Manada na maga mas daan translation del Biblia igual na King James Version el ta usa con el palabra “infierno” na cuanto versiculo. (Salmo 16:10; Maga Actividad 2:27 a) Como cosa puede mira na letrato na este articulo, manada gente ta creé que el infierno amo un mafuego lugar donde ta castiga con el maga malo hasta para cuando. Pero ese ba el cosa ta enseña el Biblia?

Na este articulo

•  El infierno ba amo un lugar donde ta sufri el maga gente hasta para cuando?

•  Quetal el istoria de Jesus acerca con el rico gente y Lazaro?

•  El infierno ba quierre decir que el gente ta sufri cay nuay le relacion con Dios?

•  Tiene ya ba quien ya puede sale na infierno?

•  Maga texto acerca na infierno o Sepultura

•  Maga palabra na original lengguaje del Biblia

•  El history del infierno de fuego

 Gendeh. El maga original palabra que yan translate como “infierno” na cuanto maga mas daan translation del Biblia (Hebreo, “Sheol”; Griego, “Hades”) ta refiri na “Sepultura” o el lugar donde ta entera con el maga gente. El Biblia ta dale mira que gendeh mas vivo el maga gente que talli na “Sepultura.”

•   El maga muerto no sabe ni nada y gendeh mas ta sinti dolor. “Nuay trabajo ni entendimiento ni sabeduria ni saber na infierno.” (Eclesiastes 9:10, Douay-Rheims Version) Na infierno, gendeh ta grita el maga gente por causa na dolor. Sino el Biblia ta habla: “Ojala man huya el maga malo y esta sila silencio na sepultura [infierno, Douay-Rheims].”—Salmo 31:17; King James Version (30:18, Douay-Rheims); Salmo 115:17.

•   Ya habla el Dios que el castigo del pecado amo el muerte y gendeh sufrimiento na infierno. Ya habla el Dios con el primer hombre que si Adan que muerte el castigo si desobedece le con el ley del Dios. (Genesis 2:17) Nuay Le menciona acerca na castigo na infierno. Despues comete pecado si Adan, ya habla con ele el Dios si cosa el de suyu castigo: “Polvos tu y na polvos tu hay bira.” (Genesis 3:19) Gendeh mas le existi. Si plano del Dios que hace sufri con Adan na mafuego infierno, asigurao hay menciona quel Ele con Adan. Nuay cambia el Dios con el castigo para con aquellos quien ta desobedece con el de suyu maga ley. Largo tiempo despues culpa si Adan, ya guia el Dios con el un escritor del Biblia para habla: “El pago ta dale el pecado amo el muerte.” (Roma 6:23, El Nuevo Testamento na Chavacano) Gendeh mas necesita omento castigo cay “si el gente muerto ya, libre ya le [na] pecado.”—Roma 6:7.

•   Detestable para con Dios que castiga con el maga gente hasta para cuando. (Jeremias 32:35) Gane, ta enseña el Biblia que “el Dios amor.” (1 San Juan 4:8) Quierre le que adora kita con ele cay ta ama kita con ele y gendeh cay ta tiene kita miedo que castiga kanaton.—Mateo 22:36-38.

•   Tiene maga buen gente quien ya guinda na infierno. El maga Biblia que ta usa con el palabra “infierno” ta indica tambien que el maga fiel gente igual con Jacob y Job sabe que guinda sila na infierno. (Genesis 37:35; Job 14:13) Ya menciona tambien que despues muri si Jesucristo, ya esta le na infierno hasta ya resucita con el ele. (Maga Actividad 2:31, 32) Entonces, ta dale este mira que el palabra “infierno” na esta maga Biblia ta refiri lang na Sepultura. b

 Ya relata se si Jesus y puede con ese le na Lucas 16:19-31. Ya usa si Jesus maga istoria como ilustracion para enseña kanaton maga verdad acerca na moral y si cosa el mirada del Dios na maga cosas. Poreso, gendeh deverasan suceso el istoria acerca con el gente rico y Lazaro. (Mateo 13:34) Para sabe mas acerca con este istoria, mira con el articulo “Who Were the Rich Man and Lazarus?”

 Gendeh. Gendeh uyun na Biblia el doctrina que el maga muerto sabe que nuay sila relacion con Dios ciendo claro ta enseña el Biblia que el maga muerto no sabe ni nada.—Salmo 146:3, 4; Eclesiastes 9:5.

 Si. El Biblia ya dale detalle acerca na nueve gente quien ya guinda na Sepultura (que yan translate como “infierno” na cuanto maga Biblia) y ya vivi otravez por medio de resureccion. c Si sabe sila si cosa ya sucede cuando na infierno sila, ya relata era sila el diila experiencia. Pero maka-interes cay nuay ni uno kanila el ya menciona que ya sufri sila o tiene cosa ya experiencia. Cosa el razon? Cay como cosa ta enseña el Biblia, nuay sila cosa sabe y dol “ta durmi” sila. —Juan 11:11-14; 1 Corinto 15:3-6.