Gendeh. El Biblia ta dale mira que con Dios lang kita debe reza y debe kita se hace na nombre de Jesus. Ya habla si Jesus con el de suyu maga dicipulo: “Ansina ustedes reza: Tata diamon na cielo, dale gloria con el de Uste Nombre.” (Mateo 6:9) Nuay le enseña con el de suyu maga dicipulo que reza na maga santo, angel o maskin con quien puera con Dios.

 Ya habla tambien si Jesus con el de suyu maga siguidores: “Yo amo el Camino, el Verdad y el Vida. Noay quien ay puede anda con el Tata si gendeh por medio dimio.” (Juan 14:6) Con Jesus lang ya dale autoridad el Dios para queda Mediador.—Maga Hebreo 7:25.

Paquemodo si ta reza yo con Dios pero ta reza tambien yo na maga santo?

 Como parte del Diez Mandamiento, el Dios ya habla: “Iyo si Jehova el de ustedes Dios, iyo el Dios quien ta pidi exclusivo devocion.” (Exodo 20:5) Este quierre decir que el Dios ta pidi kanaton que con ele lang dale el diaton devocion o adoranza—incluido ya aqui el rezo.—Isaias 48:11.

 Ta hace kita sinti duele con Dios si ta reza kita con otro, maskin na maga santo o angel. Cuando ya adora era si apostol Juan con el un angel, ya sangga con ele el angel y ya habla: “No tu hace ansina cay un muchacho lang yo igual contigo y con todo el dituyo maga hermano y hermana . . . Con Dios lang adora.”—Revelacion 19:10.