Tiene cuanto maga rezo que gendeh ta contesta el Dios. Considera con el dos razon si porque el Dios gendeh ta oi con el rezo del un persona.

1. El rezo gendeh harmonia na voluntad del Dios

 El Dios gendeh ta contesta con el rezo que gendeh uyun na de suyu voluntad que puede incuntra na Biblia. (1 San Juan 5:14) Por ejemplo, el Biblia ta habla que evita kita queda hambriento. El maga juego que envuelto el sen ta causa para queda hambriento el un persona. (1 Corinto 6:9, 10) Entonces, gendeh contesta el Dios con el rezo del un persona si ta reza le que ganá le na loto. El Dios gendeh un genie que puede lang tu manda para cumpli o hace todo cosa tu quierre. Gane, debe tu rindi gracias cay gendeh ansina el Dios. Cay si deverasan un genie el Dios, makamiedo pensa si cosa posible pidi el maga gente con ele.—Santiago 4:3.

2. Rebelioso el persona quien ta reza

 Gendeh ta oi el Dios con el rezo de aquellos quien determinao desobedece con ele. Por ejemplo, el Dios ya habla con aquellos quien ta clama que ta sirvi con ele pero desobediente: “Maskin pa ta reza ustedes manada beses, gendeh yo ta oi; el de ustedes mano lleno de sangre.” (Isaias 1:15) Pero si ‘arregla sila el maga cosas entre con Dios’ y cambia, hay oi kanila el Dios si reza sila con ele.—Isaias 1:18.