Gendeh igual el todo religion. El Biblia ta contene manada ejemplo del maga religion que gendeh aceptable con Dios. Actualmente, ta cae este na dos categoria.

Categoria 1: Adoranza na maga falso dios

 El Biblia ya usa con el maga termino “ilusion,” “nuay valor” y “nuay sirvi” acerca na adoranza na maga falso dios. (Jeremias 10:3-5; 16:19, 20) Si Dios Jehova a ya dale mandato con el nacion del Israel de antes: “Gendeh tu debe adora na otro maga dios puera conmigo.” (Exodo 20:3, 23; 23:24) “Bien rabiao gayot si Jehova” cuando el maga Israelita ya adora na otro maga dios.—Numero 25:3; Levitico 20:2; Juez 2:13, 14.

 Igual lang siempre el mirada del Dios con el adoranza na “maga dios-dios.” (1 Corinto 8:5, 6; Galacia 4:8) Ele ya manda con aquellos quien quierre adora con ele que no mas ya asocia con el maga gente quien ta practica con el falso religion. Ele ya habla: “Desaleja . . . y no man junto canila.” (2 Corinto 6:14-17) Si igual lang el todo religion y ta guia con el maga gente para con Dios, porque le ya dale con ese mandamiento?

Categoria 2: Adoranza con el verdadero Dios na manera que gendeh aceptable con ele

 Tiene maga ocasion, el maga Israelita ya usa con el maga creencia y practica que estaba na adoranza na maga falso dios na diila adoranza con Jehova. Pero, nuay acepta el Dios con el idea que mezcla maga cosas falso na verdadero adoranza. (Exodo 32:8; Deuteronomio 12:2-4) Ya condena si Jesus con el maga lider del religion na de suyu tiempo por causa na manera del diila adoranza con Dios. Ta dale sila mira que dol maga religioso sila pero el deverasan, ‘gendeh sila ta pone atencion na maga cosa-cosa mas importante na Ley: como el justicia, el lastima y el fe.’—Mateo 23:23.

 Ansina tambien ahora, el religion lang que base na verdad amo el ta guia con el maga gente para con Dios. Este verdad puede incuntra na Biblia. (Juan 4:24; 17:17; 2 Timoteo 3:16, 17) El maga religion que tiene maga enseñanza que gendeh uyun na Biblia, ta hace lejos con el maga gente con Dios. Ta pensa el maga gente que base na Biblia el manada maga enseñanza que estaba con aquellos quien ta adora na maga falso dios igual como el Trinidad, imortal alma y sufrimiento hasta para cuando na infierno. El adoranza que ta introduci ansina maga enseñanza amo “no vale nada” o nuay sirvi cay ta dale este mas importancia con el tradicion del religion contra na cosa ta manda el Dios.—Marcos 7:7, 8.

 Ta odia el Dios con el hipocresia del maga religion. (Tito 1:16) Para puede ayuda con el maga gente queda cerca con Dios, el un religion debe puede ayuda con el gente na todo aspeto del diila vida y gendeh lang este puro maga ritual o formalidad. Por ejemplo, el Biblia ta habla: “Si tiene quien ta pensa que ele un gente religioso, pero gendeh le ta controla el disuyo boca, ta engaña lang le con el disuyo mismo cuerpo y no sirvi nada el disuyo religion. El deverasan y perfecto religion na ojos del Dios, el diaton Tata, amo este: Ayuda con el maga iluh y maga viuda na diila maga necesidad y desaleja con todo maga cosa-cosa malo na mundo.” (Santiago 1:26, 27) El version El Nuevo Testamento na Chavacano ya usa con el expresion “deverasan y perfecto religion” para na verdadero y limpio adoranza.