El Diablo y el maga demonio ta influencia gayot con el gente cay el Biblia ta habla: “El entero mundo talli na poder del demonio.” (1 San Juan 5:19, El Nuevo Testamento na Chavacano) El Biblia ta dale mira si cosa maga manera ta usa el Diablo para influencia con el maga gente.

•   Engaño. El Biblia ta anima con el maga Cristiano que “para duro contra con el maga engaño di Satanas.” (Efeso 6:11, El Nuevo Testamento) Uno del de suyu maga tactica amo que engaña con el maga gente para creé que el de suyu maga siguidores amo maga deverasan siervo del Dios.—2 Corinto 11:13-15.

•   Espiritismo. El Diablo ta influencia con el maga gente por medio de maga espiritista y aquellos quien ta practica adivinacion o astrologia. (Deuteronomio 18:10-12) Ta queda tambien facil para na demonio que controla con el persona si ele ta usa droga prohibido, si bajo le na hypnotism o si ta hace le maga meditacion que ta hace blanco con el pensamiento.—Lucas 11:24-26.

•   Falso religion. El maga religion que ta enseña maga falso doctrina ta influencia con el maga gente para desobedece con Dios. (1 Corinto 10:20) El Biblia ta llama con el maga falso enseñanza como “maga doctrina que ta sale con el Demonio.”—1 Timoteo 4:1.

•   Ta controla el demonio. Ta menciona el Biblia maga suceso donde el maga mal espiritu ta entra na cuerpo del individual para controla con este. Tiene vez este maga gente ta queda bulak o apa o ta hace pa gane sinti duele con el diila mismo cuerpo.—Mateo 12:22; Marcos 5:2-5.

Si paquemodo evita con el influencia del Diablo

 Gendeh tu debe tiene miedo na influencia del Diablo cay el Biblia ta dale mira si paquemodo tu puede gana contra con ele:

•   Sabe si cosa maga tactica ta usa el Diablo para ‘gendeh le puede engaña kanaton.’—2 Corinto 2:11.

•   Estudia con el Biblia y aplica si cosa tu ta aprende. Si aplica tu con el maga principio na Biblia, puede este protege contigo na influencia del Diablo.—Efeso 6:11-18.

•   Desaleja con el maskin cosa que tiene coneccion na maga demonio. (Maga Actividad 19:19) Incluido aqui el cancion, maga libro, magasin, poster y maga video que acerca na espiritismo.