Nuay. El Biblia claro ta habla que el Dios ya crea con el maga gente pati con el diferente “clase” de animal y siembra. a (Genesis 1:12, 21, 25, 27; Revelacion 4:11) Este ta habla que el todo gente ya sale con Adan y Eva, el diaton primer mayores. (Genesis 3:20; 4:1) Gendeh ta suporta el Biblia con el teoria que el Dios ya usa con el evolucion para crea con el diferente clase de vida. Pero, gendeh tan contra el Biblia na cosa ta habla el ciencia que tiene diferente forma na cada clase de vida.

•  Ya usa ba el Dios con el evolucion?

•  Tan uyun ba el evolucion na Biblia?

•  Quetal el abilidad del maga siembra y animal para cambia para puede sobrevivi na de este alrededor?

 El maga gente, quien ta creé que ya usa el Dios evolucion para crea con el vida, tiene diferente opinion acerca si paquemodo le con ese ya hace. Asegun na Encyclopædia Britannica, tiene maga gente ta creé que el “natural selection amo uno na maga proceso que ya usa el Dios para crea vida.”

 Incluido tambien na diila opinion:

•   Todo vivo creatura ya sale na un organismo que ya dura ya ta existi.

•   El un clase de forma de vida puede man evolve na un bien diferente clase de forma de vida.

•   El Dios el responsable na este maga proceso.

 El idea que ya usa el Dios con el evolucion para crea vida ta dale mira que gendeh justo el cosa ta habla na Biblia acerca na creacion. Pero, si Jesus ya habla que deverasan el cosa ta refiri na Genesis. (Genesis 1:26, 27; 2:18-24; Mateo 19:4-6) El Biblia ta habla que antes vene na tierra, si Jesus ta vivi ya na cielo junto con Dios y ya ayuda le con Dios hace “todo el maga cosa-cosa.” (Juan 1:3, El Nuevo Testamento) Entonces, el idea que ya usa el Dios evolucion para hace diferente forma de vida gendeh uyun na cosa ta enseña el Biblia.

 El Biblia gendeh ta habla si cuanto diferente forma puede tiene el un creatura. Gendeh tambien este tan contra na verdad que el diferente clase de animal y siembra que ya crea el Dios puede cambia mientras ta queda sila manada o ta cambia para puede sobrevivi na nuevo alrededor. Maskin ta mira el otro que ese maga cambio un forma de evolucion, nuay nuevo clase de vida el ta produci.