El mar de fuego amo un simbolo de destruccion que nuay fin. Igual este na Gehena pero gendeh este igual na infierno, el sepultura del maga gente.

Gendeh un literal mar

 El cinco versiculo na Biblia donde ya menciona con el expresion “mar de fuego” ta dale mira que un simbolo este y gendeh un literal mar. (Revelacion 19:20; 20:10, 14, 15; 21:8, El Nuevo Testamento) Hay buta na mar de fuego con el siguiente:

•   El Diablo. (Revelacion 20:10) Como un espiritu creatura, gendeh puede quema con el Diablo na literal fuego.​—Exodo 3:2; Juez 13:20.

•   Muerte. (Revelacion 20:14) Gendeh este un persona sino ta representa este con el un situacion donde nuay cosa ta puede hace el un individual y nuay mas le vida. (Eclesiastes 9:10) Gendeh puede literal quema con el muerte.

•   “El Grande Animal” y “el Falso Profeta.” (Revelacion 19:20, El Nuevo Testamento na Chavacano) Ciendo maga simbolo este, gendeh ba justo lang que hace conclusion que un simbolo tambien el mar de fuego donde buta kanila?​—Revelacion 13:11, 12; 16:13.

Un simbolo de destruccion que nuay fin

 El Biblia ta habla que el mar de fuego “amo el segundo muerte.” (Revelacion 20:14; 21:8) El primer clase de muerte que ya menciona na Biblia amo el muerte que ya resulta na pecado de Adan. Aquellos quien ya experiencia con este clase de muerte hay resucita. Y na uliji, completamente hay quita el Dios con este clase de muerte.​—1 Corinto 15:21, 22, 26.

 El mar de fuego ta representa un diferente clase de muerte o el segundo muerte. Maskin ta representa tambien este na un situacion donde nuay mas cosa ta puede hace el un individual, diferente este na primer clase de muerte cay el Biblia nuay menciona que tiene resureccion para na segundo muerte. Por ejemplo, el Biblia ya habla que si Jesus tiene “el llave del Muerte y del Lugar del Maga Muerto.” Este ta dale mira que tiene le el autoridad para resucita con el maga gente desde na muerte que ya causa el pecado de Adan. (Revelacion 1:18; 20:13) Pero, si Jesus o maskin quien, nuay llave del mar de fuego. Este simbolico mar ta representa con el eterno castigo por medio de permanente destruccion.​—2 Tesalonica 1:9.

Igual na Gehena, el Patag Lugar de Hinnom

 El palabra Gehena (na Griego geʹen·na) ya menciona 12 beses na Biblia. Igual na mar de fuego, un simbolo tambien este de destruccion que nuay fin. Tiene cuanto yan translate con este palabra como “infierno,” pero otro el Gehena na infierno o sepultura (na Hebreo sheʼohlʹ, na Griego haiʹdes).

 El palabra “Gehena” literal quierre decir “Patag Lugar de Hinnom.” Ta refiri este na un patag lugar apuera del Jerusalem. Na tiempo de Biblia de antes, amo este el lugar donde sila ta buta con el maga basura. Pirmi tiene fuego na este lugar para quema con el maga basura; si tiene basura nuay quema, ta come con este el maga gusano alla.

 Ya usa si Jesus con el Gehena como simbolo de un destruccion que nuay fin. (Mateo 23:33) Ya habla le que na Gehena, “el gusano gendeh ta muri” y “el fuego gendeh ta apaga.” (Marcos 9:47, 48) Ta refiri le aqui con el situacion na Patag Lugar de Hinnom y con el profecia na Isaias 66:24, que ta habla: “Hay sale sila y mira con el cuerpo del maga gente que ya muri quien yan rebelde conmigo; cay gendeh muri el maga gusano alli na maga cuerpo y el fuego alli gendeh apaga.” El cosa ya discuti si Jesus gendeh lang basta torture sino destruccion. Hay come el maga gusano y hay quema con el cuerpo del maga muerto, gendeh del vivo.

 El Biblia nuay menciona que tiene resureccion na Gehena. El “mar de fuego” y “fuego del imfierno” o Gehena ta representa con el permanente destruccion.​—Revelacion 20:14, 15; 21:8, El Nuevo Testamento; Mateo 18:9.

“Pena sila de dia y de noche hasta para cuando”​—na cosa manera?

 Si un simbolo de destruccion el mar de fuego, porque el Biblia ta habla que “ay pena sila [“hace sufri,” NWT] de dia y de noche hasta para cuando” con el Diablo, peligroso grande animal y falso profeta? (Revelacion 20:10) Considera con el cuatro razon si porque kita puede habla que gendeh este ta refiri na literal torture o sufrimiento:

1.   Para hace sufri con el Diablo hasta para cuando, necesita ele esta vivo hasta para cuando. Pero el Biblia ta habla que hay termina o destroza con ele.​—Maga Hebreo 2:14.

2.   El vida hasta para cuando amo un regalo estaba con Dios y gendeh un castigo.​—Roma 6:23.

3.   El peligroso grande animal y el falso profeta amo maga simbolo y gendeh puede experiencia literal sufrimiento.

4.   El contexto del Biblia ta indica que el sufrimiento que experiencia el Diablo amo que hace con ele preso o destroza con ele hasta para cuando.

 El original expresion que ya usa para na palabra “hace sufri” na Biblia puede tambien refiri na “pagka-preso.” Por ejemplo, el Griego expresion para na palabra “hace sufri” que ya usa na Mateo 18:34 yan translate el manada como “pone na calaboso.” (El Nuevo Testamento) Este ta dale mira el coneccion entre na maga palabra “hace sufri” y “pagka-preso.” Na igual manera, na Mateo 8:29 y Lucas 8:30, 31 (NWT) ya usa con el maga palabra “castiga” y “hondura” para refiri na un cosa, el simbolico lugar donde nuay mas actividad o muerte. (Roma 10:7; Revelacion 20:1, 3) Gane, manada beses ya usa na libro de Revelacion con el expresion ‘hace sinti duele’ o hace sufri, na simbolico manera.​—Revelacion 9:5; 11:10; 18:7, 10.