Maga Mujer na Biblia—Cosa Kita Puede Aprende Kanila?

MAN PLAY

El contestacion del Biblia

Na Biblia, puede kita le acerca na maga mujer quien puede kanaton enseña importante leccion. (Roma 15:4; 2 Timoteo 3:16, 17) Este articulo ta discuti cuanto maga mujer que ya menciona na Biblia. Manada kanila maga buen ejemplo para imita. El otro gendeh buen ejemplo para kanaton.—1 Corinto 10:11; Maga Hebreo 6:12.

Abigail

Quien si Abigail? Ele el mujer del rico pero mal custumbre hombre, el nombre si Nabal. Pero, si Abigail sabio y humilde. Puera con ese, bonita ele na fisical y na espiritual.—1 Samuel 25:3.

Cosa le ya hace? Ya actua si Abigail con sabeduria para evita con el peligro. Ele y si Nabal ta queda na lugar onde ta esconde si David, el quien hay queda rey del Israel na futuro. Mientras talla si David y el de suyu maga gente, ta protege sila con el maga carnero de Nabal para gendeh con este ruba. Pero cuando el maga mensajero de David ya pidi poco comida con Nabal, nuay le conforma dale. Bien rabiao si David! Poreso, ele y el de suyu maga gente ya anda para mata con Nabal y con el todo hombre na de suyu casa.—1 Samuel 25:10-12, 22.

Ya actua dayun si Abigail cuando ya sabe le si cosa el de suyu marido ya hace. Ya dale le con el de suyu maga siervo maga comida para lleva con David y con el de suyu maga gente. Y ya sigui tambien le para pidi con David que dale kanila mira lastima. (1 Samuel 25:14-19, 24-31) Cuando ya mira si David con el de suyu regalo, ya observa con el de suyu humildad y ya oi con el de suyu buen consejo, ya realiza si David que ya usa el Dios con Abigail para evita este tragedia. (1 Samuel 25:32, 33) Nuay dura, ya muri si Nabal y si Abigail ya queda mujer de David.—1 Samuel 25:37-41.

Cosa kita puede aprende con Abigail? Maskin bonita y rico si Abigail, tiene le balance mirada na de suyu mismo cuerpo. Para tiene paz, preparao le pidi perdon maskin gendeh de suyu culpa. Calmao le ya enfrenta con el dificil situacion y ya dale mira respeto, coraje y sabeduria.

▸ Para na mas informacion acerca con Abigail, mira con el articulo “She Acted With Discretion.”

Debora

Quien si Debora? Un profeta mujer le con quien el Dios de Israel, si Jehova, ya usa para habla con el De Suyu maga gente si cosa Le quierre que hace sila. Ya usa tambien con ele el Dios para ayuda solva con el maga problema del maga Israelita.—Juez 4:4, 5.

Cosa le ya hace? Si Debora con coraje ya suporta con aquellos quien ta adora con Dios. Na De Suyu direccion, ya habla si Debora con Barak que guia con el maga Israelita soldao na guerra contra con el maga Canaanita quien ta maltrata kanila. (Juez 4:6, 7) Cuando ya pidi si Barak que man junto con ele si Debora, nuay le tiene miedo sino ya conforma le na cosa ya habla si Barak.—Juez 4:8, 9.

Despues ganá el maga Israelita por causa na ayuda del Dios, si Debora yan compose con el cuanto parte del cancion que ya canta sila de Barak acerca na cosa ya sucede. Na ese cancion, ya menciona si Debora si cosa ya hace si Jael, un animoso mujer tambien, para hace perde con el maga Canaanita.—Juez, capitulo 5.

Cosa kita puede aprende con Debora? Si Debora conforme hace maga sacrificio y animoso. Ya anima le con otro para hace si cosa el justo na ojos del Dios. Cuando ya hace sila se, ya menciona le con el maga buen cosas que ya hace sila.

▸ Para na mas informacion acerca con Debora, mira con el articulo “I Arose as a Mother in Israel.”

Delaila

Quien si Delaila? Ele el mujer con quien ya ama si Samson, un juez na Israel.—Juez 16:4, 5.

