El Griego nombre del libro de Revelacion, A·po·kaʹly·psis (apocalypse), quierre decir “Ta Revela” o “Ta declara.” Justo este nombre cay el libro de Revelacion ta revela con el maga cosas que escondido y maga suceso que hay sucede largo tiempo pa despues con este escribi. Manada de este maga profecia hay cumpli pa lang.

Sumario del libro de Revelacion

•   Introduccion.​—Revelacion 1:1-9.

•   Maga mensaje de Jesus para na siete congregacion.​—Revelacion 1:10–3:22.

•   Un vision acerca con Dios na de suyu trono na cielo.​—Revelacion 4:1-11.

•   Serie de maga vision que sunod-sunod hay sucede:

  •   Siete sello.​—Revelacion 5:1–8:6.

  •   Siete trompeta; el tres na uliji, ya declara tres maka-lastima suceso.​—Revelacion 8:7–14:20.

  •   Siete tazon o grande taza; el cada tazon ta contene un calamidad que ta representa con el juzgamiento del Dios para na tierra.​—Revelacion 15:1–16:21.

  •   Maga vision acerca na destrozo del maga enemigo del Dios.​—Revelacion 17:1–20:10.

  •   Maga vision acerca na maga bendicion del Dios para na cielo y tierra.​—Revelacion 20:11–22:5.

•   Conclusion.​—Revelacion 22:6-21.

Maga importante detalle que puede kanaton ayuda para entende con el Revelacion

1.   Positivo el mensaje de este y gendeh maka-miedo para con aquellos quien ta sirvi con Dios. Manada el ta asocia con el palabra “apocalypse” na grande destrozo pero el libro de Revelacion ta habla na principio y na fin de este que aquellos quien ta le, ta entende y ta aplica con el mensaje de este hay queda alegre.​—Revelacion 1:3; 22:7.

2.   El Revelacion ta usa manada “señales” o maga simbolo que gendeh debe entende na literal manera.​—Revelacion 1:1, New World Translation.

3.   Manada maga caracter y maga simbolo na libro de Revelacion el ya introduci ya na maga primero libro na Biblia:

   •   Si Jehova​—“el verdadero Dios arriba na cielo” y el Creador del todo cosas.​—Deuteronomio 4:39; Salmo 103:19; Revelacion 4:11; 15:3.

   •   Si Jesucristo​—“el Cordero del Dios.”​—Juan 1:29, El Nuevo Testamento na Chavacano; Revelacion 5:6; 14:1.

   •   Si Satanas Diablo​—el enemigo del Dios.​—Genesis 3:14, 15; Juan 8:44; Revelacion 12:9.

   •   El Grande Babilonia​—igual na Babilonia de antes (Babel), enemigo de Dios Jehova y del de suyu maga siervo y aqui estaba el maga religioso imbusterias.​—Genesis 11:2-9; Isaias 13:1, 11; Revelacion 17:4-6; 18:4, 20.

   •   El “mar”​—maga mal gente que tan contra con Dios.​—Isaias 57:20; Revelacion 13:1; 21:1.

   •   Maga cosas que tiene coneccion na tabernaculo que ta usa de antes na adoranza con Dios​—incluido ya el arca de contrata, el mar que igual como espejo (palanggana), maga lampara, maga ofrecimiento de incenso y un altar de ofrecimiento.​—Exodo 25:10, 17, 18; 40:24-32; Revelacion 4:5, 6; 5:8; 8:3; 11:19.

   •   El maga peligroso grande animal​—ta representa con el maga gobierno del gente.​—Daniel 7:1-8, 17-26; Revelacion 13:2, 11; 17:3.

   •   El maga numero que ya usa na simbolico manera.​—Revelacion 1:20; 8:13; 13:18; 21:16.

4.   El maga vision hay sucede na “dia del Señor” que ya principia del 1914 cuando ya establicia con el Reino del Dios y ya principia rula si Jesus como Rey. (Revelacion 1:10, New World Translation) Poreso, puede kita expecta que el grande cumplimiento del Revelacion hay sucede na diaton tiempo.

5.   Para entende con el libro de Revelacion, necesita tambien kita con el cosas que ta ayuda kanaton entende con el otro parte del Biblia, incluido ya el sabeduria del Dios y el ayuda del aquellos quien ya entende ya con ese.​—Maga Actividad 8:26-39; Santiago 1:5.