Maskin pa nuay usa con el palabra “aborcion” na Biblia, manada maga texto el ta dale mira si cosa el mirada del Dios na vida del gente, incluido el vida del un bata que nuay pa nace.

 El vida amo un regalo estaba con Dios. (Genesis 9:6; Salmo 36:9) Para con ele, precioso el todo vida, incluido el vida del un bata que talli pa na vientre del nana. Poreso si tiene quien intencional ya mata con el un bata que nuay pa nace, igual lang ese dol ya comete le matanza.

 El Ley del Dios que ya dale na maga Israelita ta habla: “Si tiene maga gente tan peleajan y ya puede sila hace sinti duele con el mujer priñada y ya pari le nuay na hora pero nuay resulta na muerte, el quien ya hace sinti duele debe paga con el daño que hay pidi el marido de aquel mujer; y debe le se paga asegun na decision del maga juez. Pero si ya resulta se na muerte, entonces debe tu paga vida para na vida.”—Exodo 21:22, 23. a

•  Cuando ta principia el vida del gente?

•  Hay perdona ba el Dios con el un persona quien ya comete aborcion?

•  Justo ba comete aborcion si na peligro el vida del nana o del bata?

 Para con Dios, ta principia el vida del gente maskin talli pa lang ele na vientre del de suyu nana. El Dios ta dale mira na de suyu Palabra, el Biblia, que ta considera le con el un bata que nuay pa nace como un individual persona. Nota con el cuanto ejemplo que ta indica que para con Dios, igual lang el vida del un bata que talli pa na vientre del nana y del bata que ya nace ya.

•   Bajo na guia del sagrao espiritu, si Rey David ya habla con Dios: “Ya mira tu conmigo maskin adentro na vientre del de mio nana.” (Salmo 139:16) El Dios ta considera con David como un persona maskin nuay pa ele nace.

•   Mas pa, sabe el Dios que hay dale le un especial trabajo para con el profeta Jeremias antes pa este nace. El Dios ya habla con ele: “Nuay pa yo contigo forma na vientre, conoce ya yo contigo y ya santifica yo contigo antes pa tu nace. Ya hace yo contigo un profeta para na maga nacion.”—Jeremias 1:5.

•   Ya usa el un escritor del Biblia, si Lucas, que un doctor, con el igual Griego palabra para refiri con el un bata que nuay pa nace y con el bata que ya nace ya.—Lucas 1:41; 2:12, 16.

 Puede perdona el Dios con aquellos quien ya comete aborcion. Si ya acepta ya sila ahora con el mirada del Dios con el vida, gendeh mas sila necesita sinti culpable. “Si Jehova lastimoso y tiene compasion . . . Si paquemodo de lejos el subida del sol na abajada de este, ansina tambien de lejos le ya pone kanaton el diaton maga pecado.” b (Salmo 103:8-12) Hay perdona si Jehova con el todo quien sincero ta arripinti na diila maga culpa de antes, incluido el aborcion.—Salmo 86:5.

 Base na cosa el Biblia ta habla acerca na vida del bata que nuay pa nace, el posible complicacion na salud del nana o del bata gendeh razon para comete aborcion.

 Quetal si na tiempo del nacimiento que donde necesita iscuji si con quien salva—con el vida ba del nana o del bata? Na ansina maga situacion que ralo lang ta sucede, aquellos quien envuelto necesita hace un personal decision si de quien vida sila pricura salva.