Nuay especifico menciona el Biblia acerca na pornografia, cybersex o otro pa actividad que semejante con este. Pero, claro ta menciona el Biblia si cosa ta sinti el Dios acerca na maga actividad que ta engaña con el persona que man sexo na gendeh de suyu marido o mujer o ta hace malo con el diila mirada na sexo. Considera con este maga texto na Biblia:

•   “Poreso, mata na de ustedes cuerpo el maga cosa-cosa de este mundo, como el maga immoralidad, maga cuchinadas, maga deseo y maga sentimiento malo.” (Colosa 3:5, El Nuevo Testamento na Chavacano) En vez de mata con el mal deseo, ta queda este mas fuerte si ta mira pornografia. Por causa con ese, ta queda el un persona mabuling na ojos del Dios.

•   “Todo maga hombre quien ta mira con un mujer con mal deseo, ya comete ya sila adulterio con ese mujer na su corazon.” (Mateo 5:28) El maga letrato de imoral maga practica ta causa con el un persona para pensa mal cosas que ta resulta na mal accion.

•   “Por causa del maga immoralidad, o maskin cosa clase de pendejadas o cabit, no ustedes permiti maskin nombra lang con esos entre con ustedes.” (Efeso 5:3) Gendeh kita debe discuti acerca na sexual imoralidad como broma, ni mira o le acerca de ese.

•   “Sabe gayot kita si cosa ba el maga trabajo del mal naturaleza del cuerpo. Pendejadas, cuchinadas . . . y todo clase de immoralidad. Ta avisa yo con ustedes ahora, como ya avisa ya yo con ustedes antes: Aquellos quien ta hace ese maga cosa-cosa gendeh gayot ay hereda el Reino del Dios.” (Galacia 5:19-21) Para con Dios, mabuling o imoral aquellos quien ta mira pornografia, tan cybersex, phone sex o sexting. Si ta hace kita con este maga cosas, hay perde el favor del Dios kanaton.