Cosa le ya hace? Ya acepta le sen estaba na maga Filisteo oficial para traiciona con Samson, con quien ya usa el Dios para salva con el maga Israelita contra na maga Filisteo. No puede ganá el maga Filisteo contra con Samson por causa na fuerza que ya dale con ele el Dios. (Juez 13:5) Poreso, el maga oficial ya pidi ayuda con Delaila.

El maga Filisteo ya ofrece sen con Delaila para sabe si onde estaba el fuerza de Samson. Ya acepta si Delaila con el sen y despues del cuanto manera, ya puede le sabe si cosa el secreto de Samson. (Juez 16:15-17) Despues, ya habla le si cosa el secreto de Samson con el maga Filisteo, quien ya cuji y ya hace preso con este.—Juez 16:18-21.

Cosa kita puede aprende con Delaila? Gendeh buen ejemplo si Delaila para kanaton. Por causa na amor na sen, ya traiciona le y nuay esta leal na un siervo de Dios Jehova.

Ester

Quien si Ester? Un Judio le con quien ya iscuji si Rey Asuero de Persia para queda de suyu reyna.

Cosa le ya hace? Si Reyna Ester ya usa con el de suyu poder para salva con el maga Judio. Ya sabe le que el un oficial ya dale un mandato que na un especifico dia hay mata con el todo Judio quien ta queda na Imperio de Persia. Este mal plano estaba con Haman, el primer ministro. (Ester 3:13-15; 4:1, 5) Na ayuda del de suyu primo, si Mardoqueo, ya habla si Ester este plano na de suyu marido, si Rey Asuero, maskin pa pone na peligro el de suyu vida. (Ester 4:10-16; 7:1-10) Despues, ya permiti si Asuero con Ester y Mardoqueo que hace sale nuevo mandamiento que el maga Judio puede defende con ele diila mismo cuerpo. Y ya ganá el maga Judio contra na diila maga enemigo.—Ester 8:5-11; 9:16, 17.

Cosa kita puede aprende con Ester? Si Reyna Ester amo un ejemplo de coraje, humildad y pagka-modesto. (Salmo 31:24; Filipo 2:3) Maskin pa bonita le y tiene alto posicion, ya pidi le consejo y ayuda. Con animo le yan cuento con el de suyu marido pero na enbuenamente y respetoso manera. Y cuando na peligro el maga Judio, con coraje le ya manda conoce con el de suyu mismo cuerpo que un Judio tambien le.

▸ Para na mas informacion acerca con Ester, mira con el articulo “She Stood Up for God’s People” y “She Acted Wisely, Bravely, and Selflessly.”

Eva

Quien si Eva? Ele el primer mujer que ya existi y el primer mujer que ya menciona na Biblia.

Cosa le ya hace? Si Eva ya desobedece con el claro mandamiento del Dios. Igual con el de suyu marido, si Adan, ya crea tambien con Eva como un perfecto gente que tiene libertad para decidi y abilidad para cultiva maga calidad del Dios, igual na amor y sabeduria. (Genesis 1:27) Sabe si Eva que el Dios ya habla con Adan que si come sila con el fruta del un pono, hay muri sila. Pero, ya manda con ele creé si Satanas que gendeh le muri. Gane, ya engaña con ele que hay queda mas enbuenamente el de suyu vida si desobedece le con Dios. Poreso ya come le con el fruta y na uliji, ya dale le con el de suyu marido y ya come tambien este.—Genesis 3:1-6; 1 Timoteo 2:14.

Cosa kita puede aprende con Eva? El de suyu ejemplo claro ta dale mira que peligroso si continua kita con el diaton mal deseo. Maskin contra na claro mandamiento del Dios, ya cultiva le fuerte deseo para saca con el cosas que gendeh de suyu.—Genesis 3:6; 1 San Juan 2:16.

Ana

Quien si Ana? Ele el mujer de Elcana y nana de Samuel, quien ya queda conocido profeta na Israel de antes.—1 Samuel 1:1, 2, 4-7.

