El maga buen amigo o amiga puede ayuda kanaton para queda alegre y tene buen exito na vida. Puede tambien sila ayuda kanaton para queda mas buen gente.—Proverbio 27:17.

 Pero, ta habla el Biblia que bien importante que iscuji kita enbuenamente si con quien man amigo. Ta dale este aviso si cosa el resulta si iscuji kita maga gendeh buen amigo. (Proverbio 13:20; 1 Corinto 15:33) Ese maga clase de amigo puede influencia kanaton para hace maga gendeh justo decision o afecta se na diaton maga buen calidad.

Na este articulo

•  Cosa el un buen amigo?

•  Si acerca na maga man amigo, quien el maga buen ejemplo na Biblia?

•  Puede ba el maga gente queda amigo del Dios?

•  Maga texto na Biblia acerca na amistad

 Ta enseña el Biblia que si quierre kita tene maga buen amigo, gendeh lang kita debe man base si quien tiene igual diaton interes o hilig. Por ejemplo, el Salmo 119:63 ta habla: “Amigo yo del todo quien ta tiene miedo contigo a y de aquellos quien ta sigui con el de tuyu maga ley.” Nota que el escritor del Biblia ya habla que ya iscuji le maga amigo aquellos quien ta pricura hace alegre con Dios y ta vivi asegun na maga principio De Suyu.

 Ya menciona tambien el Biblia si cosa maga calidad debe tene el un buen amigo. Por ejemplo:

•   “El verdadero amigo ta ama na todo tiempo, y un hermano quien ya nace para na tiempo de dificultad.”—Proverbio 17:17.

•   “Tiene maga man uban quien ta hace malo con uno y otro, pero tiene un amigo que leal pa na un hermano.”—Proverbio 18:24.

 Este maga versiculo ta enseña kanaton que el un buen amigo leal, amable, bueno y bondadoso. Puede kita confia que suporta le kanaton si tiene kita problema. Tiene tambien le el coraje para habla kanaton si tiene kita cosa ta hace gendeh bueno o cerca ya kita hace un mal decision.—Proverbio 27:6, 9.

 El Biblia ta contene maga ejemplo de maga buen man amigo que tiene diferente maga edad, background, cultura y autoridad. Considera con este tres ejemplo.

•   Si Rut y Noemi. Si Rut amo yerna de Noemi y grande el diferencia na diila edad. Mas pa, diferente tambien el cultura de Rut con Noemi. Maskin pa ansina, tiene sila bien cerca relacion como man amiga.—Rut 1:16.

•   Si David y Jonatan. Maskin pa 30 año mas mayor si Jonatan con David, el Biblia ta habla que sila “ya queda bien cerca man amigo.”—1 Samuel 18:1.

•   Si Jesus y el de suyu maga apostoles. Alto el posicion de Jesus contra na de suyu maga apostoles cay ele el diila maestro y señor. (Juan 13:13) Pero, nuay le pensa que gendeh sila conviene queda amigo de suyu. Sino, tiene cerca relacion si Jesus con aquellos quien ta sigui na de suyu maga enseñanza. Ya habla le: “Ta llama yo con ustedes maga amigo cay ya manda yo con ustedes sabe todo el que ya oi yo con mi Tata.”—Juan 15:14, 15.

 Si, puede queda amigo del Dios el maga gente. El Biblia ta habla: “Tiene Le buen amistad con el maga recto.” (Proverbio 3:32) Quierre decir, ta iscuji el Dios como amigo con aquellos quien ta pricura queda decente, bueno y honesto, y ta hace esfuerzo para sigui na de suyu maga principio de bueno y malo. Por ejemplo, na Escritura, ya llama con el fiel hombre que si Abraham como amigo del Dios.—2 Cronicas 20:7; Isaias 41:8; Santiago 2:23.