya pidi con Daniel que habla si cosa quierre decir del cosa ya escribi na pader por medio na un milagro. Por medio na guia del Dios, si Daniel ya revela que el Babilonia hay perde na Imperio del Medo-Persia. Aquel mismo noche, ya ataca con el Babilonia.—Daniel 5:1, 13-31.

 Cuando bajo ya el Babilonia na rulanza del Medo-Persia, ya iscuji con Daniel para queda un alto oficial y ya considera si Rey Dario que dale pa con ele mas alto posicion. (Daniel 6:1-3) El otro maga oficial ya envidia con Daniel y ya hace manera para buta con este na cueva del maga leon para muri este pero ya salva con ele si Jehova. (Daniel 6:4-23) Cerca na fin del de suyu vida, el un angel ya aparece con Daniel y dos beses ya asigura con ele que ele “bien precioso.”—Daniel 10:11, 19.

 Mira con este maga suceso na un drama que base na Biblia que tiene dos parte Daniel—Un Hombre que Tiene Fuerte Fe.