Ya salva si Jesus con el maga fiel gente cuando ya dale le de suyu vida como un rescate. (Mateo 20:28) Poreso, el Biblia ta habla que si Jesus ya “salva con el mundo.” (1 San Juan 4:14, El Nuevo Testamento na Chavacano) Ta habla tambien este: “De todo maga nombre que ya dale con el maga gente na mundo, por medio lang de este Nombre ta puede kita recivi el salvacion.”​—Maga Actividad 4:12.

 Si Jesus ‘ya experiencia muerte para el bien de todo’ quien ta demonstra fe con ele. (Maga Hebreo 2:9; Juan 3:16) Despues, “el Dios ya hace con Ele levanta entre na maga muerto” y ya bira si Jesus na cielo como un espiritu creatura. (Maga Actividad 3:15) Alla, si Jesus ya puede “salva con aquellos quien ta anda con Dios por medio disuyo, siendo ta vivi Le firmi para reza afavor diila.”​—Maga Hebreo 7:25.

Porque necesita reza si Jesus afavor kanaton?

 Todo kita ta comete pecado. (Roma 3:23) Por causa na pecado, tiene sanggadura entre kanaton y con Dios y ta resulta se na muerte. (Roma 6:23) Pero si Jesus ta ayuda con aquellos quien ta demonstra fe na sacrificio que ya hace le. (1 San Juan 2:1) Ta reza le afavor kanila y ta pidi con Dios que oi con el diila maga rezo y perdona kanila base na rescate de Jesus. (Mateo 1:21; Roma 8:34) Ta contesta el Dios con el rezo de Jesus ciendo harmonia este na De Suyu voluntad. Ya imbia el Dios con Jesus aqui na tierra “para el mundo ay puede salva por medio disuyo.”​—Juan 3:17.

Bastante ya ba el creencia con Jesus para salva?

 Gendeh. Maskin pa debe kita creé con Jesus para tiene salvacion, mas pa con ese el necesita hace. (Maga Actividad 16:30, 31) El Biblia ta habla: “El cuerpo ta muri si noay mas ya el espiritu. Ansina tamen el fe ta muri si noay maga trabajo bueno.” (Santiago 2:26) Para salva, debe kita:

•   Aprende acerca con Jesus y con el de suyu Tata, si Jehova.​—Juan 17:3.

•   Tiene fe kanila.​—Juan 12:44; 14:1.

•   Demonstra fe kanila y obedece con el diila maga mandamiento. (Lucas 6:46; 1 San Juan 2:17) Ya enseña si Jesus que gendeh todo quien ta llama con ele “Señor” hay salva sino aquellos lang quien “ta hace el voluntad del [de suyu] Tata na cielo.”​—Mateo 7:21.

•   Continua demonstra fe maskin pa ta experiencia maga dificultad. Ya hace se claro si Jesus cuando ya habla le: “Pero si quien ay resisti hasta el fin, ay salva gayot.”​—Mateo 24:13.