Gendeh kita se debe hace. Asegun na maga ley que ya dale el Dios con el nacion de Israel, el New Catholic Encyclopedia ya habla: “Na diferente maga record na Biblia claro que el maga verdadero siervo del Dios nuay usa maga imagen na diila adoranza.” Considera con este maga versiculo na Biblia:

•   “Gendeh ustedes debe hace imagen o forma igual maskin cosa que talla na cielo o aqui na tierra o na agua abajo del tierra. Gendeh ustedes debe hinca kanila ni sirvi kanila, cay iyo si Jehova el de ustedes Dios, iyo el Dios quien ta pidi exclusivo devocion.” (Exodo 20:4, 5) Ciendo ta pidi el Dios “exclusivo devocion,” gendeh le alegre si ta alaba o ta adora kita na maga imagen, letrato, idolo, estatua o simbolo.

•   “Gendeh yo permiti que ricibi el maga estatua el alabanza que conviene lang para conmigo.” (Isaias 42:8, Easy-to-Read Version) Gendeh ta acepta el Dios con el adoranza por medio de maga imagen. Cuando el maga Israelita ya adora con ele usando el estatua de joven vaca, el Dios ya habla que ya comete sila “un terrible pecado.”​—Exodo 32:7-9, Easy-to-Read Version.

•   “No kita debe pensa cay Ele ta semeja con un rebulto lang de oro o plata o piedra que el maga gente lang ya plania y ya hace.” (Maga Actividad 17:29, El Nuevo Testamento na Chavacano) Gendeh igual na pagano adoranza que ta usa maga imagen que “el maga gente lang ya plania y ya hace,” el maga Cristiano debe ‘ta camina por medio del fe lang y gendeh por medio del vista,’ como cosa ya habla el Biblia.​—2 Corinto 5:7.

•   “Desaleja con el maga dios-dios.” (1 San Juan 5:21) Na maga mandamiento que ya dale con el nacion de Israel y na maga Cristiano, el Biblia ta dale mira que gendeh deverasan el enseñanza que ta aproba el Dios con el usada de imagen na adoranza.