Manada ta mira con el cruz como el simbolo del Cristianidad. Pero, el Biblia nuay menciona si onde exacto ya clava con Jesus, poreso nuay quien puede asigura con este. Maskin pa ansina, el Biblia ta hace claro que si Jesus nuay muri na cruz sino na un estaca.

 El Biblia ya usa con el Griego palabra stau·rosʹ para refiri si onde ya clava con Jesus. (Mateo 27:40; Juan 19:17) Maskin manada na maga translation el ta usa con el palabra “cruz,” manada scholar el tan uyun que este deverasan ta refiri na un “derecho estaca.” a Asegun na A Critical Lexicon and Concordance to the English and Greek New Testament, el stau·rosʹ “gendeh quierre decir dos pedazo de palo que ya hace cruz.”

 El Biblia ya usa tambien con el Griego palabra xyʹlon que ta semeja con el stau·rosʹ. (Maga Actividad 5:30; 1 Pedro 2:24) Este palabra quierre decir “palo,” “estaca” o “pono.” b Poreso el The Companion Bible ya habla: “Nuay maskin cosa escribido na lengguaje Griego del N[uevo] T[estamento] que ta indica dos pedazo de palo.”

Aceptable ba con Dios el usada de cruz na adoranza?

 Maskin onde pa ya clava con Jesus, el siguiente informacion y maga versiculo na Biblia ta indica que gendeh kita debe usa con el cruz na adoranza.

1.   Gendeh ta acepta el Dios con el adoranza que ta usa maga imagen o simbolo, incluido ya el cruz. El Dios ya manda con el maga Israelita que no usa maskin cosa “forma del un idolo” na diila adoranza y ya habla tambien con el maga Cristiano que debe sila “evita de adorar con ese maga idolo.”​—Deuteronomio 4:15-19; 1 Corinto 10:14, El Nuevo Testamento.

2.   El maga Cristiano del primer siglo nuay usa con el cruz na diila adoranza. c El enseñada y ejemplo del maga apostoles amo el cosa debe sigui el todo maga Cristiano.​—2 Tesalonica 2:15.

3.   El usada de cruz na adoranza ya origina na maga pagano. d Maga cien año despues del muerte de Jesus, el maga iglesia ya anda contra na de suyu maga enseñanza. Ya permiti con el maga nuevo miembro del iglesia que “continua usa con el diila maga pagano simbolo,” incluido ya el cruz. (The Expanded Vine’s Expository Dictionary of New Testament Words) Pero, el Biblia gendeh ta permiti que acepta maga pagano simbolo para lang tiene maga nuevo miembro.​—2 Corinto 6:17.