Quien debe enseña con el maga bata acerca na sexo? Asegun na Biblia, ya dale este responsibilidad con el maga mayores y manada kanila el ya incuntra ayuda na siguiente sugestion:

•   No tiene huya. Franca ta discuti el Biblia acerca na sexo y el maga privado parte del gente. Ya habla tambien el Dios con el nacion del Israel que necesita enseña con “el maga bata” acerca con ese. (Deuteronomio 31:12; Levitico 15:2, 16-19) Puede tu usa maga justo palabra que gendeh dale idea que maka-huya el sexo o privado parte del cuerpo.

•   Hinay-hinay enseña. En vez de una vez lang man cuento acerca na sexo con el de tuyu anak si ta queda ya soltero o dalaga, hinay-hinay este enseña con el de tuyu anak hasta puede le entende con ese.​—1 Corinto 13:11.

•   Enseña maga moral principio. Posible, enseña con el maga bata na escuela acerca na sexo. Pero, el Biblia ta anima con el maga mayores que enseña con el diila maga anak gendeh lang el fisical aspeto de sexo sino el justo mirada y conducta acerca na sexo.​—Proverbio 5:1-23.

•   Oi con el de tuyu anak. No dayun rabia o juzga si el de tuyu anak hay pregunta acerca na sexo. Sino, “man alisto ustedes para oi, pero no conversa dayun.”​—Santiago 1:19, El Nuevo Testamento na Chavacano.

Si paquemodo protege con el de tuyu anak na maga tan molestia

•   Enseña con el de tuyu mismo cuerpo. Sabe si cosa el comon tactica del maga quien ta abusa.​—Proverbio 18:15; mira con el capitulo 32 del libro Questions Young People Ask—Answers That Work, Volume 1.

•   Queda interesao na vida del de tuyu anak. No deja con el de tuyu anak na un persona que gendeh tu asigurao que puede tu confia y no permiti con el de tuyu anak “que dejao lang.”​—Proverbio 29:15.

•   Enseña kanila que tiene balance mirada na obediencia. El maga bata necesita aprende obedece con el diila maga mayores. (Colosa 3:20) Pero, si enseña tu con el de tuyu anak que debe le pirmi obedece con maskin quien adulto, mas grande el posibilidad que queda le victima de abuso. Puede habla el maga Cristiano mayores con el diila anak, “Si tiene quien manda contigo hace un cosa que el Dios ya habla que gendeh justo, no con ese hace.”​—Maga Actividad 5:29.

•   Man practice si cosa debe hace. Enseña con el de tuyu anak si cosa debe hace si tiene quien pricura molestia con ele si nuay tu. Puede este ayuda con el de tuyu anak para con animo habla “No se hace! Avisa yo contigo!” y sale dayun. Posible, necesita tu hace acorda “con el de tuyu maga anak pirmi” cay pronto lang sila ulvida.​—Deuteronomio 6:7, Contemporary English Version.