Una vez lang ya menciona na Biblia acerca na tattoo. El Levitico 19:28 ta habla: “Gendeh ustedes debe pone marca de tattoo na de ustedes cuerpo.” Ya dale el Dios con este mandamiento na nacion de Israel para gendeh sila queda igual na diila maga vecinos quien tiene nombre o simbolo del diila maga dios na diila pellejo. (Deuteronomio 14:2) Maskin gendeh obligao el maga Cristiano sigui con el Ley que ya dale con el maga Israelita, debe kita considera con el principio que ta suporta con este.

Debe ba pone tattoo el un Cristiano?

 El siguiente texto na Biblia puede contigo ayuda considera con ese:

•   “El maga mujer ay arregla canila mismo con delicadeza, y . . . simple.” (1 Timoteo 2:9, El Nuevo Testamento) Ese principio aplicable na mujer y hombre. Debe kita respeta el sentido del otro y evita saca sobra atencion.

•   El cuanto quierre que conoce kanila si quien gayot sila mientras el otro ta pone tattoo para dale mira que tiene sila el derecho que hace si cosa sila quierre na diila cuerpo. Pero, el Biblia ta anima con el maga Cristiano: “Presenta con el de ustedes cuerpo como vivo sacrificio, sagrao y aceptable con Dios, un sagrao servicio que tiene abilidad para examina.” (Roma 12:1, NWT) Usa con el de tuyu “abilidad para examina” para sabe si porque tu quierre pone tattoo. Si hace tu se por causa lang cay quierre tu sigui si cosa el uso o para dale mira que miembro tu del un grupo, acorda que posible cambia el de tuyu pensamiento pero si pone tu tattoo, permanente ya este. Si examina tu con el de tuyu motivo, puede se ayuda contigo hace justo decision.—Proverbio 4:7.

•   “El maga plano del buen trabajador, asigurao hay tiene buen exito, pero todo aquellos quien ta apura asigurao hay experiencia pobreza.” (Proverbio 21:5) Na manada situacion, aquellos quien ta decidi pone tattoo gendeh ta considera enbuenamente con el decision que ta hace sila. Pero, tiene se largo efecto na diila relacion con otro y na diila trabajo. Magasto y duele si quita con el tattoo. Asegun na research y na maga negocio que ta quita tattoo, manada del maga quien ya pone tattoo el ya arripinti na uliji.