Presente Ba el Dios Maskin Donde?

MAN PLAY

El contestacion del Biblia

Ta puede mira el Dios con el todo cosas y puede le hace cosa maskin onde le quierre. (Proverbio 15:3; Maga Hebreo 4:13) Pero, el Biblia gendeh ta enseña que el Dios presente na todo cosas o maskin onde. Sino, ta dale este mira que ele un persona y tiene le un lugar onde ta esta.

Forma del Dios: Un espiritu persona el Dios. (Juan 4:24) El gente gendeh puede mira con ele. (Juan 1:18) El maga vision del Dios que escribido na Biblia pirmi ta dale mira que ele talli na un especifico lugar y gendeh ta existi maskin onde.—Isaias 6:1, 2; Revelacion 4:2, 3, 8.
Lugar onde ta esta el Dios: El Dios ta esta na lugar de maga espiritu que diferente na fisical creacion. Gane, tiene “lugar onde [el Dios] ta esta na cielo.” (1 Rey 8:30) El Biblia ya menciona un ocasion que el maga espiritu creatura “ya para adelante de Jehova” a y ese ta dale mira que el Dios ta esta na un especifico locacion.—Job 1:6.

Si el Dios gendeh presente maskin donde, puede ba gayot le conmigo ayuda?

Si. Importante para con Dios el cada individual. Maskin pa ta esta le na lugar de maga espiritu, ta nota el Dios con aquellos aqui na tierra quien quierre hace alegre con ele y ta ayuda le kanila. (1 Rey 8:39; 2 Cronicas 16:9) Considera si paquemodo si Jehova ta ayuda con aquellos quien sincero ta adora con ele:

Si ta reza tu: Si Jehova ta oi con el de tuyu rezo apenas tu reza.—2 Cronicas 18:31.
Si triste tu: “Cerca si Jehova con aquellos quien dolorido el corazon; Ta salva le con aquellos bien triste.”—Salmo 34:18.
Si necesita tu guia: Si Jehova hay dale contigo “hondo entendimiento y enseña contigo” por medio na de suyu Palabra, el Biblia.—Salmo 32:8.

Cosas gendeh justo acerca na idea que el Dios maskin onde

Gendeh justo idea: El Dios presente na de suyu maga creacion.

Verdad: El Dios gendeh ta esta na tierra ni maskin onde na fisical universo. (1 Rey 8:27) Deverasan que el maga estrellas y el otro maga creacion “ta declara con el gloria del Dios.” (Salmo 19:1) Pero, igual si paquemodo el un pintor gendeh ta esta na de suyu painting, el Dios tambien gendeh ta esta na de suyu maga creacion. Maskin pa ansina, el un painting ta revela maga cosas acerca con el pintor quien ya hace con ese. Na igual manera, el maga creacion na mundo ta revela acerca con el “maga invisible calidad” del Creador, igual como el de suyu poder, sabeduria y amor.—Roma 1:20.

Gendeh justo idea: El Dios debe presente maskin onde para puede le sabe el todo cosas y queda el todo poderoso.

Verdad: Ta usa el Dios con el de suyu sagrao espiritu o activo fuerza, na cosa le ta hace. Por medio con ese, el Dios ta puede sabe y ta puede hace maskin cosa, maskin onde, y maskin cuando, maskin gendeh le presente.—Salmo 139:7.

Gendeh justo idea: El Salmo 139:8 ta enseña que el Dios presente maskin onde cay este ta habla: “Si hay subi yo na cielo, talla tu, y si acusta yo na sepultura, talla tu.”

Verdad: Este texto gendeh ta enseña acerca na locacion del Dios. Sino, ta enseña este que el Dios puede ayuda kanaton maskin onde kita.

a Jehova el nombre del Dios asegun na Biblia.