Cosa le ya hace? Cuando nuay anak si Ana, ya pidi le comforta con Dios. El marido de Ana tiene dos mujer. El de suyu otro mujer, si Penina, tiene maga anak. Pero si Ana, nuay siempre anak maskin largo tiempo ya sila casao. Ya gangguia con ele si Penina pero si Ana ya reza con Dios que dale con ele comforta. Ya promete le con Dios que si dale Le anak con ele, hay dale le con este bata con Dios y asigura que este bata hay sirvi na tabernaculo, un tolda que ta usa el maga Israelita para na adoranza.—1 Samuel 1:11.

Ya contesta el Dios con el rezo de Ana y ya pari le con Samuel. Ya cumpli si Ana con el de suyu promesa y ya lleva con Samuel para sirvi na tabernaculo cuando diutay bata pa este. (1 Samuel 1:27, 28) Cada año, ta hace le un camisa que nuay manggas y ta lleva se con Samuel. Despues del cuanto tiempo, el Dios ya dale con Ana cinco pa anak—tres hombre y dos mujer.—1 Samuel 2:18-21.

Cosa kita puede aprende con Ana? El maga con todo corazon rezo de Ana ya puede ayuda con ele para aguanta na maga probanza. El de suyu rezo donde ta rindi le gracias que puede le na 1 Samuel 2:1-10 ta dale mira con el de suyu fuerte fe con Dios.

▸ Para na mas informacion acerca con Ana, mira con el articulo “She Opened Her Heart to God in Prayer.”
▸ Para sabe si porque ya permiti el Dios con el poligamia na de suyu maga siervo de antes, mira con el articulo “Does God Approve of Polygamy?”

Jael

Quien si Jael? Mujer le de Heber, un gendeh Israelita hombre. Con coraje ya suporta si Jael con el maga siervo del Dios.

Cosa le ya hace? Ya hace dayun accion si Jael cuando ya anda na de suyu campo si Sisera, el lider del maga Canaanita soldao. Ya perde na guerra si Sisera contra na Israel y ta busca si onde le puede esconde. Ya invita con ele si Jael que esconde y descanza na de suyu tolda. Cuando ta durmi si Sisera, ya mata con ele si Jael.—Juez 4:17-21.

El cosa ya hace si Jael ya cumpli con el profecia que ya habla si Debora: “Mujer el quien usa si Jehova para hace perde con Sisera.” (Juez 4:9) Por causa na cosa le ya hace, ya menciona con Jael como “el de con todo bendicido na maga mujer.”—Juez 5:24.

Cosa kita puede aprende con Jael? Si Jael tiene iniciativo y coraje. El de suyu experiencia ta dale mira si paquemodo el Dios puede causa maga suceso para cumpli el profecia.

Jesabel

Quien si Jesabel? Mujer del un Israelita rey, si Ajab. Si Jesabel gendeh un Israelita y gendeh ta adora con Jehova. Sino, ta adora le con el dios del maga Canaanita, si Baal.

Cosa le ya hace? Si Reyna Jesabel arogante, nuay lastima y violente. Ya anima le con el maga gente que adora con Baal y comete sexual imoralidad que parte de ese adoranza. Mas pa, ya pricura le quita con el adoranza na verdadero Dios, si Jehova.—1 Rey 18:4, 13; 19:1-3.

Para saca si cosa le quierre, si Jesabel yan imbusterias y ya mata maga gente. (1 Rey 21:8-16) Como cosa ya habla daan el Dios, si Jesabel ya muri na brutal manera y nuay con ele entera.—1 Rey 21:23; 2 Rey 9:10, 32-37.

Cosa kita puede aprende con Jesabel? Si Jesabel gendeh un buen ejemplo para kanaton. Cay bien bajo el de suyu moralidad y conforme le hace maskin cosa para saca si cosa le quierre, el de suyu nombre ya queda un simbolo para na un mujer quien nuay huya, imoral y nuay respeto na autoridad.

Lea

Quien si Lea? Ele el primer mujer del un patriarca que si Jacob. El de suyu menor hermana, si Raquel, amo el otro mujer de Jacob.—Genesis 29:20-29.

