Deverasan ya sucede el Grande Avenida. Ya causa este el Dios para destroza con el maga malo, pero ya manda le construi un arca con Noe para preserva con el maga buen gente y con el maga animal. (Genesis 6:11-20) Puede kita creé que deverasan ya sucede el Grande Avenida cay escribido este na Biblia que “inspirao de Dios.”​—2 Timoteo 3:16, El Nuevo Testamento na Chavacano.

•  Deverasan o istoria-istoria lang?

•  Porque ya sucede el Grande Avenida?

•  Sabe ba el maga gente que llega el Grande Avenida?

•  Cosa el ichura del arca de Noe?

•  Paquemodo de tarda ya acaba construi si Noe con el arca?

•  Maga gendeh deverasan istoria acerca na Grande Avenida

 El Biblia ta indica que un deverasan persona si Noe y deverasan ya sucede el Grande Avenida. Gendeh este un istoria-istoria lang.

•   El maga escritor del Biblia ta creé que un deverasan persona si Noe. Por ejemplo, el maga escritor del Biblia que si kanda Esdras y Lucas yan research y ya inclui con Noe na linea de descendencia del nacion de Israel. (1 Cronicas 1:4; Lucas 3:36) El maga escritor del Evangelio que si kanda Mateo y Lucas, ya escribi con el cosa ya habla si Jesus acerca con Noe y con el Grande Avenida.​—Mateo 24:37-39; Lucas 17:26, 27.

   Si profeta Ezequiel y si apostol Pablo ya menciona tambien con Noe como un ejemplo de fe y pagka-recto. (Ezequiel 14:14, 20; Maga Hebreo 11:7) Hay refiri ba este maga escritor con el un persona que nuay existi como un ejemplo que debe imita? Claro que si Noe y el otro pa fiel hombre y mujer amo maga buen ejemplo para imita cay maga deverasan persona sila.​—Maga Hebreo 12:1; Santiago 5:17.

•   El Biblia ta dale especifico detalle acerca con el Grande Avenida. El Biblia ta menciona con el año, mes y el dia del suceso que conectao na Grande Avenida. (Genesis 7:11; 8:4, 13, 14) Ta menciona tambien este con el grandor del arca que ya construi si Noe. (Genesis 6:15) Este maga detalle ta dale mira que deverasan el cosa ta habla el Biblia acerca na Grande Avenida y gendeh un istoria-istoria lang.

 Asegun na Biblia, “el maldad del gente abundancia na tierra” antes sucede el Grande Avenida. (Genesis 6:5) Ta habla tambien este que “el tierra ya queda destrozao na mirada del verdadero Dios” cay el mundo ya llena de violencia y sexual imoralidad.​—Genesis 6:11; San Judas 6, 7.

 El Biblia ta habla que ya sucede este maga problema por causa del maga mal angel quien ya abaja na tierra para tiene relacion na maga mujer. Este maga angel ya tiene maga anak que ta llama Nefilim, quien ya causa peligro y sufrimiento na maga gente de aquel tiempo. (Genesis 6:1, 2, 4) Ya decidi el Dios que limpia con el maga malo na tierra y ya permiti con el maga buen gente para principia otravez.​—Genesis 6:6, 7, 17.

 Si. Ya habla el Dios con Noe si cosa sucede y ya manda con ele construi arca para preserva con el de suyu familia y con el maga animal. (Genesis 6:13, 14; 7:1-4) Ya habla si Noe con el maga gente acerca con el destruccion que hay llega pero ya ignora sila con el de suyu aviso. (2 Pedro 2:5) El Biblia ta habla que “noay sila suspecha ni nada hasta ya llega el avenida y ya man anud sila todo.”​—Mateo 24:37-39.

 El arca amo un bien grande cuadrao cajon que maga 133 metro (437 pies) el largor, 22 metro (73 pies) el anchor y 13 metro (44 pies) el altor. a El arca hacido de maga pono que madagta y ya tapa con este de alquitran apuera y adentro. Tiene este tres piso o andana, y tiene este maga division. Este arca tiene puerta na costao y maga bentana arriba. Poco alzao el medio del techo para gendeh man pondo el agua na techo.​—Genesis 6:14-16.

 Nuay menciona el Biblia si paquemodo de tarda ya acaba construi si Noe con el arca, pero ta sale que ya llega pa cuanto decada antes le ya acaba construi con este. Mas de 500 año si Noe cuando ya nace el de suyu primer anak hombre y 600 año le cuando ya llega el Grande avenida. b​—Genesis 5:32; 7:6.

 Cuando ya manda el Dios con Noe que planta con el arca, grande ya el de suyu maga anak y casao, posible 50 o 60 año ya el ya pasa. (Genesis 6:14, 18) Base na este posibilidad, razonable para habla que ya alcanza 40 o 50 año el construida del arca.