Nuay especifico discuti na Biblia acerca con el euthanasia. a Pero, el cosa ta habla aqui acerca na vida y muerte puede ayuda para tiene kita balance mirada. Gendeh aceptable el matada, pero gendeh tambien necesita queda sobra desperado para hace largo el vida del un persona que pamurida ya.

 El Biblia ta llama con Dios como el diaton Creador, “el tuburan del vida.” (Salmo 36:9; Maga Actividad 17:28, NWT) Bien precioso el vida para con Dios. Poreso, ta condena le con el matanza con otro o el matanza del mismo cuerpo. (Exodo 20:13; 1 San Juan 3:15) Omento pa, el Biblia ta habla que debe kita hace manera para protege con el diaton mismo vida y del otro. (Deuteronomio 22:8) Claro que quierre el Dios que aprecia kita con el regalo de vida.

Paquemodo si el un persona bien enfermo que hay resulta na muerte?

 El Biblia gendeh ta permiti que mata con el un persona maskin pa claro que cerca ya este muri. El ejemplo de Rey Saul de Israel ta suporta con este. Cuando bien grabe el de suyu maga irida na guerra, ya pidi le con el de suyu ayudante que mata ya lang con ele. (1 Samuel 31:3, 4) Nuay conforma el ayudante de Saul. Pero, tiene otro gente quien yan imbusterias y ya habla que ya hace le con el cosa ya pidi si Saul. Si David​—un persona quien ta reflecta con el pensamiento del Dios na este cosa—​ya juzga con este gente como culpable de sangre.​—2 Samuel 1:6-16.

Debe ba pricura gayot hace el todo para alarga el vida del un persona?

 Si claro que bien cerca ya muri el un persona, el Biblia gendeh ta habla que necesita extende el vida del un persona para gendeh lang le muri. Sino, el Biblia tiene balance mirada con ese. El muerte amo el diaton enemigo, el resulta del diaton imperfeccion. (Roma 5:12; 1 Corinto 15:26) Deverasan, no quierre kita muri, pero gendeh tambien kita necesita tiene miedo muri cay ya promete el Dios que hay resucita le con el maga muerto. (Juan 6:39, 40) El un persona quien ta dale valor con el vida hay busca el de con todo buen manera para queda bueno. Pero, gendeh este quierre decir que iscuji manera de curada para lang alarga el vida que amo-amo ya lang el resuello.

El suicide ba un pecado que gendeh puede perdona?

 Gendeh. Nuay inclui el Biblia con el suicide na maga pecado que gendeh puede perdona. Maskin pa el matanza del mismo cuerpo un serioso pecado, b ta entende el Dios con el maga razon que posible causa de este, igual na enfermedad na pensamiento, sobra stress o maga custumbre que na herencia ya. (Salmo 103:13, 14) Por medio na Biblia, ta dale le comforta con aquellos bien triste. Omento pa, el Biblia ta habla que “el maga gente bueno y el maga pecador ay resucita.” (Maga Actividad 24:15, El Nuevo Testamento na Chavacano) Ta dale este mira que tiene esperanza que vivi otravez aquellos quien ya puede hace maga serioso culpa igual na suicide.