Cosa le ya hace? Si Lea ya queda el nana del seis del anak hombre de Jacob. (Rut 4:11) Plano de Jacob que casa con Raquel, gendeh con Lea. Pero el tata del maga mujer, si Laban, ya hace manera para con Lea casa si Jacob en vez con Raquel. Cuando ya realiza si Jacob que ya engaña con ele para casa con Lea, ya confronta le con Laban. Ya habla si Laban que gendeh tradicion diila que una casa el menor hermana contra con el mayor. Despues del un semana, ya casa si Jacob con Raquel.—Genesis 29:26-28.

Mas ya ama si Jacob con Raquel contra con Lea. (Genesis 29:30) Como resulta, yan competencia si Lea con el de suyu hermana para na amor y atencion de Jacob. El Dios ya nota con el sentido de Lea y ya dale con ele siete anak—seis hombre y uno mujer.—Genesis 29:31.

Cosa kita puede aprende con Lea? Si Lea ya confia con Dios por medio na rezo y nuay le permiti que el diila problema na familia hay causa con ele para gendeh mira con el suporta del Dios. (Genesis 29:32-35; 30:20) El cosa ya sucede con ele claro ta dale mira con el mal resulta del poligamia, el arreglamiento que ya permiti el Dios por cuanto tiempo. Na matrimonio que ya establicia le, el un marido debe tiene lang un mujer y el un mujer debe tiene lang un marido.—Mateo 19:4-6.

▸ Para na mas informacion acerca con Lea, mira con el articulo “Distressed Sisters Who ‘Built the House of Israel.’”
▸ Para sabe si porque ya permiti el Dios con el poligamia na de suyu maga siervo por cuanto tiempo, mira con el articulo “Does God Approve of Polygamy?”

Marta

Quien si Marta? Hermana le de Lazaro y Maria, y sila tres ta queda na lugar de Betania, cerca na Jerusalem.

Cosa le ya hace? Si Marta amo un cerca amiga de Jesus, quien “ta ama gayot con Marta y su hermana y con Lazaro.” (Juan 11:5, El Nuevo Testamento) Hospitable si Marta. Na uno del visitada de Jesus, si Maria ya iscuji que oi con ele mientras si Marta ocupao na maga trabajo na casa. Si Marta ya reclama con Jesus que si Maria gendeh ta ayuda con ele. Si Jesus ya corecta con Marta na amable manera.—Lucas 10:38-42.

Cuando ya enferma si Lazaro, si Marta y el de suyu hermana ya pidi con Jesus que anda kanila cay confianza sila que puede le cura con el diila hermano. (Juan 11:3, 21) Pero, ya muri si Lazaro. El cosa ya habla si Marta con Jesus claro ta dale mira el de suyu confianza na promesa del Biblia acerca na resureccion y na abilidad de Jesus que hace vivi otravez con el de suyu hermano.—Juan 11:20-27.

Cosa kita puede aprende con Marta? Bien hospitable si Marta. Ya acepta le con el consejo que ya dale con ele. Ya habla le si cosa le deverasan ta sinti y ta creé.

▸ Para na mas informacion acerca con Marta, mira con el articulo “I Have Believed.”

Maria (nana de Jesus)

Quien si Maria? Un joven Judio mujer le y un virgen na tiempo cuando ya pari le con Jesus, el anak del Dios. Ya queda le priñada na milagroso manera.

Cosa le ya hace? Si Maria con humildad ya hace con el voluntad del Dios. Para casa ya le con Jose cuando ya aparece con ele el un angel y ya anuncia que hay queda le priñada y pari con el Mesias, con quien ya dura ya ta espera el maga gente. (Lucas 1:26-33) Conforme le acepta con ese assignment. Despues nace si Jesus, si Maria y Jose ya tiene cuatro anak hombre y gendeh menora na dos anak mujer. Poreso, si Maria nuay esta un virgen. (Mateo 13:55, 56) Maskin pa ya tiene le un especial privilegio, nuay le pidi que alaba con ele na tiempo del ministerio de Jesus y cuando miembro le del Cristiano congregacion del primer siglo.

