El guerra de Armagedon ta refiri con el ultimo guerra entre con el maga gobierno del gente y con el Dios. Maskin ahora, este maga gobierno y quien ta suporta con ese tan contra con el Dios. Gendeh sila ta somete na de suyu rulanza. (Salmo 2:2) El guerra de Armagedon hay termina con el rulanza del gente.​—Daniel 2:44.

 El palabra “Harmaguedon” o Armagedon una vez lang ya aparece na Biblia, na Revelacion 16:16. (El Nuevo Testamento na Chavacano) Ya predicta na Revelacion que “na un lugar que ta llama na Hebreo Harmaguedon,” hay ajunta “con todo el rey na mundo . . . para na guerra del Grande Dia del Dios todopoderoso.”​—Revelacion 16:14.

 Quien el man guerra na Armagedon? Si Jesucristo hay guia con el maga soldao del Dios na cielo para ganá na guerra contra na maga contrario del Dios. (Revelacion 19:11-16, 19-21) Incluido na este maga contrario aquellos quien tan contra na autoridad del Dios y aquellos quien gendeh ta respeta con ele.​—Ezequiel 39:7.

 El Armagedon ba literal hay sucede na Middle East? Gendeh. En vez na un lugar lang, el guerra de Armagedon hay sucede na entero tierra.​—Jeremias 25:32-34; Ezequiel 39:17-20.

 El Armagedon, que tiene vez ta refiri como “Har–Magedon” (Har Meghiddohnʹ na Hebreo), quierre decir “Monte de Megido.” El Megido amo uno na maga ciudad na teritorio del Israel de antes. Puede le na historia que tiene maga grande guerra que ya sucede na ese lugar, incluido ya el cuanto que ya menciona na Biblia. (Juez 5:19, 20; 2 Rey 9:27; 23:29) Pero, el Armagedon gendeh ta refiri na literal lugar cerca na Megido de antes. Nuay grande monte alla y maskin pa hace junto con el entero Patag Lugar de Jezreel, gendeh cabe alla el todo quien hay man guerra contra con Dios. Sino, el Armagedon hay sucede na entero mundo, donde man junto-junto el maga nacion para man contra con el rulanza del Dios.

 Cosa hay sucede durante el guerra de Armagedon? No sabe kita si paquemodo usa el Dios con el de suyu poder, pero puede le usa con el maga cosas que ya usa ya le de antes​—ulan de hielo, temblor, fuerte ulan que ta causa avenida, fuego y azufre, kirlat y enfermedad. (Job 38:22, 23; Ezequiel 38:19, 22; Habacuc 3:10, 11; Zacarias 14:12) Causa tambien el Dios que man libug el cuanto na maga enemigo de suyu para mata sila con uno y otro. Pero na uliji, hay puede sila realiza que el Dios el tan guerra contra kanila.​—Ezequiel 38:21, 23; Zacarias 14:13.

 El Armagedon ba amo el fin del mundo? Gendeh este el fin del diaton planeta, ciendo el tierra amo el permanente lugar onde queda el maga gente. (Salmo 37:29; 96:10; Eclesiastes 1:4) Na Armagedon, en vez destroza con el todo maga gente, hay sale salvao el “bien mucho maga gente” quien ta sirvi con Dios.​—Revelacion 7:9, 14; Salmo 37:34.

 El palabra “mundo” ta refiri tiene vez na tierra. Pero na Biblia, ta refiri tambien este con el maga mal gente quien tan contra con Dios. (1 San Juan 2:15-17) Na este manera, el Armagedon amo el “fin del mundo.”​—Mateo 24:3.

 Cuando hay sucede el Armagedon? Cuando ya discuti si Jesus acerca el “grande calamidad” o grande tribulacion que hay termina na guerra de Armagedon, ele ya habla: “Concierne ese dia pati hora, noay quien sabe esos, ni el maga angel na cielo, ni el Anak, sino el Tata lang.” (Mateo 24:21, 36) Maskin pa ansina, el Biblia ta dale mira que hay sucede el Armagedon durante el presencia de Jesus que ya principia del 1914.​—Mateo 24:37-39.