En vez de decidi para kanaton o plaña diaton vida, ya dale kanaton el Dios el libertad para hace diaton mismo decision y ese ta dale mira que ta trata le kanaton con dignidad. Considera si cosa ta enseña el Biblia.

•   Ya crea el Dios con el maga gente asegun na de suyu imagen. (Genesis 1:26) Gendeh igual na maga animal que ta sigui lang na diila instinct, tiene kita el capacidad dale mira maga calidad igual na amor y justicia. Y igual na diaton Creador, tiene kita el libertad para hace decision.

•   Mas pa, el diaton futuro ta depende si cosa kita iscuji. El Biblia ta anima kanaton que “iscuji con el vida” por medio de oi con Dios o obedece con el de suyu maga mandamiento. (Deuteronomio 30:19, 20) Queda este nuay valor si nuay kita el libertad para hace decision. En vez de forza kanaton el Dios hace si cosa le ta habla, ya pidi le kanaton: “Si pone lang tu atencion con el de mio maga mandamiento, el de tuyu paz hay queda como igual na un rio.”—Isaias 48:18.

•   Nuay adelantao plaña con el diaton vida—si tiene ba kita buen exito na vida o gendeh. Si quierre kita tiene buen exito na vida, debe kita hace esfuerzo. El Biblia ta habla: “El cosa que puede tu hace, hace con todo fuerza.” (Eclesiastes 9:10) Ta habla tambien este: “El maga plano del buen trabajador, asigurao hay tiene buen exito.”—Proverbio 21:5.

 El libertad para hace decision amo un precioso regalo estaba con Dios y ta dale este oportunidad kanaton que ama con ele “con todo el [diaton] corazon.”—Mateo 22:37, El Nuevo Testamento na Chavacano.

 El Biblia ta enseña que el Dios todopoderoso, quierre decir nuay quien puede limita con el de suyu poder. (Job 37:23; Isaias 40:26) Pero, gendeh le ta usa con el de suyu poder para controla con el todo cosas. Por ejemplo, el Biblia ta habla que el Dios “ya controla con el [de suyu] cuerpo” contra na Babilonia de antes que enemigo del de suyu maga siervo. (Isaias 42:14) Ahora tambien, ta permiti le con aquellos quien gendeh ta usa enbuenamente con el diila libertad para decidi que hace malo con otro. Pero, gendeh se ele permiti hasta para cuando.—Salmo 37:10, 11.