Cosa kita puede aprende con Maria? Si Maria amo un fiel mujer quien conforme acepta un serioso responsibilidad. Bien familiar le na Escritura. Asegun pa, maga 20 beses le ya refiri na Escritura cuando ya habla le con el maga palabra na Lucas 1:46-55.

▸ Para na mas informacion acerca con Maria, mira con el articulo “What Mary’s Example Can Teach Us.”

Maria (hermana de Marta y Lazaro)

Quien si Maria? Igual con el de suyu hermano, si Lazaro, y de suyu hermana, si Marta, si Maria un cerca amiga tambien de Jesus.

Cosa le ya hace? Si Maria manada beses ya dale mira que ta aprecia le con Jesus como el Anak del Dios. Ya dale le mira que tiene le fe cuando ya habla le que gendeh era muri el de suyu hermano si talla si Jesus. Y presente si Maria cuando ya resucita si Jesus con Lazaro. El de suyu hermana, si Marta, nuay gusta con el cosa le ya hace cuando si Maria ya iscuji oi con Jesus en vez de ayuda na maga trabajo na casa. Pero, si Jesus ya dale comendacion con Maria cay ya hace le una con el maga espiritual cosas.—Lucas 10:38-42.

Na otro ocasion, ya dale mira si Maria que hospitable le cuando ya vacia le aceite que “bien caro gayot” na cabeza y pies de Jesus. (Mateo 26:6, 7) El otro quien ya puede mira con ese ya acusa con Maria que tan usik. Pero, ya defende con ele si Jesus y ya habla: “Maskin donde ay anuncia este Buen [noticia del Reino del Dios] na entero mundo, ay habla tamen sila por causa del cosa ya hace este mujer, para acorda con ele.”—Mateo 24:14; 26:8-13.

Cosa kita puede aprende con Maria? Si Maria tiene fuerte fe. Ya hace le una con el adoranza con Dios. Y ya honra le con Jesus maskin pa necesita le gasta grande cantidad de sen.

Maria Magdalena

Quien si Maria Magdalena? Un leal dicipulo le de Jesus.

Cosa le ya hace? Si Maria Magdalena amo uno del maga cuanto mujer quien ya viaja junto con Jesus y con el de suyu maga dicipulo. Ya usa le con el de suyu mismo sen para ayuda suporta con el diila maga necesidad. (Lucas 8:1-3) Ya sigui le con Jesus hasta na fin del ministerio de este y talla le cuando ya mata con Jesus. Ya tiene le el privilegio que queda uno de aquellos quien ya puede mira una con Jesus despues este resucita.—Juan 20:11-18.

Cosa kita puede aprende con Maria? Si Maria Magdalena ya suporta con el ministerio de Jesus y ya esta un leal dicipulo.

Miriam

Quien si Miriam? Ele el hermana de Moises y Aaron. Ele el primer profeta mujer na Biblia.

Cosa le ya hace? Como un profeta, ya habla le con otro acerca na mensaje del Dios. Conocido le na Israel y ya canta un cancion junto con el maga Israelita hombre despues el Dios destroza con el maga Egipcio soldao na Colorao Mar.—Exodo 15:1, 20, 21.

Despues del cuanto tiempo, si Miriam y Aaron ya mal habla con Moises. Ta sale que ya hace sila este por causa na orgullo y celos. El Dios “ta oi” y ya dale consejo con Miriam y Aaron. (Numero 12:1-9) Ya queda leprosa si Miriam cay ya castiga con ele el Dios cay ele el ya principia con el maga negativo istoria. Cuando ya pidi si Moises que cura el Dios con Miriam, ya hace se el Dios. Despues del siete dia quarantine, ya permiti otravez con Miriam que man junto na campo de Israel.—Numero 12:10-15.

El Biblia ta indica que si Miriam ya acepta con el consejo. Despues del cuanto siglo, el Dios ya menciona con el especial privilegio de Miriam cuando ya hace Le acorda con el maga Israelita: “Ya imbia yo kanda Moises, Aaron y Miriam con ustedes.”—Miqueas 6:4.

