Como parte del diila contribucion para suporta con el verdadero adoranza, ya manda con el maga Israelita de antes que dona diez por ciento a del diila incuntrada cada año. El Dios ya habla kanila: “Debe ustedes dale cada año el diez por ciento del todo cosecha del de ustedes simentera.”​—Deuteronomio 14:22.

 El mandamiento que dale diez por ciento amo parte del Ley de Moises que ya dale el Dios con el Israel de antes. El maga Cristiano gendeh bajo na Ley de Moises poreso gendeh sila obligao que dale diez por ciento. (Colosa 2:13, 14) Sino, el cada Cristiano puede dale “el cosa le ya decidi na disuyo corazon gendeh alang-alang o forzao, cay el Dios ta ama con aquel quien ta dale con alegria.”​—2 Corinto 9:7, El Nuevo Testamento na Chavacano.

•  Diez Por Ciento na Biblia​—El “Daan Testamento”

•  Diez Por Ciento na Biblia​—El “Nuevo Testamento”

 El dalida de diez por ciento manada beses ya menciona na parte del Biblia que ta llama el manada como el Daan Testamento. Mayoria ya menciona con ese despues dale el Ley con el Israel por medio con Moises. Pero, tiene pa cuanto que ya menciona antes con ese.

Antes Dale el Ley de Moises

 El primer persona que ya dale diez por ciento que ya menciona na Biblia amo si Abram (Abraham). (Genesis 14:18-20; Maga Hebreo 7:4) Si Abram ya dale diez por ciento como regalo con el rey-sacerdote del Salem. Nuay menciona na Biblia que si Abraham o el de suyu maga anak ya dale otravez diez por ciento.

 El ika-dos persona que ya menciona na Biblia que ya ofrece diez por ciento amo el apu de Abraham que si Jacob. Ya promete le que si bendici con ele el Dios, hay dale le con Dios “el ika-diez parte del todo cosas” que hay ricibi le. (Genesis 28:20-22) Asegun na cuanto scholar del Biblia, posible ya paga si Jacob con el diez por ciento por medio na maga sacrificio de animal. Maskin ya cumpli si Jacob con el de suyu promesa, nuay le forza con el de suyu familia que dale tambien diez por ciento.

Bajo na Ley de Moises

 Ya manda con el maga Israelita de antes que dale diez por ciento para suporta con el diila religioso actividad.

•   Ciendo nuay el maga sacerdote y el otro maga Levita diila mismo tierra onde siembra, el diez por ciento ya ayuda kanila para puede sila trabaja full-time para ayuda con el maga gente adora con Dios. (Numero 18:20, 21) El maga Levita que gendeh sacerdote hay ricibi diez por ciento estaba na maga gente y dale tambien sila “diez parte estaba na diez parte” para na maga sacerdote.​—Numero 18:26-29.

•   Ta sale que ta dale tambien sila diez por ciento dos beses cada año para na maga Levita y gendeh Levita. (Deuteronomio 14:22, 23) Ta usa con este el maga Israelita para na maga especial fiesta y tiene vez, ta usa tambien sila con este para ayuda con el maga bien pobre.​—Deuteronomio 14:28, 29; 26:12.

 Cuanto debe dale el maga Israelita? Ta aparta el maga Israelita ika-diez parte na diila cosecha cada año. (Levitico 27:30) Si sen sila dale en vez de cosecha, debe sila omenta 20 por ciento con este. (Levitico 27:31) Ya manda tambien kanila que dale “diez parte del maga baka y carnero.”​—Levitico 27:32.

 Para iscuji si cosa animal sila dale, el maga Israelita ta iscuji con el cada ika-diez animal que hay sale na diila turil. Asegun na Ley, gendeh sila puede examina o cambia con el iscujido animal y gendeh tambien sila puede paga sen encambio con este. (Levitico 27:32, 33) Pero, el ika-dos diez por ciento que ta usa na maga fiesta cada año puede paga sen. Este provision ya hace mas conveniente para na maga Israelita quien ta viaja largo viaje para atende na maga fiesta.​—Deuteronomio 14:25, 26.

 Cuando ta dale diez por ciento el maga Israelita? Ta dale diez por ciento el maga Israelita cada año. (Deuteronomio 14:22) Pero, gendeh sila ta dale cada ika-siete año. Ese año amo un sabbath o año de descanzo, donde el maga Israelita gendeh ta siembra. (Levitico 25:4, 5) Por causa con este, gendeh sila necesita dale maskin cosa diez por ciento. Na cada ika-tres y ika-seis año del siete-año siclo del Sabbath, el maga Israelita ta dale con el ika-dos diez por ciento para na maga pobre y na maga Levita.​—Deuteronomio 14:28, 29.

 Cosa el castigo si gendeh dale diez por ciento? Na Ley de Moises, nuay habla que debe castiga con el un persona si gendeh le puede dale diez por ciento. El razon si porque ta dale diez por ciento amo para hace alegre con Dios. El maga Israelita necesita habla adelante con Dios que ya dale sila diez por ciento y pidi que bendici kanila el Dios cay ya hace sila con ese. (Deuteronomio 26:12-15) Si gendeh sila dale diez por ciento, dol aquel ya ruba sila con Dios.​—Malaquias 3:8, 9.

 Por demas ba el dalida de diez por ciento? Gendeh. El Dios ya promete con el nacion que si dale sila diez por ciento, hay bendici le kanila y gendeh sila falta maskin cosa. (Malaquias 3:10) Pero si gendeh sila dale diez por ciento, hay sufri sila. Gendeh kanila bendici el Dios y el maga sacerdote y Levita necesita usa con el diila tiempo para trabaja para tiene sila el cosa sila necesita en vez de ayuda con el maga Israelita adora con Dios.​—Nehemias 13:10; Malaquias 3:7.

 Cuando taqui si Jesus na tierra, necesita siempre dale diez por ciento el maga siervo del Dios. Pero, ya quita con este despues muri si Jesus.

Na tiempo de Jesus

 Na parte del Biblia que manada gente ta llama como Nuevo Testamento, el Biblia ta dale mira que ya continua dale diez por ciento el maga Israelita cuando taqui si Jesus na tierra. Ya habla si Jesus que necesita sila dale diez por ciento. Pero, ya condena le con el maga religioso lider quien ta dale diez por ciento pero “gendeh . . . ta pone atencion na maga cosa-cosa mas importante na Ley: como el justicia, el lastima y el fe.”​—Mateo 23:23.

Despues el muerte de Jesus

 Despues del muerte de Jesus, gendeh ya necesita dale diez por ciento. El muerte de Jesus ya quita con el Ley de Moises, incluido ya el mandamiento que “saca . . . dies parte.”​—Maga Hebreo 7:5, 18; Efeso 2:13-15; Colosa 2:13, 14.