Si, deverasan tiene Diablo. Ele “el principe de este mundo,” un espiritu creatura quien ya queda malo y yan rebelde con Dios. (Juan 14:30, El Nuevo Testamento na Chavacano; Efeso 6:11, 12) Puede mira na siguiente si cosa el personalidad del Diablo:

•   Satanas que quierre decir “el uno quien ta resisti.”​—Job 1:6.

•   Diablo que quierre decir “el falso acusador.”​—Revelation 12:9.

•   Culebra que na Biblia quierre decir “Engañador.”​—2 Corinto 11:3.

•   Tentador.​—Mateo 4:3.

•   Imbustero.​—Juan 8:44.

Gendeh un principio o calidad de maldad

 Para con otro, si Satanas Diablo amo un principio o calidad de maldad que ta existi adentro kanaton. Pero, puede le na Biblia el maga ocasion que donde tan cuento si Satanas con Dios. Perfecto el Dios, poreso imposible que ta converza le con el mal personalidad del de suyu mismo cuerpo. (Deuteronomio 32:4; Job 2:1-6) Na igual manera, ya tenta si Satanas con Jesus, un persona quien nuay pecado. (Mateo 4:8-10; 1 San Juan 3:5) Entonces, el Biblia ta dale mira que deverasan tiene Diablo y gendeh le basta lang un representacion del maldad.

 Debe ba kita estraña si porque manada el gendeh ta creé que deverasan tiene Diablo? Gendeh. El Biblia ta habla que ta engaña si Satanas con el maga gente para puede le cumpli con el de suyu maga plano. (2 Tesalonica 2:9, 10) Uno del de suyu maga efectivo tactica amo manda creé con el maga gente que gendeh le ta existi.​—2 Corinto 4:4.

  Falso: Lucifer el otro nombre del Diablo.

 Verdad: El Hebreo palabra que yan translate na cuanto Biblia como “Lucifer” quierre decir “el quien ta brilla.” (Isaias 14:12) El contexto ta dale mira que este termino ta refiri na dinastia o linea del maga rey del Babilonia que el Dios ya hace huya por causa na pagka-orgulloso de este. (Isaias 14:4, 13-20) Ya usa con el expresion “el quien ta brilla” para ganguia con el dinastia del Babilonia depues con este destroza.

  Falso: Ta usa el Dios con Satanas como parte del de suyu proposito para juzga con el maga gente.

 Verdad: Enemigo del Dios el Diablo y gendeh de suyu siervo. Si Satanas Diablo tan contra y ta acusa con aquellos quien ta sirvi con Dios.​—1 Pedro 5:8; Revelacion 12:10.