Cosa kita puede aprende con Miriam? El istoria de Miriam ta dale mira que el Dios ta pone atencion si cosa ta habla el de suyu maga siervo con otro y acerca con uno y otro. Ya sabe tambien kita que para hace alegre con Dios, debe kita evita con el orgullo y celos—maga custumbre que puede causa kanaton para destroza con el buen reputacion del otro.

Raquel

Quien si Raquel? Ele el anak de Laban y el mujer con quien mas ta ama el patriarca, si Jacob.

Cosa le ya hace? Ya casa si Raquel con Jacob y ya tiene sila dos hombre anak, quien ya queda incluido na maga cabeza del 12 tribo del Israel de antes. Ya conoce si Raquel con Jacob cuando ta cuida ele con el maga carnero del de suyu tata. (Genesis 29:9, 10) “Bien bonita” si Raquel compara con el de suyu hermana mayor, si Lea.—Genesis 29:17.

Ya ama si Jacob con Raquel y ya conforma le trabaja por siete año para puede le casa con Raquel. (Genesis 29:18) Pero, ya engaña si Laban con Jacob poreso ya casa le una con Lea. Despues, ya permiti si Laban que casa si Jacob con Raquel.—Genesis 29:25-27.

Mas ta ama si Jacob con Raquel y con el diila dos hombre anak contra con Lea y con el diila maga anak. (Genesis 37:3; 44:20, 27-29) Como resulta, tan competencia el dos mujer.—Genesis 29:30; 30:1, 15.

Cosa kita puede aprende con Raquel? Si Raquel ya puede aguanta maga dificultad na familia y nuay perde esperanza que el Dios hay oi con el de suyu maga rezo. (Genesis 30:22-24) El de suyu istoria ta dale mira si paquemodo de bien dificil el efecto del poligamia na familia. El experiencia de Raquel ta demonstra que bien sabio el principio del Dios cuando ya establicia Le con el matrimonio—el hombre debe tiene un mujer lang.—Mateo 19:4-6.

▸ Para na mas informacion acerca con Raquel, mira con el articulo “Distressed Sisters Who ‘Built the House of Israel.’”
▸ Para sabe si porque ya permiti el Dios con el poligamia na de suyu maga siervo por cuanto tiempo, mira con el articulo “Does God Approve of Polygamy?”

Rahab

Quien si Rahab? Un prostitute le quien ta queda na ciudad de Jerico na Canaan y ya queda le siervo de Dios Jehova.

Cosa le ya hace? Ya esconde si Rahab con el dos Israelita quien tan espia na diila lugar. Ya hace le este cay ya oi le maga istoria si paquemodo el Dios de Israel, si Jehova, ya salva con el De Suyu maga siervo na Egipto y na ataque del un tribo que ta llama maga Amorita.

Ya ayuda si Rahab con el maga espia y ya pidi kanila que salva con ele y con el de suyu familia si hay destroza ya el maga Israelita con el Jerico. Ya conforma sila pero tiene maga cuanto condicion: Gendeh le debe habla con el cosa sila ya hace, ele y el de suyu familia debe esta adentro na de suyu casa si hay ataca el maga Israelita y hace le bitay un colorao amarro na de suyu bentana para puede identifica con el de suyu casa. Ya obedece si Rahab con el todo instruccion, y ele y el de suyu familia ya salva cuando ya ataca el maga Israelita con el Jerico.

Na uliji, ya casa si Rahab con el un Israelita y ya queda tatarabuela de Rey David y de Jesucristo.—Josue 2:1-24; 6:25; Mateo 1:5, 6, 16.

Cosa kita puede aprende con Rahab? El Biblia ya refiri con Rahab como un buen ejemplo de fe. (Maga Hebreo 11:30, 31; Santiago 2:25) El de suyu istoria ta dale mira que el Dios ta perdona, gendeh tan pabor-pabor y ta bendici con aquellos quien ta confia con Ele maskin cosa pa el diila background.

