Nuay directa menciona na Biblia acerca con el maga dinosaur. Pero, el Biblia ya habla que Dios el “ya hace con todo maga cosa-cosa” poreso claro que entrao este na maga cosa que ya crea le. a (Revelacion 4:11, El Nuevo Testamento na Chavacano) Nuay menciona especifico na Biblia con el maga dinosaur, pero ya discuti este acerca con el cuanto grupo de maga creatura que posible incluido sila:

•   “Maga grande creatura na mar.”​—Genesis 1:21

•   “Todo animal que tan camang na tierra.”​—Genesis 1:25.

•   “Maga mailap animal na tierra.”​—Genesis 1:25.

Yan evolve ba el maga dinosaur estaba na otro animal?

 En vez de hinay-hinay abuya por medio na evolucion, el maga fossil record ta dale mira que dayun ya aparece el maga dinosaur. Uyun este na cosa ta habla el Biblia que el Dios ya crea con el todo maga animal. Por ejemplo, el Salmo 146:6 ya habla que el Dios amo “el Creador del cielo y tierra, del mar y del todo que talli.”

Cuando ya existi el maga dinosaur?

 El Biblia ta habla que ya crea con el maga animal de mar y de tierra durante el ika-cinco y ika-seis dia de creacion. b (Genesis 1:20-25, 31) Entonces el Biblia ta dale mira que el maga dinosaur ya abuya y ya existi por largo tiempo.

Dinosaur ba el Behemot y Leviatan?

 Gendeh. Maskin pa este maga animal que ya menciona na libro de Job gendeh claro puede identifica si cosa, mayoria ta habla que el Behemot amo el hippopotamus y el Leviatan amo el cayuman. Uyun este na cosa ya menciona el Escritura acerca con este maga creatura. (Job 40:15-23; 41:1, 14-17, 31) Maskin cosa pa man, el maga termino “Behemot” y “Leviatan” gendeh puede refiri na maga dinosaur. El Dios ya habla con Job que observa con este maga animal na personal y si Job ya vivi na tiempo que ya dura ya nuay mas el maga dinosaur.​—Job 40:16; 41:8.

Cosa ya pasa con el maga dinosaur?

 Nuay habla na Biblia si paquemodo ya perde el maga dinosaur. Pero este ta habla que el todo cosas ya crea ‘por causa del voluntad del Dios,’ poreso claro que el Dios tiene proposito si porque le ya crea con el maga dinosaur. (Revelacion 4:11) Cuando ya cumpli ya de suyu proposito, el Dios ya permiti que perde ya el maga dinosaur.