Despues crea el Dios con el primer hombre y mujer, ya hace le kanila como man maridable. Ya establicia le con el matrimonio como un especial relacion entre na un hombre y mujer, y amo este el fundacion del familia.—Genesis 1:27, 28; 2:18.

 Quierre el Dios que queda alegre el man maridable. (Proverbio 5:18) Na Biblia, ya dale le maga guia para na matrimonio y maga principio que puede ayuda para tene un alegre matrimonio.

Na este articulo

•  Cosa el proposito del Dios para na matrimonio?

•  Cosa ta habla el Biblia acerca na separacion y divurcio?

•  Necesita ba legal registra con el un matrimonio para queda este aceptable con Dios?

•  Cosa el papel y responsibilidad que ya dale el Biblia para na marido y mujer?

•  Ya manda ba el Dios que debe tene anak el man maridable ahora?

•  Paquemodo puede ayuda el Biblia con el diamon matrimonio?

•  Maga texto na Biblia acerca na matrimonio

 Desde na principio, ya crea el Dios con el matrimonio como un relacion entre na un hombre y un mujer. (Genesis 2:24) Gendeh aceptable con Dios el poligamia, el maga practica de homosexualidad o aquellos tan live in o tan junto maskin nuay pa casa. (1 Corinto 6:9; 1 Tesalonica 4:3) Ya enseña si Jesus con el de suyu maga siguidores que sigui con el original proposito del Dios para na matrimonio.—Marcos 10:6-8.

 Na ojos del Dios, permanente el matrimonio. Si casa el un hombre y un mujer, ta promete sila que queda sila leal con uno y otro y esta sila junto mientras vivo sila. Ta expecta el Dios que cumpli sila con ese promesa.—Marcos 10:9.

 Tiene maga tiempo donde el un marido y mujer necesita queda lejos con uno y otro igual si el uno kanila necesita viaja por causa na emergencia na familia. Pero nuay anima el Biblia que man separtajan por causa na problema na matrimonio. Sino, ta anima este con el man maridable que solva con el diila problema.—1 Corinto 7:10.

 El adulterio lang el solamente valido razon na Escritura para man divurcio. (Mateo 19:9) Poreso asegun na Biblia, si decidi el un marido y mujer que man separtajan o man divurcio pero gendeh adulterio el razon, igual sila gendeh puede man date o casa con otro.—Mateo 5:32; 1 Corinto 7:11.

 Ta expecta el Dios que obedece el maga Cristiano con el maga ley del gobierno acerca na matrimonio. (Tito 3:1) Si posible para na un man maridable que legal registra con el diila matrimonio y ya hace sila se, ta dale sila mira respeto con el secular autoridad y na principio del Dios que el matrimonio amo un permanente relacion. a

•   Responsibilidad del man maridable. Debe ama y respeta el marido y mujer con uno y otro. (Efeso 5:33) Necesita sila dale el sexual necesidad del cada uno na amable manera y evita queda gendeh fiel na maskin cosa manera. (1 Corinto 7:3; Maga Hebreo 13:4) Si tiene sila maga anak, responsibilidad del man maridable que hace engranda kanila.—Proverbio 6:20.

   Nuay detallao menciona el Biblia si quien na man maridable el debe tene secular trabajo o si paquemodo sila dividi con el maga trabajo na casa. Puede sila decidi si cosa el bueno para na diila familia.

•   El papel del marido. El Biblia ta habla que “el marido amo el cabeza del mujer.” (Efeso 5:23, El Nuevo Testamento na Chavacano) Este quierre decir que debe le guia con el de suyu familia y hace maga decision que hay beneficia el de suyu mujer y maga anak.

   Debe le asigura que puede le dale el diila fisical, emocional y espiritual necesidad. (1 Timoteo 5:8) Puede le dale mira que ta aprecia le con el maga calidad y abilidad del de suyu mujer si ta ayuda le con este y ta considera con el opinion y sentido de este antes hace maga decision. (Proverbio 31:11, 28) Ta habla el Biblia que debe cumpli el marido con el de suyu maga responsibilidad na amable manera.—Colosa 3:19.

•   El papel del mujer. El Biblia ta habla que “el mujer necesita respeta con el disuyo marido.” (Efeso 5:33) Alegre el Dios si ta respeta el mujer con el papel que ya dale el Dios con el de suyu marido.

   El papel del mujer amo que asisti con el de suyu marido, ayuda con ele hace maga buen decision y suporta con ele como el cabeza del familia. (Genesis 2:18) Ta menciona el Biblia maga positivo cosas acerca na un mujer quien ta cumpli con el de suyu importante papel na matrimonio.—Proverbio 31:10.

 Nuay. De antes, ya manda el Dios con el cuanto del de suyu maga siervo que tene anak. (Genesis 1:28; 9:1) Pero ese mandamiento gendeh aplicable na maga Cristiano. Nuay manda si Jesus con el de suyu maga siguidores que tene anak. Maskin el de suyu maga dicipulo del primer siglo nuay habla que debe tene anak el maga man maridable. Depende kanila si quierre ba sila tene anak.

 El Biblia ta contene maga principio que puede ayuda con el man maridable que tene buen matrimonio. El maga principio na Biblia puede tambien ayuda kanila para evita o enfrenta maga problema.

 El maga principio na Biblia puede ayuda con el man maridable para . . .

•   dale mira deverasan amor.—1 Corinto 13:4-7; Colosa 3:14.

•   solva con el maga problema entre kanila.—1 Corinto 10:24.

•   oi enbuenamente con uno y otro.—Santiago 1:19.

•   dale mira respeto.—Roma 12:10.

•   perdona con uno y otro.—1 Pedro 4:8.

•   queda leal.—Marcos 10:9.

•   queda paciencioso.—Efeso 4:2, 3.

•   man ayudajan.—Eclesiastes 4:9.

•   queda leal na diila promesa con uno y otro.—Cancion de Solomon 8:7.