▸ Para na mas informacion acerca con Rahab, mira con el articulo “She Was ‘Declared Righteous by Works.’”

Rebeca

Quien si Rebeca? Ele el mujer de Isaac y el nana del kambal maga hombre, si Jacob y Esau.

Cosa le ya hace? Si Rebeca ya hace con el voluntad del Dios maskin pa dificil con este hace. Cuando ya saca le agua na pozo, el un hombre ya pidi con ele poco agua. Ya dale dayun con ele si Rebeca agua para toma y ya ofrece que saca tambien le agua para na maga camello del hombre. (Genesis 24:15-20) Ese hombre amo el ayudante de Abraham y ya viaja le por largo distancia para busca mujer para con Isaac, el anak de Abraham. (Genesis 24:2-4) Ya reza tambien le para na bendicion del Dios. Cuando ya mira le que trabajadora y hospitable si Rebeca, ya realiza le que ya contesta el Dios con el de suyu rezo y ya iscuji Le con Rebeca para queda mujer de Isaac.—Genesis 24:10-14, 21, 27.

Cuando ya sabe si Rebeca si porque el ayudante ya anda alla, ya conforma si Rebeca que sigui con ele y queda mujer de Isaac. (Genesis 24:57-59) Despues, ya tiene kambal anak si Rebeca. El Dios ya habla con ele que el mayor anak, si Esau, hay sirvi con el menor, si Jacob. (Genesis 25:23) Cuando para dale ya si Isaac con Esau el bendicion para na mayor anak, tiene cosa ya hace si Rebeca para asigura que el bendicion guinda con Jacob, harmonia na cosa le sabe que voluntad del Dios.—Genesis 27:1-17.

Cosa kita puede aprende con Rebeca? Si Rebeca modesto, trabajadora y hospitable—maga calidad que ya puede con ele ayuda queda un buen mujer, nana y siervo del deverasan Dios.

▸ Para na mas informacion acerca con Rebeca, mira con el articulo “I Am Willing to Go.”

Rut

Quien si Rut? Un Moabita le quien ya deja con el de suyu maga dios y con el de suyu lugar para queda siervo de Jehova na lugar de Israel.

Cosa le ya hace? Ya dale mira grande amor si Rut con el de suyu suegra, si Noemi. Si Noemi, junto con el de suyu marido y dos anak hombre, ya anda na Moab cay nuay comida na Israel. Despues, ya casa el de suyu maga anak na maga Moabita mujer—kanda Rut y Orpa. Pero despues del cuanto tiempo, el marido de Noemi y de suyu maga anak ya muri. Ya queda sila tres maga viuda.

Ya decidi si Noemi que bira otravez na Israel cay ya acaba ya el secas alla. Ya iscuji sigui con ele si Rut y Orpa. Pero, ya habla si Noemi que bira sila na diila maga familia. Y amo se el cosa ya hace si Orpa. (Rut 1:1-6, 15) Pero si Rut leal ya esta junto con el de suyu suegra. Ta ama le con Noemi y quierre le adora con el Dios de Noemi, si Jehova.—Rut 1:16, 17; 2:11.

Cay un leal hierna si Rut y trabajadora, ya tiene le buen reputacion na lugar de Noemi, na Betlehem. Si Boaz, un rico dueño de tierra, ya gusta gayot con Rut y ya dale le comida con Rut y Noemi. (Rut 2:5-7, 20) Na uliji, ya casa si Rut con Boaz y ya queda un tatarabuela de Rey David y de Jesucristo.—Mateo 1:5, 6, 16.

Cosa kita puede aprende con Rut? Por causa na amor con Noemi y con Jehova, preparao si Rut deja con el de suyu lugar y familia. Trabajadora le y leal, maskin pa ya enfrenta le manada dificultad.

▸ Para na mas informacion acerca con Rut, mira con el articulo “Where You Go I Shall Go” y “An Excellent Woman.”

Sara

Quien si Sara? Ele el mujer de Abraham y el nana de Isaac.

