El Biblia ta habla que quierre el Dios que el maga gente “queda . . . lejos na maga immoralidad.” (1 Tesalonica 4:3, El Nuevo Testamento na Chavacano) Na Biblia, entrao na “immoralidad” el adulterio, maga trabajo de homosexual y sexual relacion entre na un hombre y un mujer que gendeh casao.

•  Porque importante con Dios que casa?

•  Quetal si man live-in anay antes casa para sabe si man tupajan ba sila?

•  Paquemodo el man maridable puede hace fuerte con el diila matrimonio?

•   El matrimonio amo un arreglamiento que estaba con Dios. Ele el quien ya origina con ese cuando ya hace le junto con el primer man maridable. (Genesis 2:22-24) Gendeh proposito de suyu que el un hombre y un mujer hay queda junto maskin nuay casa.

•   Sabe el Dios si cosa el mas bueno para na maga gente. Asegun na proposito del Dios, el matrimonio amo un permanente relacion entre na un hombre y un mujer donde hay beneficia el todo miembro del familia y hay tene sila seguridad. Considera con el un simple ilustracion. Igual si paquemodo el maga instruccion estaba na un factoria ta dale mira contigo si paquemodo man assemble enbuenamente con el un furniture, el maga instruccion tambien estaba con Dios ta dale mira kanaton si paquemodo tene un alegre familia. Pirmi ta beneficia aquellos quien ta sigui con el maga principio del Dios.—Isaias 48:17, 18.

•   El sexual relacion apuera na matrimonio tiene maga mal resulta. Por ejemplo, el un mujer puede man priñada que nuay na plano, tene enfermedad que ta puede saca si ta man sexo y problema na emocion.

•   El Dios ya dale abilidad con el hombre y mujer para tene anak por medio na sexo. Sagrao el vida para con Dios y un regalo estaba con ele el abilidad para tene maga anak. Quierre el Dios que dale kita importancia con este regalo. Puede se kita hace si honra kita con el arreglamiento de matrimonio.—Maga Hebreo 13:4.

 Para tene un alegre matrimonio, gendeh necesita que queda anay junto por cuanto tiempo antes casa. Sino, ta queda fuerte el relacion del man maridable si determinao sila esta leal con uno y otro y ta man ayudajan para enfrenta con el maga problema. a El matrimonio ta hace fuerte con ese determinacion.—Mateo 19:6.

 Nuay perfecto matrimonio. Pero si aplica el man maridable con el maga consejo na Biblia, puede sila tene un alegre matrimonio. Este el cuanto maga ejemplo:

•   Hace una el bien de suyu antes el de tuyu mismo cuerpo.—1 Corinto 7:3-5; Filipo 2:3, 4.

•   Cultiva amor y respeto para con uno y otro.—Efeso 5:25, 33.

•   Pensa antes converza.—Proverbio 12:18.

•   Queda paciencioso y perdona dayun.—Colosa 3:13, 14.