El grande tribulacion amo el de con todo dificil tiempo que hay experiencia el maga gente. Asegun na profecia na Biblia, hay sucede se durante na “ultimo maga dia” o na “tiempo del fin.” (2 Timoteo 3:1, El Nuevo Testamento na Chavacano; Daniel 12:4) “Na esos maga dias ay tene sufrimiento, como noay gayot sucede desde el principio del creacion, que el Dios ya hace, hasta ahora . . . y nunca ay sucede” otravez.—Marcos 13:19; Daniel 12:1; Mateo 24:21, 22.

Maga suceso durante el grande tribulacion

•   Destrozo del falso religion. Paspas hay destroza con el falso religion. (Revelacion 17:1, 5; 18:9, 10, 21) El maga gobierno que ta representa el United Nations amo el cumpli con el voluntad del Dios que destroza con el falso religion.—Revelacion 17:3, 15-18. a

•   Ataque na verdadero religion. El “Gog na tierra de Magog” que ya menciona na vision de Ezequiel ta representa con el alianza del maga nacion. Hay pricura sila destroza con aquellos quien parte del verdadero religion. Pero, hay protege el Dios con el de suyu maga siervo.—Ezequiel 38:1, 2, 9-12, 18-23.

•   Juzgamiento na maga gente. Hay juzga si Jesus con el todo gente y “ay separta Le canila en dos grupo, igual como el pastor ta separta el maga carnero con el maga cabrito.” (Mateo 25:31-33) El de suyu juzgamiento na cada persona hay depende si ta suporta ba sila o gendeh con el “maga hermano” de Jesus quien hay rula junto con ele na cielo.—Mateo 25:34-46.

•   Ajuntada de aquellos quien rula na Reino. El maga fiel persona quien rula junto con el Cristo hay resucita na cielo despues del diila muerte aqui na tierra.—Mateo 24:31; 1 Corinto 15:50-53; 1 Tesalonica 4:15-17.

•   Armagedon. Este “guerra del Grande Dia del Dios todopoderoso” ta llama tambien como “el dia de Jehova.” (Revelacion 16:14, 16; Isaias 13:9; 2 Pedro 3:12) Hay destroza el Cristo con aquellos con quien le condena. (Sofonias 1:18; 2 Tesalonica 1:6-10) Hay destroza tambien con el sistema de politica na entero mundo que ya ilustra na Biblia como el peligroso grande animal que tiene siete cabeza.—Revelacion 19:19-21.

Maga suceso despues del grande tribulacion

•   Hace preso con Satanas y con el maga demonio. El un poderoso angel hay buta con Satanas y con el maga demonio “na hondura” donde na ese condicion, dol muerto sila y nuay mas cosa puede hace. (Revelacion 20:1-3, NWT) Gendeh mas puede engaña si Satanas con maskin quien na ese tiempo.—Revelacion 20:7.

•   Principia el Milenio. Hay principia el 1,000 año rulanza del Reino del Dios que hay lleva manada bendicion para na maga gente. (Revelacion 5:9, 10; 20:4, 6) “Bien mucho maga gente que no puede conta” el quien “sale victorioso na grande persecucion” o tribulacion. Hay mira sila con el principio del 1,000 año rulanza del Reino aqui na tierra.—Revelacion 7:9, 14; Salmo 37:9-11.