Cosa le ya hace? Ya deja si Sara con el de suyu comfortable vida na rico ciudad de Ur cay tiene le fe na promesa del Dios con el de suyu marido, si Abraham. El Dios ya habla con Abraham que sale na Ur y anda na tierra de Canaan. El Dios ya promete que hay bendici con ele y hace con ele un grande nacion. (Genesis 12:1-5) Na aquel tiempo, posible mas de 60 año ya si Sara. Desde aquel tiempo, si Sara y el de suyu marido ta queda na tolda y ta cambia-cambia lugar.

Maskin pa na peligro el diila vida cay cambia-cambia sila lugar, ya suporta si Sara con Abraham mientras ta sigui este con el direccion del Dios. (Genesis 12:10, 15) Por manada año, nuay anak si Sara poreso bien triste le. Pero, ya promete el Dios que hay bendici Le con el descendiente de Abraham. (Genesis 12:7; 13:15; 15:18; 16:1, 2, 15) Ya llega el tiempo, el Dios ya promete que hay tiene anak si Abraham y Sara. Ya pari si Sara na edad que imposible ya para tiene anak. El de suyu edad 90 año y el de suyu marido 100 año ya. (Genesis 17:17; 21:2-5) Ya nombra sila con el diila anak Isaac.

Cosa kita puede aprende con Sara? El ejemplo de Sara ta enseña kanaton que puede kita pirmi confia que cumpli el Dios con el de suyu maga promesa, maskin pa dol imposible este. (Maga Hebreo 11:11) Y el de suyu ejemplo como un mujer ta dale mira el importancia del respeto na matrimonio.—1 Pedro 3:5, 6.

▸ Para na mas informacion acerca con Sara, mira con el articulo “What a Beautiful Woman You Are” y “God Called Her ‘Princess.’”

Sulamita mujer

Quien el Sulamita mujer? Un bonita mujer le y uno del maga caracter na libro del Biblia que ta llama Cancion de Solomon. Nuay el Biblia revela con el de suyu nombre.

Cosa le ya hace? El Sulamita mujer ya esta leal con el pastor hombre con quien le ta ama. (Cancion de Solomon 2:16) Por causa cay bien bonita le, ya saca le el atencion del un rico rey, si Solomon, quien ya pricura enamora con ele. (Cancion de Solomon 7:6) Maskin pa el otro ta habla que iscuji con Solomon, nuay conforma el Sulamita mujer. Ta ama gayot le con el pobre pastor y leal con ele.—Cancion de Solomon 3:5; 7:10; 8:6.

Cosa kita puede aprende con el Sulamita mujer? Ya esta le humilde maskin pa bonita le y ta ricibi atencion del otro. Nuay le permiti que el pressure del otro o el posibilidad que queda rico y conocido que afecta con el de suyu sentido. Ya controla le con el de suyu emocion y ya esta limpio na moral.

Mujer de Lot

Quien el mujer de Lot? El Biblia nuay menciona con el de suyu nombre. Pero, ta habla este que tiene le dos anak mujer. Ele y el de suyu familia ta queda na ciudad de Sodoma.—Genesis 19:1, 15.

Cosa le ya hace? Ya desobedece le con el un mandamiento del Dios. Determinao el Dios que destroza con el Sodoma y con el maga ciudad alrededor de este por causa con el diila grabe sexual imoralidad. Por causa na amor del Dios con Lot y na de suyu familia quien ta queda na Sodoma, ya imbia le con el dos angel para guia kanila y queda sila salvao.—Genesis 18:20; 19:1, 12, 13.

Ya habla el maga angel na familia de Lot que sale na ese lugar y no bira cara. Si desobedece sila, hay muri sila. (Genesis 19:17) El mujer de Lot “ya bira cara y ya queda un estatua de sal.”—Genesis 19:26.

Cosa kita puede aprende na mujer de Lot? El de suyu istoria ta dale mira con el peligro del amor na material cosas que gendeh mas kita obedece con Dios. Si Jesus ya menciona que gendeh le buen ejemplo para kanaton. “Acorda ustedes con el mujer de Lot,” ele ya habla.—Lucas 17:32.